អ្នកស្រី ជិត សាវេត វេចនំអន្សមលាយជាមួយវល្លិ«អញ្ជ័ន»

ជាតិ

បុណ្យភ្ជុំបិណ្ឌ

អ្នកស្រី ជិត សាវេត វេចនំអន្សមលាយជាមួយវល្លិ«អញ្ជ័ន»

27, Sep 2019 , 1:14 pm

រូបភាព

ដោយ: អ៊ូ សុខមាន (OU Sokmean)

រដូវភ្ជុំបិណ្ឌឆ្នាំនេះ អ្នកស្រី ជិត សាវេត បានវេចនំអន្សមចេក-ជ្រូក ដោយមានលាយជាមួយវល្លិ« អញ្ជ័ន»។ មានស្រុកកំណើតនៅភូមិកំពង់ពិល ឃុំវត្តតាមិម ស្រុកសង្កែ បាត់ដំបង ស្ត្រីវ័យ៥៤ឆ្នាំរូបនេះ វល្លិ« អញ្ជ័ន»មានផ្កាពណ៌ស្វាយ ដែលក្រៅពីអាចលាយជាមួយម្សៅ ឬអង្ករ និងរបស់ផ្សេងៗដើម្បីជាពណ៌បាន ផ្កាវល្លិ« អញ្ជ័ន»ក៏ជាថ្នាំបុរាណខ្មែរ សម្រាប់បណ្តេញជាតិពុលក្នុងថ្លើម ព្យាបាលជំងឺក្អក ក្តៅក្នុង និងនោមទាសជាដើម។

នេះជាលើកទីមួយ ដែល អ្នកស្រីសម្រេចចិត្តយកផ្កាវល្លិ«អញ្ជ័ន» ចម្រាញ់ជាទឹក យកមកឆាលាយជាមួយអង្ករដំណើប សម្រាប់វេចនំ ដើម្បីបង្កើនសោភ័ណភាពនំ។ ។ អ្នកស្រីពន្យល់ដូច្នេះ៖«កន្លងមកខ្ញុំយកតែផ្កានេះ ហាលឲ្យស្ងួតទុកឆុងជាតែហូបប្រចាំថ្ងៃសម្រាប់បណ្តេញជាតិពុលក្នុងថ្លើម នោមទាស ក្តៅទឹក និងក្អកតិចតួច។ ខ្ញុំមិនដែលយកផ្កានេះមកលាយសម្រាប់ធ្វើនំចំណីនោះទេ ទើបតែរដូវភ្ជុំឆ្នាំនេះទេ កូនៗឃើញវល្លិផ្កាដុះច្រើនជាងរាល់ឆ្នាំនៅមុខផ្ទះ បានពួកគាត់ចង់ឲ្យខ្ញុំធ្វើនំអន្សមជាមួយទឹកផ្កាវល្លិអញ្ជ័ននេះ» នេះជាការលើកឡើងរបស់អ្នកស្រី ជិត សាវេត ប្រាប់សារព័ត៌មានថ្មីៗតាមបណ្តាញទំនាក់ទំនងសង្គមហ្វេកប៊ុក នាព្រឹកថ្ងៃទី២៧កញ្ញានេះ។

រូប ផ្តល់ដោយ លោក ដិប ចន្ទតារា

អ្នកស្រី បន្ថែមថា នំអន្សមមានរសជាតិឆ្ងាញ់ ឬមិនឆ្ងាញ់ គឺអាស្រ័យលើអ្នកវេច។ ចំណែកឯដែលធ្វើលាយជាមួយផ្កាវល្លិនេះ វាគ្រាន់តែបន្ថែមឲ្យមានពណ៌ស្អាតប្លែកប៉ុណ្ណោះ៕

រូប ផ្តល់ដោយ លោក ដិប ចន្ទតារា៖