ពីនេះ ពីនោះ
កាហ្វេថ្មីៗ៖ មកស្លាប់អីពេលភ្ជុំ?
× ពាក្យនិយាយលេងខ្លះពិតជាឥតប្រយោជន៍ ហើយបើនិយាយចេញមក វាបានត្រឹមតែទើសត្រចៀកអ្នកជុំវិញខ្លួន និងធ្វើឱ្យពួកគេស្អប់តែប៉ុណ្ណោះ។
សំណាង៖ មុនភ្ជុំមួយថ្ងៃ អញទៅស៊ីគុយទាវក្បែរទួលទំពូង។ មានអ៊ំម្នាក់នោះ ឱ្យម្ចាស់ហាងគិតលុយបណ្តើរ ហើយរអ៊ូបណ្តើរថា ប្រញាប់ទៅចូលរួមបុណ្យអ្នកជិតខាងវិញ។ អ៊ំប្រុសនោះ ហុចលុយទៅអ្នកលក់ ហើយទូលពិតទៅអ្នកលក់ ដែលគាត់ស្គាល់ដែរថា «មកស្លាប់អី ពេលភ្ជុំវិញ?»។ អ្នកលក់នោះក៏តបមកអ៊ំប្រុសវិញថា «អ៊ំឯង ម៉េចមិនប្រាប់គាត់មុន ថាកុំអាលស្លាប់»។
អញស្តាប់ទៅដូចទើសត្រចៀកណាស់។ យកការស្លាប់មកនិយាយលេង។
សុធីរ៖ ស្លាប់រស់ព្រោះមាត់។ ពាក្យពេចន៍បែបនេះ អញលឺញឹកញាប់ណាស់នៅតាមក្រុមកំប្លែងដែលសម្តែងផ្ទាល់តាមឆាកប្រគំតន្ត្រីផង និងតាមវីដេអូផង។ ក្នុងន័យតែមួយ គឺគិតថានិយាយឱ្យគេសើច ប៉ុន្តែពាក្យពេចន៍ទាំងនេះ ជាពាក្យមិនពីរោះ មិនមានសីលធម៌ មិនសមនឹងនិយាយចេញមកនោះទេ ជាពិសេសរឿងអាយុជីវិតរបស់គេទៀត។ ម្យ៉ាងទៀត ការនិយាយពាក្យបែបនេះចេញមក វាបង្ហាញពីកម្រិតនៃការចេះដឹង កម្រិតនៃសេចក្តីថ្លៃថ្នូររបស់បុគ្គលនោះទៀតផង។
សំណាង៖ អញមានអារម្មណ៍ថា មនុស្សកាន់តែច្រើននិយាយមិនសូវគិតទេ។ និយាយលឿន និយាយដោយមិនខ្វល់។
សុធីរ៖ ឯងយល់ដូចនេះ វាត្រឹមត្រូវហើយ។ នៅពេលដែលឯងយល់ហើយ សូមឯងអនុវត្តខ្លួនឯងផង។ ចំណេះមានបី គឺ ចំណេះដឹង ចំណេះធ្វើ និងចំណេះគិត។ គិតឱ្យបានគ្រប់ជ្រុងជ្រោយ ចាំនិយាយចេញមក។ គិតមុនគូរ៕
© រក្សាសិទ្ធិដោយ thmeythmey.com