អន្តរជាតិ
លោក លី សៀនឡុង ធ្លាប់ប្រឡូកខាងយោធាជាង១០ឆ្នាំ មុនឈានជើងចូលក្នុងឆាកនយោបាយ
× ក្រោយពីចូលបម្រើការក្នុងកងកម្លាំងប្រដាប់អាវុធសិង្ហបុរី (SAF) អស់រយៈពេលជាង១ទសវត្សរ៍ លោក លី សៀនឡុង ត្រូវបានជ្រើសរើសជាសមាជិកសភាជាលើកដំបូងក្នុងឆ្នាំ១៩៨៤ ដោយឈ្នះសំឡេងបោះឆ្នោតជាង៨០ភាគរយ។ ៦ឆ្នាំក្រោយមក ពោលគឺនៅខែតុលា ឆ្នាំ១៩៩០ លោក លី បានក្លាយជាឧបនាយករដ្ឋមន្ត្រី និងចុងក្រោយ ក្លាយជានាយករដ្ឋមន្ត្រីសិង្ហបុរី ចាប់តាំងពី២០០៤ មកដល់ពេលបច្ចុប្បន្ន។
កើតក្នុងប្រទេសសិង្ហបុរី នៅថ្ងៃទី ១០ ខែកុម្ភៈ ឆ្នាំ១៩៥២លោក លី សៀនឡុង ជាកូនប្រុសច្បងរបស់អតីតនាយករដ្ឋមន្ត្រីសិង្ហបុរី លោក លី ក្វាងយូ ស្ថាបនិកសិង្ហបុរីទំនើប។ លោក លី បានរៀបការភរិយាទីមួយ គឺលោកស្រី Wong Ming Yang ក្នុងឆ្នាំ១៩៧៨ និងបានលែងលះគ្នាវិញក្នុងឆ្នាំ១៩៨២។ ភរិយាទី២របស់លោក ឈ្មោះថា Ho Ching បានចាប់ផ្តើមរួមរស់ជាមួយគ្នា ចាប់តាំងពីឆ្នាំ១៩៨៥មក។ លោក លី ដែលបច្ចុប្បន្នមានអាយុ ៦៧ឆ្នាំ មានកូនៗ៤នាក់ ដែលក្នុងនោះ កូនស្រីម្នាក់ និងប្រុស៣នាក់។
ស្ថិតក្នុងវ័យសិក្សា លោក លី មានប្រវត្តិជាសិស្សពូកែម្នាក់។ លោក លី សៀនឡុង ទទួលបានការអប់រំកម្រិតថ្នាក់បឋមសិក្សា និងអនុវិទ្យាល័យ នៅសាលា Catholic High School ដែលតម្រូវឲ្យសិស្សានុសិស្សទាំងអស់ ចេះច្បាស់ទាំងភាសាអង់គ្លេស និងចិន (Mandarin) ។ បន្ថែមពីភាសាទាំងពីរនេះ លោក លី ក៏ចេះស្ទាត់ភាសាម៉ាឡេ និងរុស្ស៊ីផងដែរ។
ក្រោយបញ្ចប់ថ្នាក់វិទ្យាល័យ លោក លី សៀនឡុង បានបន្តការសិក្សានៅសាកលវិទ្យាល័យកំពូលរបស់អង់គ្លេស Cambridge ដោយជ្រើសរើសមុខជំនាញគណិតវិទ្យា។ ក្នុងឆ្នាំ១៩៧៤ លោក លី បានបញ្ចប់ការសិក្សាថ្នាក់បរិញ្ញាបត្រនេះ ដោយបានជាប់ជានិស្សិតឆ្នើម (First-Class Honors) ហើយក៏ ទទួលបានសញ្ញាបត្រផ្នែកវិទ្យាសាស្ត្រកុំព្យូទ័រ នៅសាលាដដែលនេះទៀតផង។
(លោក លី សៀនឡុង កាលពេលបញ្ចប់ការសិក្សា នៅសាលា Cambridge)
៤ឆ្នាំក្រោយ ពោលគឺនៅឆ្នាំ១៩៧៨ លោក លី បានចូលហ្វឹកហ្វឺនជានិស្សិតនាយទាហាននៅសាលាបញ្ជាការនិងសេនាធិការកងទ័ពជើងគោកសហរដ្ឋអាមេរិក Fort Leavenworth ។ ក្រោយបញ្ចប់វគ្គហ្វឹកហ្វឺនរយៈពេល១ឆ្នាំមក លោក លី ទទួលបានសញ្ញាបត្រថ្នាក់អនុបណ្ឌិតផ្នែករដ្ឋបាលសាធារណៈ ពីសាកលវិទ្យាល័យ Harvard សហរដ្ឋអាមេរិកក្នុងឆ្នាំ១៩៨០ ។
មុននឹងឈានជើងចូលឆាកនយោបាយ លោក លី សៀនឡុង បានចូលបម្រើយោធាសិង្ហបុរីអស់រយៈពេលជាង១០ឆ្នាំ និងចុងក្រោយ បានសម្រេចចូលនិវត្តន៍ក្នុងឋានៈជាឧត្តមសេនីយ៍ត្រី (ផ្កាយមួយ)។ អំឡុងពេលបម្រើយោធា លោក លី សៀនឡុង បានកាន់តំណែងគ្រាក់ៗចំនួនពីរ ដែលក្នុងនោះមាន ប្រធាននាយកដ្ឋានទទួលបន្ទុករៀបចំផែនការ និងប្រតិបត្តិការចម្រុះ និងមួយទៀតគឺ សេនាធិការកងទ័ពជើងគោកសិង្ហបុរី។
និយាយពីការចូលប្រឡូកក្នុងឆាកនយោបាយ លោក លី សៀនឡុង ត្រូវបានជ្រើសតាំងជាសមាជិកសភាសិង្ហបុរីជាលើកដំបូង ក្នុងចុងឆ្នាំ១៩៨៤ ក្នុងនាមជាសមាជិកម្នាក់មកពីគណបក្សសកម្មភាពប្រជាជន (PAP) ។ ប៉ុន្មានខែក្រោយមក ពោលគឺនៅដើមឆ្នាំ១៩៨៥ លោក លី ត្រូវបានតែងតាំងជាអនុរដ្ឋលេខាធិការក្នុងក្រសួងសំខាន់ចំនួន២ រួមមាន ក្រសួងការពារជាតិ និងក្រសួងឧស្សាហកម្ម និងពាណិជ្ចកម្មរបស់សិង្ហបុរី។ ក្រៅពីនេះតំណែងទាំងនេះ លោក លី ក៏ធ្លាប់កាន់តំណែងជារដ្ឋមន្ត្រីទី២នៃក្រសួងការពារជាតិ, រដ្ឋមន្ត្រីក្រសួងហិរញ្ញវត្ថុ និងរដ្ឋមន្ត្រីឧស្សាហកម្ម និងពាណិជ្ជកម្មផងដែរ។ លោក លី ត្រូវបានតែងតាំងជាឧបនាយករដ្ឋមន្ត្រីសិង្ហបុរី ក្នុងឆ្នាំ១៩៩០ ។
បច្ចុប្បន្ននេះ លោក លី សៀនឡុង គឺជានាយករដ្ឋមន្ត្រីទីបីរបស់សិង្ហបុរី ដែលបានចូលកាន់តំណែងកំពូលនេះ ចាប់តាំងពីឆ្នាំ២០០៤មក ពោលគឺមានរយៈពេលជាង១៥ឆ្នាំមកហើយ។ ក្នុងឆ្នាំ២០០៤ លោក លី បានក្លាយជាអគ្គលេខាធិការបក្សសកម្មភាពប្រជាជន (PAP) ក្រោយពីអតីតនាយករដ្ឋមន្ត្រី លោក Goh Chok Tong បានសម្រេចចុះចេញពីតំណែង ដើម្បីក្លាយជាទេសរដ្ឋមន្ត្រី។ ជាប្រមុខរដ្ឋាភិបាលដ៏វាងវៃ លោក លី បានដឹកនាំបក្សលោកយកជ័យជម្នះក្នុងការបោះឆ្នោតទូទៅចំនួន៣លើកផ្ទួនៗគ្នា រួមមាន ២០០៦, ២០១១ និង២០១៥។ លោក លី បានចាប់ផ្តើមអាណត្តិនាយករដ្ឋមន្ត្រីបច្ចុប្បន្នលោក កាលពីថ្ងៃទី ១៥ ខែមករា ឆ្នាំ២០១៦ និងគ្រោងបញ្ចប់នាឆ្នាំ២០២០ខាងមុខ។
យោងតាមវេបសាយរបស់ការិយាល័យនាយករដ្ឋមន្ត្រីសិង្ហបុរី ចាប់តាំងពីកាន់តំណែងជានាយករដ្ឋមន្ត្រី លោក លី សៀនឡុង បានបង្កើតស្នាដៃជាច្រើនសម្រាប់សុខាមាលភាពប្រជាជន និងប្រជាជាតិសិង្ហបុរី។ លោក បានដាក់ដំណើរការកម្មវិធី SkillsFuture ក្នុងគោលដៅគាំទ្រប្រជាជនសិង្ហបុរីដើម្បីប្រកាន់ខ្ជាប់នូវជំនាញ និងការសិក្សារយៈវែង ។ លើសពីនេះ លោក ក៏បានបង្កើតគំនិតផ្តួចផ្តើម Smart Nation ដែលមានគោលដៅប្រើប្រាស់បច្ចេកវិទ្យាដើម្បីបង្កើតអនាគតនៃការរស់នៅកាន់តែប្រសើរឡើង កាលានុវត្តភាពច្រើនបន្ថែម និងសហគមន៍កាន់រឹងមាំជាងមុន៕
© រក្សាសិទ្ធិដោយ thmeythmey.com