អន្តរជាតិ
នយោបាយអន្តរជាតិ
ប្រមុខការទូតចិន៖ ចិន គ្មានបំណងប្រើយុទ្ធសាស្ត្រ Game of Thrones ដើម្បីយកឈ្នះអាមេរិកឡើយ រូបភាព (Reuters)
× ប្រមុខការទូតចិនលោក វ៉ាង យី នៅថ្ងៃទី២៤ ខែកញ្ញា បានឆ្លើយតបទៅនឹងការរិះគន់របស់អាមេរិកលើរបៀបរកស៊ីរបស់ចិនថា ចិនគ្មានបំណងចង់ប្រើយុទ្ធសាស្ត្រដូចក្នុងរឿង Game of Thrones នៅលើឆាកអន្តរជាតិឡើយ។ លើសពីនេះ លោក វ៉ាង ថែមទាំងព្រមានអាមេរិក កុំចង់គំរាមកំហែងចិន និងកុំចេះដឹងរឿងផ្ទៃក្នុងរបស់ចិនច្រើនពេក។
នៅក្នុងកិច្ចប្រជុំក្រៅផ្លូវការនៅឯអង្គការសហប្រជាជាតិ ទីក្រុងញូវយ៉ក លោក វ៉ាង យី រដ្ឋមន្ត្រីការបរទេស និងទីប្រឹក្សារដ្ឋចិន បានជំរុញឲ្យប្រទេសមហាអំណាចសេដ្ឋកិច្ចពិភពលោកអាមេរិក និងចិន ធ្វើកិច្ចសហប្រតិបត្តិការដើម្បីទាញផលប្រយោជន៍សេដ្ឋកិច្ចពីគ្នាទៅវិញមក ជាជាងប្រឈមមុខដាក់គ្នា។
ថ្លែងនៅក្នុងព្រឹត្តិការណ៍រៀបចំដោយក្រុមប្រឹក្សាជំនួញអាមេរិក និងចិន លោក វ៉ាង សង្ឃឹមថា កិច្ចចរចាពាណិជ្ជកម្មរវាងអាមេរិក និងចិននាពេលខាងមុខនឹងទទួលបានផលល្អ។ ប៉ុន្តែប្រមុខការទូតចិនរូបនេះក៏បានព្រមានថា កិច្ចចរចាត្រូវតែផ្អែកលើកការគោរពគ្នាទៅវិញទៅមក និងមិនត្រូវស្ថិតនៅក្រោមការគំរាមកំហែងឡើង។ នេះតាមការចុះផ្សាយរបស់ទូរទស្សន៍ Channel News Asia។
«ចិនមិនមានចេតនាប្រើយុទ្ធសាស្ត្រដូចក្នុងរឿង Game of Throne នៅលើឆាកអន្តរជាតិទេ។ សម្រាប់ពេលបច្ចុប្បន្ន និងពេលអនាគត អាមេរិកគឺជាប្រទេសខ្លាំងជាងគេបំផុតក្នុងពិភពលោក»។ នេះជាការលើកឡើងរបស់លោក វ៉ាង ដោយបន្តថា ចិនគ្មានបំណងចង់ឈ្នះអាមេរិក ធ្វើជាមេដឹកនាំពិភពលោកនោះទេ ព្រោះវាមិនមែនចរិតរបស់ចិនឡើយក្នុងការស្វែងរកនូវអនុត្តរភាពនិយម ហើយចិន គឺជាប្រទេសកំពុងអភិវឌ្ឍ ហើយនៅពីក្រោយអាមេរិកឆ្ងាយណាស់។
បន្ថែមពីលើនេះ ប្រមុខការទូតចិនទទូចឲ្យភាគីទាំងពីរប្រកាន់នូវគោលការណ៍មិនជ្រៀតជ្រែកកិច្ចការផ្ទៃក្នុងគ្នា គោរពដែនអធិបតេយ្យភាពគ្នា និងមិនដាក់ទណ្ឌកម្មលើគ្នាទៅវិញទៅមក។ ច្បាស់ណាស់ថា ដោយលើកឡើងបែបនេះ លោក វ៉ាង គឺចង់សំដៅទៅលើបញ្ហាហុងកុង ព្រោះកន្លងមកអាមេរិកតែងតែនិយាយ និងជ្រែតជ្រៀតបញ្ហានៅលើដែនដីមួយនេះ ក៏ដូចជាបញ្ហានៅស៊ីនជាំងផងដែរ។
សូមបញ្ជាក់ថា ការលើកឡើងរបស់លោក វ៉ាង យីបែបនេះ បានធ្វើឡើងបន្ទាប់ពីប្រធានាធិបតី ដូណាល់ ត្រាំ បាននិយាយនៅក្នុងមហាសន្និបាទអង្គការសហប្រជាជាតិថា អាមេរិកនឹងមិនទទួលនូវកិច្ចព្រមព្រៀងអាក្រក់មួយ ដែលកើតចេញពីការចរចាពាណិជ្ជកម្មឡើយ។ លោកត្រាំ ថែមទាំងព្រមានថា ពិភពលោកទាំងមូលកំពុងមើល ថាតើចិនដោះស្រាយបញ្ហាហុងកុងដោយរបៀបណា៕
Tag:
ចិន
វ៉ាង យី
អាមេរិក
© រក្សាសិទ្ធិដោយ thmeythmey.com