ជាតិ
សុខភាព
អ្វីជាអេឡិចត្រូលីត្រ? ប្រភពដ៏ប្រសើររបស់វាមានអ្វីខ្លះ?
× អេឡិចត្រូលីត្រ គឺជាសារធាតុចិញ្ចឹមដ៏សំខាន់ ហើយចាំបាច់ណាស់ក្នុងការរក្សាបាននូវតុល្យភាព pH និងជាតិទឹកត្រឹមត្រូវក្នុងរាងកាយ។ តុល្យភាព ឬកង្វះជាតិអេឡិចត្រូលីត្របង្កបញ្ហាចំពោះសាច់ដុំគួរឱ្យព្រួយបារម្ភជាច្រើន រួមទាំងអាការៈអស់កម្លាំង រមួលសាច់ដុំ ឬរមួលក្រពើ ស្ពឹក និងចង្វាក់បេះដូងលោតខុសប្រក្រតី។ អេឡិចត្រូលីត្រដែលសំខាន់ៗសម្រាប់រាងកាយ រួមបញ្ចូលទាំងជាតិប៉ូតាស្យូម សូដ្យូម ម៉ាញ៉េស្យូម កាល់ស្យូម ក្លរ និងផូស្វ័រ។ ហើយអ្នកកំពុងខ្វល់ចិត្តមិនដឹងថាតើអាហារណាខ្លះជាប្រភពធម្មជាតិនៃអេឡិចត្រូលីត្រមែនទេ?
កុំបារម្ភ! ខាងក្រោមនេះយើង នឹងបង្ហាញឱ្យដឹង ពីប្រភពធម្មជាតិដ៏ប្រសើរនៃជាតិអេឡិចត្រូលីត្រ ៖
១. ផ្លែចេក
ផ្លែឈើនេះមានផ្ទុកសម្បូរទៅដោយវីតាមីន សារធាតុចិញ្ចឹម រួមទាំងអេឡិចត្រីលីត្រ។ ចេកក៏ជាប្រភពដ៏ប្រសើរនៃប៉ូតាស្យូម ម៉ាញ៉េស្យូម ម៉ង់កាណែស វីតាមីន B6 ជាតិសសៃ វីតាមីន C វីតាមីន A ប្រូតេអ៊ីន ជាតិដែកដែលសុទ្ធសឹងតែជាសារធាតុចិញ្ចឹមចាំបាច់សម្រាប់ទ្រទ្រង់រក្សាសុខភាពរាងកាយ។
២. អង្ករសម្រូប
ជាប្រភពដ៏ប្រសើរនៃសារធាតុចិញ្ចឹម និងអេឡិចត្រូលីត្រធម្មជាតិ។ អង្ករសម្រូបមានផ្ទុកជាតិកាឡូរីទាប ប៉ុន្តែសម្បូរទៅដោយជាតិម៉ាញ៉េស្យូម ផូស្វ័រ ម៉ង់កាណែស ទង់ដែង សេលេញ៉ូម និងវីតាមីន B3។ វាក៏មានជាតិសរសៃខ្ពស់ផងដែរ ហើយជាតិខ្លាញ់ ឬប្រេងក្នុងអង្ករសម្រូបអាចជួយកាត់បន្ថយកម្រិតនៃកូឡេស្តេរ៉ូលបានយ៉ាងប្រសើរ។
៣. ទឹកដូង
ទឹកដូង គឺប្រសើរណាស់សម្រាប់សុខភាព ហើយក៏ជាប្រភពដ៏ល្អបំផុតមួយនៃជាតិអេឡិចត្រូលីត្រ។ វាដើរតួជាភេសជ្ជៈប៉ូវកម្លាំងបែបធម្មជាតិជួយបន្ថែមថាមពល និងបំពេញជាតិរ៉ែ ក៏ដូចជាអេឡិចត្រូលីត្រដែលបាត់បង់នៅពេលអ្នកបែកញើសច្រើន ឬមានជំងឺគ្រុនក្ដៅ។ ទឹកដូងក៏ជាប្រភពដ៏សម្បូរបែបនៃវីតាមីន B និងសារធាតុប្រឆាំងអុកស៊ីតកម្មដែលធ្វើឱ្យវាមានលក្ខណៈសម្បត្តិប្រឆាំងការរលាកក្នុងរាងកាយ។
៤. ផ្កាខាត់ណាខៀវ
បន្លែបៃតងអាចផ្ដល់ឱ្យអ្នកនូវជាតិអេឡិចត្រូលីត្រសំខាន់ៗ ជាពិសេសប៉ូតាស្យូម។
៥. ស៊ុត
ស៊ុតផ្ដល់ឱ្យរាងកាយនូវអត្ថប្រយោជន៍សុខភាពជាច្រើន ដោយវាមានផ្ទុកសម្បូរទៅដោយជាតិ riboflavin ផូស្វ័រ វីតាមីន B12 choline និងប្រូតេអ៊ីនគុណភាពខ្ពស់។ វាក៏ជាប្រភពដ៏ប្រសើរនៃជាតិរ៉ែចាំបាច់ដូចជា អ៊ីយ៉ូដ និងសេលេស្យូម។ ហើយស៊ុតក៏ជាអាហារដែលមានផ្ទុកសម្បូរទៅដោយជាតិអេឡិចត្រូលីត្រផងដែរ។
៦. ត្រីសាលម៉ុន
មិនត្រឹមតែឆ្ងាញ់ប៉ុណ្ណោះទេ ត្រីសាលម៉ុនមានផ្ទុកសម្បូរទៅដោយជាតិអេឡិចត្រូលីត្រ និងសារធាតុចិញ្ចឹម រួមបញ្ចូលទាំង ម៉ាញ៉េស្យូម ផូស្វ័រ និងកាល់ស្យូម។ វាក៏ជាប្រភពដ៏ប្រសើរអាស៊ីតអាមីណូចាំបាច់ អាស៊ីតខ្លាញ់អូមេហ្គា ៣ ស័ង្កសី ជាតិដែក វីតាមីន A វីតាមីន B6 វីតាមីន D និងវីតាមីន E។ អ្នកជំនាញជាច្រើនណែនាំឱ្យទទួលទានត្រីសាលម៉ុន និងត្រីផ្សេងទៀតយ៉ាងហោចណាស់ ២ ដងក្នងមួយសប្តាហ៍។
៧. ផ្លែបឺរ
ក៏ជាប្រភពដ៏ល្អបំផុតមួយនៃជាតិអេឡិចត្រូលីត្រ ពិសេសជាតិប៉ូតាស្យូមដែលចាំបាច់សម្រាប់សុខភាពសាច់ដុំ។
៨. សារាយសមុទ្រ
ប្រភពដ៏ល្អបំផុតមួយទៀតនៃជាតិអេឡិចត្រូលីត្រ ពិសេសកាល់ស្យូម គឺសារាយសមុទ្រ។ ដូច្នេះកុំភ្លេចបន្ថែមសារាយសមុទ្រក្នុងរបបអាហារប្រចាំថ្ងៃរបស់អ្នកដើម្បីរក្សាបាននូវសុខភាពសាច់ដុំនិងឆ្អឹងល្អប្រសើរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com