អន្តរជាតិ
ការស្ទង់មតិ៖ ប្រជាជនហ្វីលីពីន នៅតែពេញចិត្តសង្គ្រាមគ្រឿងញៀនរបស់លោក ឌូទើតេ រូបភាព (malaysiakini)
× ប្រជាពលរដ្ឋហ្វីលីពីនពេញចិត្តយ៉ាងខ្លាំងចំពោះយុទ្ធនាការរបស់លោកប្រធានាធិបតី រ៉ូឌ្រីហ្គោ ឌូទើតេ ក្នុងការធ្វើសង្គ្រាមប្រឆាំងនឹងគ្រឿងញៀន ខណៈពេលសហគមន៍អន្តរជាតិបន្តជំរុញឲ្យមានការស៊ើបអង្កេតលើឃាតកម្មជាប្រព័ន្ធដោយក្រុមប៉ូលិសនោះ។ នេះបើផ្អែកទៅតាមការស្រាវជ្រាវរបស់វិទ្យាស្ថាន Social Weather Stations ឬ SWS ។
ក្នុងការស្ទង់ការមតិប្រចាំត្រីមាសដែលចូលរួមដោយប្រជាជនហ្វីលីពីនចំនួន១២០០នាក់ ៨២ភាគរយពេញចិត្តយ៉ាងខ្លាំងលើយុទ្ធនាការរយៈបីឆ្នាំប្រឆាំងនឹងគ្រឿងញៀនកន្លងមកនេះ ព្រោះបទឧក្រិដ្ឋ និងគ្រឿងញៀនតិចជាងមុន។ ចំណែកចំនួន១២ ភាគរយ គឺមិនពេញចិត្តឡើយ ព្រោះការជួញដូរគ្រឿងញៀននៅតែដដែល ហើយមានមនុស្សជាច្រើនត្រូវបានសម្លាប់។ សម្រាប់ចំនួន ៦ភាគរយចុងក្រោយគឺពួកគេមិនបានសម្រេចចិត្តបោះឆ្នោតឡើយ។ នេះបើផ្អែកទៅតាមការស្ទង់មតិរបស់វិទ្យាស្ថាន Social Weather Stations ។
ការបញ្ចេញនូវការស្ទង់មតិមួយនេះ គឺត្រូវបានធ្វើឡើងតែពីថ្ងៃប៉ុណ្ណោះ បន្ទាប់ពីប្រធានាធិបតី ឌូទើតេ បដិសេធទទួលជំនួយពីក្រុមប្រទេសទាំង១៨ នៃសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ។ ក្នុងចំណោមប្រទេសទាំងនោះ មានប្រទេសបីដូចជាអេស្ប៉ាញ អង់គ្លេស និងអូស្ត្រាលី បានគាំទ្រសេចក្តីសម្រេចឲ្យការស៊ើបអង្កេតការបង្ក្រាបនៅហ្វីលីពីន។
តាមការបកស្រាយរបស់មន្ត្រីប៉ូលិសលើសង្គ្រាមគ្រឿងញៀនកន្លងមក ជនសង្ស័យជួញដូរគ្រឿងញៀនច្រើនជាង៦,៧០០នាក់ ត្រូវបានសម្លាប់ បន្ទាប់ពីពួកគេបដិសេធមិនឲ្យចាប់ខ្លួន។ ប៉ូលិសហ្វីលីពីន ក៏បានបដិសេធថា មិនបានពាក់ព័ន្ធទៅនឹងការសម្លាប់អ្នកប្រើប្រាស់គ្រឿងញៀនដោយសម្ងាត់ជាច្រើនពាន់នាក់ឡើយ។ ប៉ុន្តែប៉ូលិសហ្វីលីពីនក៏បានបដិសេធផងដែរ ពីការចោទប្រកាន់របស់ក្រុមសិទ្ធិមនុស្សពាក់ព័ន្ធបំផ្លាញភស្តុតាង ការបង្កើតព័ត៌មានមិនពិត និងរូបភាពឧក្រិដ្ឋកម្មជាដើម។
ក្នុងន័យចំអកឲ្យសហគមន៍អន្តរជាតិ លោក Salvador Panelo អ្នកនាំពាក្យប្រធានាធិបតី ឌូទើតេ នៅថ្ងៃទី២៣ ខែកញ្ញា បានគូសបញ្ជាក់ថា ប្រសិនវាជាការំលោភបំពានសិទ្ធិមនុស្ស នោះប្រជាជនក្នុងប្រទេសហ្វីលីពីន នឹងប្រឆាំងនឹងរដ្ឋបាលមួយនេះមិនខាន ព្រោះប៉ូលិសមិនមែនចេះតែធ្វើការសម្លាប់មនុស្សតាមតែចិត្តឯងឡើយ ហើយវាក៏មិនអាចទៅរួចដែរ។ លោកក៏បានអំពាវនាវឲ្យសហគមន៍អន្តរជាតិមើលទៅលើលទ្ធផលនៃការស្ទង់មតិដែរ ហើយសហគមន៍អន្តរជាតិគួរតែយល់ពីបញ្ហានេះ។
រដ្ឋាភិបាលហ្វីលីពីន បដិសេធមិនឲ្យមានការស៊ើបអង្កេតពីខាងក្រៅលើសំណុំរឿងគ្រឿងញៀននេះឡើយ ព្រោះវាធ្វើឲ្យមានភាពអយុត្តិធម៌ និងបង្កឲ្យមានការញុះញង់។ ក្នុងខែកក្កដា សមាជិកទាំង៤៧ នៃក្រុមប្រឹក្សាសិទ្ធិមនុស្ស បានយល់ព្រមលើសេចក្តីសម្រេចឲ្យមានការស៊ើបអង្កេតគ្រប់ជ្រុងជ្រោយមួយនៅក្នុងប្រទេសហ្វីលីពីន ប៉ុន្តែរដ្ឋមន្ត្រីក្រសួងការបរទេសហ្វីលីពីនបានបដិសេធ។
សូមបញ្ជាក់ថា កាលពីឆ្នាំមុនលោក ឌូទើតេ បាននាំហ្វីលីពីនចេញពីសមាជិកនៃតុលាការព្រហ្មទណ្ឌអន្តរជាតិ បន្ទាប់ពីតុលាការមួយនេះបានស៊ើបអង្កេតលើសង្គ្រាមប្រឆាំងនឹងគ្រឿងញៀននៅហ្វីលីពីន៕
© រក្សាសិទ្ធិដោយ thmeythmey.com