កសិករជាង១០០គ្រួសារនៅខេត្តកំពង់ធំ ផ្គត់ផ្គង់បន្លែសុវត្ថិភាពបាន១៧តោនក្នុងមួយថ្ងៃ

ជាតិ

កសិករជាង១០០គ្រួសារនៅខេត្តកំពង់ធំ ផ្គត់ផ្គង់បន្លែសុវត្ថិភាពបាន១៧តោនក្នុងមួយថ្ងៃ

24, Sep 2019 , 9:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ជារៀងរាល់ថ្ងៃកសិករចំនួន១១៣គ្រួសារ នៅក្នុងខេត្តកំពង់ធំ អាចផ្គត់ផ្គង់បន្លែសុវត្ថិភាពនៅទីផ្សារ បាន១៧តោន។ កសិករទាំងនោះ ក្រៅពីផ្គត់ផ្គង់នៅក្នុងខេត្តកំពង់ធំហើយ បន្លែសុវត្ថិភាពទាំងនេះ ក៏កំពុងផ្គត់ផ្គង់ទៅកាន់ទីផ្សារក្នុងខេត្តសៀមរាប ខេត្តព្រះវិហារ និងរាជធានីភ្នំពេញ ផងដែរ។ នេះបើតាមលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ដែលបានប្រាប់សារព័ត៌មានថ្មីៗតាមទូរសព្ទ នាថ្ងៃទី២៤កញ្ញានេះ។

លោក ប៉ែន វណ្ណរិទ្ធ ឲ្យដឹងទៀតថា ប្រជាកសិករបានផ្គត់ផ្គង់បន្លែសុវត្ថិភាពទាំងនេះ ទៅឱ្យម្ចាស់សណ្ឋាគារ ផ្សារទំនើបផ្សេងៗ និងមានមួយចំនួនតូច លក់នៅលើទីផ្សារធម្មតា។ លោក ប៉ែន វណ្ណរិទ្ធ បានបញ្ជាក់ប្រាប់សារព័ត៌មានថ្មីៗបន្តទៀតថា បន្លែដែលកសិករផ្គត់ផ្គង់នៅលើទីផ្សារបានមានត្រសក់ ត្រប់ ស្ពៃ ម្រះ សាឡាត...ជាដើម ប៉ុន្តែលើកលែងប្រភេទបន្លែមួយចំនួន ដូចជាខ្លឹមបារាំង ដំឡូងបារាំង ការ៉ុត ស្ពៃក្តោប ដែលកសិករក្នុងខេត្តនេះ មិនអាចដាំបាន។

សូមជម្រាបថា ក្នុងចំណោមកសិករទាំងជាង ១០០គ្រួសារដែលដាំបន្លែសុវត្ថិភាពនេះ មាន ៣០គ្រួសារ រស់នៅក្នុងស្រុកបារាយណ៍ និង៨៣គ្រួសារទៀត រស់នៅនៅស្រុកកំពង់ស្វាយ។ បើតាមលោក ប៉ែន វណ្ណរិទ្ធ ក្នុងខេត្តកំពង់ធំ មានតែស្រុកទាំងពីនេះប៉ុណ្ណោះ ដែលអាចផ្គត់ផ្គង់បន្លែសុវត្ថិភាពបាន៕