អន្តរជាតិ
តុលាការកំពូលអង់គ្លេស ទាត់ចោលការព្យួរសភារបស់នាយករដ្ឋមន្ត្រី ចនសុន រូបភាព AFP
× តុលាការកំពូលអង់គ្លេស នៅថ្ងៃទី២៤ ខែកញ្ញា បានហៅការសម្រេចចិត្តផ្អាកកិច្ចប្រជុំសភារបស់នាយករដ្ឋមន្ត្រី បូរីស ចនសុន ជារឿងមិនស្របច្បាប់ ហើយអនុញ្ញាតឲ្យសភាបើកប្រជុំរបស់ខ្លួនបានធម្មតា។
នាយករដ្ឋមន្ត្រីអង់គ្លេស បូរីស ចនសុន រងបរាជ័យជាថ្មីម្ដងទៀត ដោយលើកនេះនៅឯស្ថាប័នតុលាការវិញម្ដង។ ដោយសំឡេងឯកច្ឆន្ទ តុលាការកំពូលចក្រភពអង់គ្លេស នៅថ្ងៃទី២៤ ខែកញ្ញា ប្រកាស «ទុកជាមោឃ និងគ្មានអំណាចអនុវត្ត» នូវការសម្រេចចិត្តរបស់លោក ចនសុន ដែលប្រកាសព្យួរកិច្ចប្រជុំសភារយៈពេលវែងកាលពីខែដើមនេះ។
ការប្រកាសផ្អាកកិច្ចប្រជុំរបស់សភារយៈពេលវែងនេះ ធ្វើឲ្យមានការរិះគន់យ៉ាងខ្លាំង ព្រោះវាធ្វើឡើងស្របពេលដែលពេលវេលាអង់គ្លេសត្រូវដកខ្លួនពីសមាជិកសហភាពអឺរ៉ុបកាន់តែខិតជិតដល់ គឺនៅថ្ងៃទី៣១ ខែតុលាខាងមុខ។ លោក ចនសុន រងពាក្យចោទប្រកាន់ថា ផ្អាកប្រជុំសភាដើម្បីបិទផ្លូវសភាពីការរារាំងការចាកចេញដោយគ្មានកិច្ចព្រមព្រៀង។
បណ្ដឹងប្រឆាំងការសម្រេចចិត្តរបស់លោក ចនសុន ក៏ឡើងដល់តុលាការតែម្ដង។ ក្នុងសវនាការថ្ងៃទី២៤ ខែកញ្ញា ប្រធានអង្គជំនុំជំរះ Brenda Hale ប្រកាសថា៖ «តុលាការសន្និដ្ឋានថា ការសម្រេចចិត្តស្នើមហាក្សត្រិយឲ្យព្យួរកិច្ចប្រជុំសភា ជារឿងមិនត្រូវតាមច្បាប់។ តុលាការកំពូលអង់គ្លេសបន្តថា សភាទាំងពីរ អាចបើកកិច្ចប្រជុំបានភ្លាមៗ។
បើតាមទីភ្នាក់ងារព័ត៌មាន AFP ប្រធានរដ្ឋសភា John Bercow ប្រកាសថា សភានឹងកោះប្រជុំដោយគ្មានការពន្យារពេលឡើយ ដោយលោកនឹងជជែកជាមួយមេដឹកនាំនយោបាយនានាពីការកោះប្រជុំនេះ។ ដោយឡែក មេបក្សប្រឆាំង ជេរេមី ខប៊ីន វិញ បានស្នើឲ្យលោក ចនសុន លាលែងចេញពីតំណែង ហើយក្លាយជានាយករដ្ឋមន្ត្រីកាន់តំណែងខ្លីជាងគេក្នុងប្រវត្តិសាស្ត្រវិញ៕
Tag:
Brexit
អង់គ្លេស
បូរីស ចនសុន
© រក្សាសិទ្ធិដោយ thmeythmey.com