ជាតិ
នយោបាយជាតិ
លោក សម រង្ស៊ី សុំអន្តរជាតិ ជួយឲ្យមានការចរចា ពេលមកដល់ខ្មែរ
× លោក សម រង្ស៊ី មេដឹកនាំក្រុមប្រឆាំង បានសរសេរលិខិត ទៅកាន់លោក ខូលី សេក (Coly Seck) ប្រធានក្រុមប្រឹក្សាសិទ្ធិមនុស្សនៃអង្គការសហប្រជាជាតិ ដើម្បីសុំឲ្យស្ថាប័នសិទ្ធិមនុស្សពិភពលោកមួយនេះ រួមទាំងសហគមន៍អន្តរជាតិដដៃទៀត ជួយធានាថា ការវិលត្រឡប់របស់លោកនិងបក្សពួក មកកាន់កម្ពុជា នៅថ្ងៃទី៩ ខែវិច្ឆិកា ឆ្នាំ២០១៩ «ក្លាយជាឱកាសនៃការសន្ទនានិងការផ្សះផ្សាឡើងវិញ» ស្របតាមអនុសាសន៍របស់អ្នកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាតិ។
លិខិតរបស់លោក សម រង្ស៊ី ដែលផ្ញើជូនលោក ខូលី សេក ធ្វើឡើងស្របពេលដែលក្រុមប្រឹក្សាសិទ្ធិមនុស្សរបស់អង្គការសហប្រជាជាតិ កំពុងបើកកិច្ចប្រជុំប្រចាំឆ្នាំលើកទី៤២ នៅទីក្រុងហ្សឺណែវ ប្រទេសស្វីស ក្នុងអំឡុងខែកញ្ញា ឆ្នាំ២០១៩នេះ ដោយមានតំណាងស្ថានបេសកកម្មអចិន្ត្រៃយ៍កម្ពុជា ចូលរួមផងដែរ។ តាមរយៈលិខិត ដែលចុះនៅថ្ងៃទី១៧ ខែកញ្ញា លោក សម រង្ស៊ី បានរម្លឹកពីអនុសាសន៍របស់អ្នកស្រី រ៉ូណា ស្មីត ដែលជំរុញឲ្យមានការសន្ទនានយោបាយរវាងរដ្ឋាភិបាលកម្ពុជានិងក្រុមប្រឆាំង។
លោក សម រង្ស៊ី សរសេរក្នុងលិខិតដូច្នេះថា៖«គណបក្សសង្គ្រោះជាតិ ប្តេជ្ញាថា នឹងធ្វើជាដៃគូដ៏មានប្រយោជន៍បំផុត និងអនុវត្តឲ្យបានពេញលេញ នូវអនុសាសន៍របស់អ្នករាយការណ៍ពិសេស ដើម្បីបង្កើតស្មារតីនៃការសន្ទនា ការផ្សះផ្សា និងវប្បធម៌នយោបាយថ្មី ដោយផ្តោតលើបញ្ហារួម ការបើកចំហចំពោះមតិផ្សេងគ្នា សិទ្ធិបញ្ចេញមតិ និង ការធានាពីប្រយោជន៍របស់ប្រជាជនកម្ពុជាគ្រប់រូប»។
ដ្បិតពុំបានប្រតិកម្មនឹងលិខិតរបស់លោក សម រង្ស៊ី តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ធ្លាប់អះអាងថា អតីតគណបក្សប្រឆាំង ត្រូវបានរំលាយចោលហើយ ហើយមេដឹកនាំ ក៏កំពុងស្ថិតនៅក្នុងនីតិវិធីរបស់តុលាការ ដូច្នេះ គ្មានតួនាទី មកចរចាឡើយ។ លោក សរសេរក្នុងបណ្តាញទំនាក់ទំនងតេឡេក្រាម កាលពីថ្ងៃទី១៧ ខែកញ្ញា ថា៖«ជំហរជាក់លាក់របស់រាជរដ្ឋាភិបាលកម្ពុជា គឺគ្មានការចរចាណាមួយជាមួយក្រុមជនក្បត់ជាតិ និងគ្មានការលើកលែងទោសឲ្យក្រុមនេះជាដាច់ខាត»។
អ្នកនាំពាក្យគណបក្សកាន់អំណាច បន្តសរសេរនៅថ្ងៃទី១៨ ខែកញ្ញា ទៀតថា៖«បញ្ហាបានកើតឡើង ដោយសារក្រុមឧទ្ទាមក្រៅច្បាប់រត់ចោលស្រុក។ ក្រុមនេះ បានបង្កើតបញ្ហាជាបន្តបន្ទាប់ ដូចជា សម្លាប់វប្បធ៌មសន្ទនា វាយប្រហារមកលើឯកជនភាពថ្នាក់ដឹកនាំគណបក្សប្រជាជនកម្ពុជា ញុះញង់ដុតកំហឹងកងទ័ព និងកម្មករឲ្យបះបោរប្រឆាំងរាជរដ្ឋាភិបាលកម្ពុជា។ ដល់អស់ផ្លូវរត់ បែរជាមករកសុំចរចាទៅវិញ»។
ខ្លឹមសារក្នុងលិខិតរបស់លោក សម រង្ស៊ី ហាក់ខុសពីគោលជំហរបស់លោក ដែលតែងប្រកាសផ្ទាល់មាត់ជារឿយៗថា លោក មិនអាចចរចាជាមួយគណបក្សកាន់អំណាច ឬសម្តេចនាយករដ្ឋមន្ត្រី ហ៊ុន សែន ដូចលើកមុនៗឡើយ។ លោក ប្រកាសក្តែងៗថា លោក នឹងដឹកនាំកម្លាំង ចូលមកកម្ពុជា ដើម្បីធ្វើឲ្យមានការផ្លាស់ប្តូរ។ ទន្ទឹមនេះ លោក ថែមទាំងអំពាវនាវឲ្យកងកម្លាំងប្រដាប់អាវុធ ផ្តាច់ខ្លួនចេញពីរដ្ឋាភិបាល ហើយងាកទៅចូលរួមជាមួយលោក៕
© រក្សាសិទ្ធិដោយ thmeythmey.com