ជាតិ
សង្គមជាតិ
អាជ្ញាធរថា គ្មានអ្នកសេពគ្រឿងញៀនណាម្នាក់ ត្រូវបានដាក់ក្នុងពន្ធនាគារឡើយ លោក មាស វីរិទ្ធ អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន
× ភ្នំពេញ៖ នាកិច្ចប្រជុំជាមួយ លោកស្រី គ្លូរៀ ឡៃ នាយកតំបន់អាស៊ីគោលនយោបាយសម្ព័ន្ធគ្រឿងញៀនអន្តរជាតិពិភាក្សាការងារ កាលពីថ្ងៃទី១៩ ខែកញ្ញា លោក មាស វីរិទ្ធ អគ្គលេខាធិការអាជ្ញាធរជាតិប្រឆាំងគ្រឿងញៀន បានអះអាងថា គ្មាននរណាម្នាក់ត្រូវបានអាជ្ញាធរចាប់ដាក់ក្នុងពន្ធនាគារ ពីបទសេពគ្រឿងញៀនឡើយ។
លោក មាស វីរិទ្ធ អគ្គលេខាធិការអាជ្ញាធរជាតិប្រឆាំងគ្រឿងញៀន បានបញ្ជាក់ថា តាមរយៈផែនការយុទ្ធនាការប្រឆាំងគ្រឿងញៀនកន្លងមក អាជ្ញាធរបានបង្គ្រាបបទល្មើសគ្រឿងញៀន តាមរយៈការជួញដូរ ដឹកជញ្ជូន ចរាចរ រក្សាទុក ដោយបញ្ចូនទៅកាន់តុលាការ ដើម្បីចាត់វិធានការទៅតាមផ្លូវច្បាប់ហើយ។ សម្រាប់អ្នកដែលសេពគ្រឿងញៀនវិញ ត្រូវបានអាជ្ញាធរបញ្ជូនទៅព្យាបាល នៅតាមមណ្ឌលសុខភាព ឬនៅតាមមន្ទីរពេទ្យក្នុងសហគមន៍របស់ពួកគេ។
រូបភាពពីអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន
បើតាមលោក មាស វីរិទ្ធ ជនដែលសេពគ្រឿងញៀន ត្រូវបានរាជរដ្ឋាភិបាលកម្ពុជា ចាត់ទុកថា ជាជនរងគ្រោះដែលត្រូវតែទទួលបានការព្យាបាល និងស្តារនីតិសម្បទាររបស់ពួកគេឡើងវិញដោយមិនបង់ថ្លៃ។ លោក មាស វីរិទ្ធ បញ្ជាក់ថា៖« កម្ពុជាមានវិធានការច្បាស់លាស់មួយ គឺមិនទុកអ្នកញៀនណាម្នាក់ឲ្យនៅឯកាឡើយ គឺត្រូវតែមានការព្យាបាលនៅមណ្ឌលសុខភាព និងមន្ទីរពេទ្យដោយមិនត្រូវរើសអើងឡើយ»។
សូមបញ្ជាក់ថា បទល្មើសគ្រឿងញៀននៅឆ្នាំ២០១៨ បានកើតឡើងចំនួនជាង៨ពាន់ករណី ហើយឃាត់ខ្លួនជាង១,៦ម៉ឺននាក់(ស្រីជាង១៣០០នាក់) ដែលត្រូវបានឃាត់ខ្លួន។ បើតាមរបាយការណ៍ប្រចាំឆ្នាំ២០១៨ ពីអាជ្ញាធរជាតិប្រឆាំងគ្រឿងញៀន សារធាតុញៀនដែលអាជ្ញាធរចាប់បានមាន ចំនួនជាង៥០០គីឡូក្រាម កញ្ឆាក្រៀមជាង៧៤គីឡូក្រាម និងកញ្ជាដើមជាង១,៦សែនដើម៕
Tag:
អាជ្ញាធរ
ពន្ធនាគារ
គ្រឿងញៀន
© រក្សាសិទ្ធិដោយ thmeythmey.com