កសិករ ម៉ែន វី ដាំននោងបានប្រវែងដល់ទៅ១.៥៧ម៉ែត្រ លក់បាន២ពាន់រៀលក្នុងមួយផ្លែ

ជាតិ

សេដ្ឋកិច្ច

២៥ខេត្ត/រាជធានី

កសិករ ម៉ែន វី ដាំននោងបានប្រវែងដល់ទៅ១.៥៧ម៉ែត្រ លក់បាន២ពាន់រៀលក្នុងមួយផ្លែ

02, Oct 2019 , 10:19 am

រូបភាព

រូបភាពផ្តល់សិទ្ធិដោយ កញ្ញា អឿន សាវាត កូនស្រីម្ចាស់ចម្ការននោងវែង

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ អ្នកស្រី ម៉ែន វី ជាកសិកររស់នៅភូមិស្ទឹងថ្មី ឃុំតាលាស់ ស្រុកមោងឫស្សី ខេត្តបាត់ដំបង អាចដាំននោង បានប្រវែងរហូតដល់ ១.៥៧ម៉ែត្រ និងមានទម្ងន់ជាង ១គីឡូ។ បើតាមកសិករ ម៉ែន វី ផ្លែននោងវែងប្លែកនេះ អាចលក់បានតម្លៃពី១៥០០ទៅ២០០០រៀល ក្នុង ១ផ្លែ ខណៈននោងធម្មតា លក់ត្រឹម៥០០រៀលប៉ុណ្ណោះ។

មានតែ២គ្រួសារប៉ុណ្ណោះនៃភូមិស្ទឹងថ្មី ឃុំតាលាស់ ដែលអាចដាំននោង បានប្រវែងរហូតដល់ ១.៥៧ម៉ែត្រ ក្នុងមួយផ្លែ។ បើតាមអ្នកស្រី ម៉ែន វី ពូជននោងវែងខុសធម្មតានេះ ត្រូវបានអ្នកស្រី សុំបន្តពីអ្នកជិតខាង។ កសិករវ័យ ៥៥ឆ្នាំរូបនេះ បន្តថា ននោងមួយទ្រើង អាចមានផ្លែដល់ទៅ ៥០ផ្លែ និងមានប្រវែង វែងៗដូចគ្នា។ អ្នកស្រី ម៉ែន វី បញ្ជាក់ប្រាប់ ThmeyThmey 25 តាមទូរសព្ទយ៉ាងដូច្នេះថា៖«ពូជននោងនេះ ខ្ញុំសុំគេបាន ៣គ្រាប់ ហើយយកមកដាំ ស្រាប់តែបានវែងចឹងទៅ។ ននោងនេះ ផ្លែវាវែងគ្រប់ៗផ្លែតែម្ដង ហើយ១រណ្ដៅ វាផ្លែបានជាង ៥០ផ្លែ»។

(រូបភាពផ្តល់សិទ្ធិដោយ កញ្ញា អឿន សាវាត កូនស្រីម្ចាស់ចម្ការននោងវែង)

បើនិយាយរឿងថែទាំវិញ អ្នកស្រី ម៉ែន វី ថែទាំតាមធម្មតា ដោយស្រោចទឹក និងដាក់ជីលាមកគោ នៅតាមគល់ននោង។ កសិករ ម៉ែន វី អះអាងថា មិនបានប្រើប្រាស់ជីគីមីអ្វីឡើយ ព្រោះអ្នកស្រីដាំសម្រាប់បរិភោគប៉ុណ្ណោះ។ កសិករម្ចាស់ផ្លែននោងវែងរូបនេះ រៀបរាប់ពីការវិវត្តរបស់ននោងថា៖«ពីមួយថ្ងៃទៅមួយថ្ងៃ វាចេះតែវែងទៅៗ។ ពេលវាក្ដឹប វាលូតខ្លីនៅឡើយទេ ប៉ុន្តែរៀងធំបន្តិច ស្រាប់តែលូតវែងខ្លាំងតែម្ដង»។

(រូបភាពផ្តល់សិទ្ធិដោយ កញ្ញា អឿន សាវាត កូនស្រីម្ចាស់ចម្ការននោងវែង)

នៅពេលដាំននោងបានផលល្អបែបនេះ អ្នកស្រុកភូមិ បាននាំគ្នាមកថត និងសុំពូជននោងពីអ្នកស្រី ម៉ែន វី ផងដែរ។ ននោងដែលមានប្រវែងដល់ទៅ ១.៥៧ម៉ែត្រនេះ មានទម្ងន់ជាង ១គីឡូ ហើយក្នុងមួយផ្លែ អ្នកស្រីអាចលក់បានពី១៥០០ទៅ២០០០រៀល ខណៈននោងធម្មតា លក់ត្រឹម៥០០រៀលប៉ុណ្ណោះ។ កសិករដែលមានកូន ៤នាក់រូបនេះ ប្រកបរបរធ្វើស្រែ និងដាំបន្លែបន្តិចបន្តួចនៅជុំវិញផ្ទះសម្រាប់បរិភោគប៉ុណ្ណោះ ប៉ុន្តែ នៅពេលបរិភោគមិនអស់ អ្នកស្រី ក៏បានលក់បន្លែដល់អ្នកភូមិបរិភោគផងដែរ។ ក្រៅពីដាំននោង អ្នកស្រី ម៉ែន វី បានដាំបន្លែត្រសក់ ជី និងបន្លែមួយចំនួនទៀត ដើម្បីកាត់បន្ថយការចំណាយនៅក្នុងគ្រួសារ៕