រដ្ឋបាលរាជធានីភ្នំពេញ ប្រាប់ពលរដ្ឋឲ្យប្រុងប្រយ័ត្នករណីអគ្គិភ័យក្នុងអំឡុងភ្ជុំបិណ្ឌ

ជាតិ

សង្គមជាតិ

រដ្ឋបាលរាជធានីភ្នំពេញ ប្រាប់ពលរដ្ឋឲ្យប្រុងប្រយ័ត្នករណីអគ្គិភ័យក្នុងអំឡុងភ្ជុំបិណ្ឌ

25, Sep 2019 , 3:59 pm

រូបភាព

ដោយ: ថ្មីៗ

ភ្នំពេញ៖ រដ្ឋបាលរាជធានីភ្នំពេញ បានអំពាវនាវឲ្យប្រជាពលរដ្ឋដែលនឹងចាកចេញពីផ្ទះទៅស្រុកកំណើតរបស់ខ្លួន ត្រូវមានសា្មរតីប្រុងប្រយ័ត្នខ្ពស់ ចំពោះករណីអគ្គិភ័យដែលអាចកើតឡើងជាយថាហេតុ នៅក្នុងអំឡុងពេលបុណ្យភ្ជុំបិណ្ឌ។

សេចក្តីជូនដំណឹងរបស់រដ្ឋបាលរាជធានីភ្នំពេញ ស្នើដូច្នេះ៖«បងប្អូនប្រជាពលរដ្ឋត្រូវមានម្ចាស់ការ និងប្រុងប្រយ័ត្នខ្ពស់ ចំពោះដើមចមដែលបណ្តាលឲ្យមានករណីអគ្គិភ័យ ដែលមានដូចជាភ្លើងចង្កៀង ភ្លើងចង្ក្រាន ទៀន ធូប ការដុតសំរាម ការដុតព្រៃ ការបោះចោលកន្ទុយបារីផ្តេសផ្តាស ការភ្ជាប់ ឬប្រើប្រាស់ចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះ ឬងាយផ្ទុះឆេះ។ល។ ដោយមុននឹងចេញទៅណាត្រូវពិនិត្យឲ្យបានល្អិតល្អន់ ដើម្បីបង្ការកុំឲ្យមានករណីអគ្គិភ័យកើតឡើង និងរាលដាលដល់ផ្ទះដទៃ ដែលនាំឲ្យបាត់បង់ទ្រព្យសម្បត្តិផ្ទះសម្បែង និងបាត់បង់អាយុជីវិត»។

សេចក្តីជូនដំណឹងនេះ ធ្វើឡើងដោយសារតែរដ្ឋបាលរាជធានីភ្នំពេញសង្កេតឃើញថា អគ្គិភ័យច្រើនតែកើតឡើងនៅរាជធានីភ្នំពេញ។ ជាក់ស្តែងតាំងតែពីដើមឆ្នាំឆ្នាំ២០១៩មក មានអគ្គិភ័យកើតឡើងចំនួន៥៣៤ករណីនៅក្នុងភូមិសាស្ត្ររាជធានីភ្នំពេញ ដែលបណ្តាលឲ្យមនុស្សចំនួន១៧នាក់ស្លាប់ និងរង១៥០នាក់របួស ។

ទន្ទឹមនឹងនេះ រដ្ឋបាលរាជធានីភ្នំពេញ ក៏បានប្រាប់ឲ្យអាជ្ញាធរមូលដ្ឋាន និងកងកម្លាំងមានសមត្ថកិច្ចទាំងអស់ ត្រៀមរៀបចំ និងរកមធ្យោបាយបង្ការទប់ស្កាត់អគ្គិភ័យ ដែលកើតមានជាយថាហេតុ ក្នុងមូលដ្ឋានរបស់ខ្លួនឲ្យបានគ្រប់គ្រាន់ នៅក្នុងអំឡុងបុណ្យកាន់បិណ្ឌ និងបុណ្យភ្ជុំបិណ្ឌនេះ៕