ជាតិ
សេដ្ឋកិច្ច
ប្រទេសហូឡង់ផ្ដល់មូលនិធិ ៥លានដុល្លារ ជួយកសិករផលិតស្រូវសរីរាង្គនៅមណ្ឌលគិរី
×![]()
ភ្នំពេញ៖ គម្រោងឈ្មោះថា«រាយស៍ថេក» (RiceTechCambodia) ត្រូវបានភាគីពាក់ព័ន្ធចុះហត្ថលេខា និងសម្ពោធនៅថ្ងៃទី២៥ខែកញ្ញា។ នេះជាគម្រោងមានរយៈពេល៥ឆ្នាំ ដែលផ្ដួចផ្ដើមឡើងក្នុងគោលបំណងលើកកម្ពស់ការចិញ្ចឹមជីវិតរបស់កសិករខ្នាតតូច ដោយជួយពួកគេឲ្យទទួលបានវិញ្ញាបនបត្រស្រូវសរីរាង្គ បង្កើនផលិតភាព ពង្រឹងទិន្នផលស្រូវ និងធានាឲ្យបានតម្លៃស្រូវខ្ពស់លក់ក្នុងទីផ្សារអឺរ៉ុប។
ស្រុកកោះញែកខេត្តមណ្ឌលគិរី ជាគោលដៅសម្រាប់អនុវត្តគម្រោងមួយនេះ។ ក្រៅពីសហគមន៍កសិករ ដៃគូគម្រោងផ្សេងទៀតរួមមាន ក្រុមហ៊ុនបញ្ជាទិញ Sanorice ក្រុមហ៊ុននាំចេញអង្ករ AmruRice អង្គការ Oxfam អង្គការ Larive International អង្គការអភិវឌ្ឍន៍ និងភាពជាដៃគូក្នុងសង្គមភាព។
លោក កាន់ គន្ធី អគ្គនាយករងក្រុមហ៊ុន AmruRice បានឲ្យដឹងថា គម្រោងនេះត្រូវបានរដ្ឋាភិបាលប្រទេសហូឡង់ផ្ដល់មូលនិធីប្រមាណ ៥លានដុល្លារ និងត្រូវវិនិយោគទឹកប្រាក់មួយចំនួនទៀតពី AmruRice តាមភាពជាក់ស្ដែង។ គម្រោងនេះនឹងផ្ដោតទៅលើការបណ្ដុះបណ្ដាលពង្រឹងបច្ចេកទេសដល់កសិករ និងកសាងហេដ្ឋារចនាសម្ព័ន្ធ ឃ្លាំងស្តុកឡសម្ងួត ម៉ាស៊ីនកិនស្រូវនៅស្រុកកោះញែក។
បើតាមលោក កាន់ គន្ធី គម្រោងនេះមានគោលដៅគ្របដណ្ដប់កសិករខ្នាតតូច ២៤០០គ្រសារ ដោយក្នុងនោះ ១៣០០គ្រួសារផលិតស្រូវសរីរាង្គ។ លោក គន្ធី រំពឹងថា ស្រូវសរីរាង្គប្រមាណ ២ម៉ឺនតោន នឹងត្រូវបានផលិតក្នុងមួយឆ្នាំចេញពីតំបន់នៃគម្រោងនេះ។ ទាក់ទិននឹងស្រូវសរីរាង្គនេះ លោកបញ្ជាក់ថា កន្លងមក ក្រុមហ៊ុន AmruRice អាចប្រមូលបានស្រូវសរីរាង្គប្រមាណ ២ម៉ឺនតោនពីខេត្តព្រះវិហារ ដោយក្នុងឆ្នាំក្រុមហ៊ុននាំចេញជិត ១ម៉ឺនតោនអង្ករ ដែលស្មើនឹងជាង៨០ភាគរយនៃការនាំចេញអង្ករសរីរាង្គសរុបរបស់កម្ពុជា។ ហើយការផលិតស្រូវទាំងនេះ គឺធ្វើជាម៉ូឌែលកសិកម្មតាមកិច្ចសន្យា។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលចូលរួមជាអធីបតីក្នុងពិធីសម្ពោធគម្រោងរាយស៍ថេកនេះ បានថ្លែងថា នេះជាការបោះជំហានមួយកម្រិតទៀត ក្នុងការជំរុញផលិតកម្មស្រូវសរីរាង្គ និងការកែច្នៃផលិតផលស្រូវសរីរាង្គទៅជាផលិតផលសម្រេច សម្រាប់នាំចេញទៅទីផ្សារអន្តរជាតិ។ ជាមួយគ្នានេះ លោក វេង សាខុន បានសង្កត់ធ្ងន់អំពីស្ថានភាពនៃការប្រកួតប្រជែងក្នុងវិស័យស្រូវអង្ករ យ៉ាងដូច្នេះថា៖«បច្ចុប្បន្ន ការប្រកួតប្រជែងអង្ករសធម្មតានៅលើទីផ្សារអន្តរជាតិមានភាពតឹងរ៉ឹង ពោលគឺកម្ពុជាពិបាកដណ្ដើមទីផ្សារជាមួយវៀតណាម ព្រោះថ្លៃដើមផលិត និងនាំចេញរបស់យើងថ្លៃជាងគេ ដូច្នេះមានតែការផលិតស្រូវអង្ករក្រអូប និងអង្ករគុណភាពខ្ពស់ដូចជា អង្ករសរីរាង្គ និងអង្ករស្ដង់ដារSRP ប៉ុណ្ណោះដែលជួយឲ្យអង្ករកម្ពុជាល្បីលើទីផ្សារអន្តរជាតិ»។
លោក Robert Vreeman ប្រធានក្រុមហ៊ុន SanoRice មានប្រសាសន៍ដូច្នេះថា៖«យើងជំរុញខ្សែសង្វាក់ផ្គត់ផ្គង់ឲ្យកាន់តែប្រសើរឡើង ដោយអនុវត្តវិញ្ញាបនបត្រស្រូវសរីរាង្គ និងវិធីសាស្ត្រតាមដានត្រួតពិនិត្យតាមបែបទំនើបដោយប្រើប្រាស់បច្ចេកវិទ្យាថ្មីដូចជា ប្លុកឆេន ជាដើម។ ការចូលរួមពី SanoRice ក្នុងគម្រោងនេះគឺការធានាទំហំស្រូវនាំចេញ និងតម្លៃខ្ពស់ដល់កសិករ»។
លោកស្រី លឹម សូលីន នាយិកាអង្គការអុកស្វាម ដែលជាដៃគូក្នុងគម្រោងនេះដែរនោះ បានជឿជាក់ថាគម្រោងនេះនឹងផ្ដល់ផលប្រយោជន៍ដល់កសិករ។ លោកស្រីថ្លែងបែបនេះថា៖«អង្គការអុកស្វាមជឿជាក់ថាកសិករខ្នាតតូចសមនឹងទទួលបានផលចំណេញសមរម្យទៅនឹងតម្លៃបន្ថែមក្នុងខ្សែសង្វាក់ផលិតកម្មស្រូវ ហើយទាំងនេះអាចសម្រេចបានតាមរយៈខ្សែសង្វាក់ផលិតកម្មប្រកបដោយបរិយាបន្ន ដែលជំរុញដោយដៃគូទាំងអស់»៕
Tag:
ស្រូវអង្ករ
កោះញែក
មណ្ឌលគិរី
© រក្សាសិទ្ធិដោយ thmeythmey.com
