អន្តរជាតិ
ចិន អាចបញ្ចេញសព្វាវុធទំនើបស៊េរីចុងក្រោយដើម្បីអបអរខួបទី៧០
× ចិន នឹងប្រារព្ធពិធីខួបទី៧០ ថ្ងៃបង្កើតសាធារណរដ្ឋប្រជាមានិតចិននៅថ្ងៃទី១ ខែតុលាស្អែកនេះ។ ក្បួនព្យុហយាត្រាដ៏ធំមួយ នឹងធ្វើឡើងកណ្ដាលរដ្ឋធានីប៉េកាំង ដើម្បីអបអរថ្ងៃពិសេសនេះ។ អ្វីដែលគេរង់ចាំនោះ គឺចិនបញ្ចេញសព្វាវុធអ្វីខ្លះក្នុងឱកាសនេះ។
ថ្ងៃទី១ ខែតុលា ឆ្នាំ២០១៩ គឺជាខួបទី៧០ ថ្ងៃបង្កើតសាធារណរដ្ឋប្រជាមានិតចិន។ ៧០ឆ្នាំមុន ពោលគឺថ្ងៃទី១ ខែតុលា ឆ្នាំ១៩៤៩ លោកប្រធាន ម៉ៅ សេទុង បានប្រកាសជាផ្លូវការការបង្កើតសាធារណរដ្ឋប្រជាមានិតចិនឡើង ក្រោយក្រុមកុម្មុយនីស្តយកជ័យជម្នះលើក្រុមជាតិនិយមដែលភៀសខ្លួនទៅតៃវ៉ាន់ដល់សព្វថ្ងៃ។
ការរៀបចំពិធីដ៏សំខាន់មួយនេះ ចាប់ផ្ដើមតាំងពីដើមឆ្នាំមកម្ល៉េះ។ ក្បួនព្យុហយាត្រាដ៏ធំមួយ នឹងធ្វើឡើងតាមបណ្ដោយមហាវិថីឆាងអាន ជាទីដែលកាលពី៧០ឆ្នាំមុនក្បួនព្យុហយាត្រាកងទ័ពរំដោះប្រជាជនចិន បានធ្វើឡើងដើម្បីអបអរការប្រកាសសាធារណរដ្ឋប្រជាមានិតថ្មីមួយ។ ក្រសួងការពារជាតិចិន បានប្រកាសហើយថា កងទ័ពចំនួន១៥០០០នាក់ នឹងចូលរួមក្នុងក្បួនដង្ហែនេះ ដែលអមដោយសព្វាវុធជាច្រើនរយមុខទៀត។ យន្តហោះចំនួន១៦០គ្រឿង នឹងហោះបង្អួតរាងពីលើអាកាសផងដែរ។
ច្បាស់ណាស់ថា កងទ័ពរំដោះប្រជាជនចិន នឹងបញ្ចេញសព្វាវុធទំនើបៗរបស់ខ្លួនដើម្បីបង្ហាញពិភពលោក។ ជាការពិត ក្នុងសព្វាវុធនឹងត្រូវបង្ហាញ មានខ្លះកំពុងត្រូវបានប្រើប្រាស់ទៅហើយ។ ប៉ុន្តែអ្វីដែលគេទន្ទឹងចាំនោះ គឺមីស៊ីលថ្មីរបស់ចិន។ មីស៊ីលជាច្រើនប្រភេទរបស់ចិន ត្រូវបានផលិតឡើងក្នុងស្រុកផ្ទាល់ ហើយអាចវាយប្រហារគ្រប់គោលដៅលើគោក និងនាវាដឹកយន្តហោះផងដែរ។
មីស៊ីល Dongfeng-21D ឬ DF-21D ដែលបង្ហាញវត្តមានលើកដំបូងនៅឆ្នាំ២០១៥ នឹងមានមុខម្ដងទៀតនៅឆ្នាំ២០១៩ នេះ។ មានរហ្សនាមឃាតករនាវាចម្បាំង មីស៊ីល DF-21D មានសមត្ថភាពវាយប្រហារនាវាចម្បាំងដែលនៅចម្ងាយដល់ទី១,៥០០គីឡូម៉ែត្រឯណោះ។ មីស៊ីលដ៏មានឥទ្ធិពលមួយទៀត គឺ Dongfeng-21 ឬ DF-26 ក៏ទំនងនឹងត្រូវបង្ហាញផងដែរ។ មីស៊ីលនេះ ត្រូវបានឲ្យឈ្មោះថា ឃាតករហ្កាម។ ស្ដាប់តាមឈ្មោះ មីស៊ីលអាចហោះដល់កោះហ្កាមដែលជាទីកដីអាមេរិកនៅប៉ាស៊ីហ្វក។
មីស៊ីលដែលនឹងបង្ហាញមុខដែរនោះ គឺ Dongfeng-41 ឬ DF-41 ដែលជាប្រភេទមីស៊ីលផ្ទុកក្បាលគ្រាប់នុយក្លេអ៊ែរបានលើសពីមួយ។ ទឹកដីអាមេរិកទាំងមូល ស្ថិតក្នុងរង្វង់ចម្ងាយដែលមីស៊ីលបាញ់ដល់ ដែលនេះធ្វើឲ្យមីស៊ីលមួយនេះ ក្លាយជាឆ្អឹងខ្នងដ៏សំខាន់នៃសមត្ថភាពបន្លាចរបស់ចិន។ អាវុធមួយទៀតដែលចិនប្រឹងពង្រឹងសមត្ថភាពយូរមកហើយនោះ គឺមីស៊ីល Dongfeng-17 ដែលជាមីស៊ីលមានល្បឿនលឿនជាងសំឡេង។
និយាយពីសព្វាវុធលើមេឃឯទៀត យន្តហោះចម្បាំងស៊េរីចុងក្រោយ J-20 ដែលត្រូវបានប្រដូចទៅនឹងF-35 របស់អាមេរិក ក៏នឹងហោះកាត់ពីលើទីលានធានអានមិនដែរ។ យន្តហោះដឹកជញ្ជូន Y-20 និងយន្តហោះទម្លាក់គ្រាប់បែក H6-N ក៏ដូចជាយន្តហោះបញ្ជា ក៏ស្ថិតក្នុងបញ្ជីសព្វាវុធដែលគេទន្ទឹងចាំមើលដែរ៕
© រក្សាសិទ្ធិដោយ thmeythmey.com