ជាតិ
បទយកការណ៍ / បទសម្ភាសន៍
អ្នកនិពន្ធ ប៊ុន ចាន់និមល៖«ចង់រីកចម្រើន, ចង់ផ្លាស់ប្ដូរជីវិត សូមជ្រើសរើសសៀវភៅអានឲ្យត្រូវនឹងខ្លួនឯង»
× ភ្នំពេញ៖ ធ្លាប់បាក់ទឹកចិត្ត ធ្លាប់គិតសម្លាប់ខ្លួន ប៉ុន្តែ ក្រោយអានសៀវភៅជាច្រើនក្បាល បានធ្វើឲ្យអ្នកស្រី ប៊ុន ចាន់និមល អាចផ្លាស់ប្ដូរជីវិតខ្លួនឯង។ ក្នុងបទសម្ភាសជាមួយសារព័ត៌មានថ្មីៗ អ្នកស្រី ប៊ុន ចាន់និមល បញ្ជាក់ថា៖«ខ្ញុំបានយកចំណុចពិសេស និងពាក្យគន្លឹះក្នុងសៀវភៅមកអនុវត្តសម្រាប់ជីវិតសព្វថ្ងៃ»។ សម្រាប់អ្នកនិពន្ធខ្សែភាពយន្ត និងជាម្ចាស់ផលិតកម្មសាស្ត្រ រូបនេះ ចាត់ទុកសៀវភៅ ជាវត្ថុដ៏មានតម្លៃ, ជាមិត្តដ៏ជិតស្និត និងជាគ្រូ បន្ទាប់ពីឪពុកម្ដាយ និងគ្រួសារ។ ប្រសិនជា ចង់ជោគជ័យលឿន អ្នកស្រី ចាន់និមល ជំរុញឲ្យអានសៀវភៅទៅតាមអ្វីដែលយើងកំពុងធ្វើ និងអ្វីដែលយើងចង់បាន។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយអ្នកស្រី ប៊ុន ចាន់និមល ម្ចាស់ផលិតកម្មសាស្ត្រា ដូចតទៅ៖
សុភាសិតខ្មែរពោលថា «អានច្រើន កើនប្រាជ្ញា» ជាសុភាសិតដែលត្រឹមត្រូវចំពោះអ្នកចូលចិត្តអានសៀវភៅ ហើយទទួលបានប្រយោជន៍ពីសៀវភៅ។ ចំពោះអ្នកស្រី ប៊ុន ចាន់និមល ការអានសៀវភៅ ពិតជាសំខាន់ ព្រោះរាល់ពេលដែលអ្នកស្រីជួបឧបសគ្គ ដោយងាកមកអានសៀវភៅ គឺគ្រប់យ៉ាងជាដំណោះស្រាយ។
អ្នកនិពន្ធខ្សែភាពយន្ត ប៊ុន ចាន់និមល រៀបរាប់ថា ការអានសៀវភៅ មិនមែនអានដើម្បីតែចាំនោះទេ ប៉ុន្តែ អានដើម្បីយកគន្លឹះ។ អ្នកនិពន្ធវ័យ៣០ឆ្នាំរូបនេះ ចូលចិត្តអានសៀវភៅតាំងពីចូលរៀនថ្នាក់ទី៧ ដោយផ្ដើមអានប្រភេទរឿងប្រលោមលោក។ មកដល់បច្ចុប្បន្ននេះ អ្នកស្រី ប៊ុន ចាន់និមល នៅតែបន្តអានសៀវភៅជាប្រចាំ ដោយមួយសប្ដាហ៍ អ្នកស្រីអានចប់មួយក្បាល។
បើតាមអ្នកស្រី ប៊ុន ចាន់និមល សៀវភៅដែលលើកទឹកចិត្តអ្នកស្រីជាងគេ គឺសៀវភៅចំណងជើង «ហេរ៉ូ» ។ អ្នកស្រី បញ្ជាក់បន្ថែមថា អានសៀវភៅ ក៏ត្រូវជ្រើសរើសប្រភេទសៀវភៅសម្រាប់អានឲ្យត្រូវនឹងខ្លួនឯងផងដែរ។ អ្នកស្រី និមល បានចែករំលែកការជ្រើសរើសសៀវភៅសម្រាប់អានយ៉ាងដូច្នេះ៖«ដំបូង សួរខ្លួនឯងថាខ្លួនឯងកំពុងធ្វើអ្វី ចង់បានអ្វី។ ប្រសិនបើជា និស្សិតត្រូវរកសៀវភៅណាដែលត្រូវនឹងអ្វីយើងរៀន, ប្រសិនបើជា អ្នកជំនួញត្រូវអានសៀវភៅថ្នាក់ដឹកនាំ ឬប្រភេទរកស៊ី»។
មនុស្សមួយចំនួន គិតថាការអានសៀវភៅជាការធុញទ្រាន់ ប៉ុន្តែ សម្រាប់អ្នកស្រី និមល ការអានសៀវភៅមិនបានធ្វើឲ្យអារម្មណ៍ធុញទ្រាន់ទេ តែវានាំនូវភាពសប្បាយនិងចំណេញច្រើន។ ជារៀងរាល់ ថ្ងៃមុនពេលចូលគេង អ្នកស្រីក៏បានចំណាយពេលអានសៀវភៅកន្លះម៉ោងផងដែរ៕
«សៀវភៅ គឺសំខាន់ខ្លាំង ប្រសិនបើជា ចង់ជោគជ័យលឿន, ចង់រីកចម្រើន វាអាស្រ័យលើការខិតខំប្រឹងប្រែង និងការតាំងចិត្ត។ សៀវភៅ ជាវត្ថុមួយមានតម្លៃ ដែលជួយជំរុញឲ្យយើងដើរទៅរកផ្លូវត្រឹមត្រូវ និងមានឱកាសរីកចម្រើនសមត្ថភាពខ្លួនឯង»។ នេះជាការរៀបរាប់បន្ថែមរបស់អ្នកនិពន្ធខ្សែភាពយន្ត ប៊ុន ចាន់និមល៕
Tag:
អានសៀវភៅ
អ្នកនិពន្ធ
ប៊ុន ចាន់និមល
© រក្សាសិទ្ធិដោយ thmeythmey.com