ទឹកទំនប់ បឹង ប្រឡាយ ក្លាយជាកន្លែងកម្សាន្តរបស់អ្នកភូមិ

ជាតិ

បុណ្យភ្ជុំបិណ្ឌ

ទឹកទំនប់ បឹង ប្រឡាយ ក្លាយជាកន្លែងកម្សាន្តរបស់អ្នកភូមិ

01, Oct 2019 , 3:58 pm

រូបភាព

ដោយ: ថ្មីៗ

ទឹកពេញប្រៀបលើវាលស្រែ រីឯស្ទឹង ទំនប់ អូរ ប្រឡាយ បឹងបួ តាមបណ្តោយផ្លូវ និងតាមបណ្តាភូមិដ្ឋាន បានប្រែក្លាយទៅជារមណីយដ្ឋានធម្មជាតិ នាឱកាសនៃពិធីបុណ្យភ្ជុំបិណ្ឌ និងនៅរដូវវស្សានេះតែម្តង។ ក្នុងដំណើរតាមបណ្តាផ្លូវជាតិ យើងច្បាស់ជាឃើញមិនចេះដាច់ទិដ្ឋភាពមនុស្សម្នា លេងទឹកយ៉ាងសប្បាយតាមទីតាំងដែលមានទឹកច្រើន និងហូរ ជាពិសេសនៅតំបន់ក្បែរស្ពាន។

ក្រៅពីការហែលទឹកលេងកម្សាន្តជាលក្ខណៈគ្រួសារ គេក៏សង្កេតឃើញសកម្មភាពរាំរែក ការលក់ដូរ និងការថតផ្តិតយកទិដ្ឋភាពផ្សេងៗផងដែរ។ តំបន់ខ្លះ មានមន្ត្រីប៉ូលិសចាំសម្រួលចរាចរណ៍ សម្រាប់អ្នកដំណើរទៅមក រីឯនៅតំបន់ខ្លះទៀត អ្នកលេងកម្សាន្តត្រូវទទួលខុសត្រូវលើយានជំនិះដោយខ្លួនឯង។

ថ្វីដ្បិតតែទីតាំងលេងទឹកទាំងនោះ ជាទីកម្សាន្តដែលមិនត្រូវការចំណាយលុយច្រើនក៏ដោយ ប៉ុន្តែអ្នកលេងកម្សាន្តត្រូវតែយកចិត្តទុកដាក់លើសុវត្ថិភាពផ្ទាល់ខ្លួនខ្ពស់បំផុត ជាពិសេសកុមារតូចៗ ដើម្បីចៀសវាងការលង់ទឹក ឬគ្រោះថ្នាក់ជាយថាហេតុផ្សេងៗ រួមទាំងការគិតគូរលើបញ្ហាបរិស្ថាន។

យោងតាមរបាយការណ៍មន្ទីរទេសចរណ៍រាជធានី-ខេត្ត រមណីយដ្ឋានកែច្នៃខ្នាតតូចទាំងនោះ ក៏ជាផ្នែកមួយនៃសក្តានុពលទេសចរណ៍ផងដែរ ជាពិសេសសម្រាប់ពលរដ្ឋនៅតាមមូលដ្ឋាននានា៕