ជាតិ
សេដ្ឋកិច្ច
នាយករដ្ឋមន្ត្រីស្នើម្ចាស់ផ្ទះជួល កុំដំឡើងថ្លៃឈ្នួលបន្ទប់លើស ២ដុល្លារ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន អំពាវនាវជាថ្មីម្ដងដល់ម្ចាស់ផ្ទះជួល កុំដំឡើងឈ្នួលផ្ទះខ្ពស់ពេក។ លើកនេះសម្ដេចបញ្ជាក់ថា បើដំឡើង កុំឲ្យលើសពី២ដុល្លារ ព្រោះប្រាក់ខែគោលកម្មករកើនបានតែ៨ដុល្លារប៉ុណ្ណោះនៅឆ្នាំ២០២០។ ការអំពាវនាវរបស់ប្រមុខរដ្ឋាភិបាល គឺធ្វើឡើងក្នុងពិធីប្រគល់សញ្ញាបត្រជូននិសិត្សសកលវិទ្យាល័យប៊ែលធីអន្តរជាតិ នៅថ្ងៃទី២ខែតុលា។
ប្រសាសន៍សម្ដេច ហ៊ុន សែន ៖
សម្ដេចនាយករដ្ឋមន្ត្រីបានលើកឡើងដូច្នេះថា៖«សូមម្ចាស់ផ្ទះជួលទាំងឡាយ មេត្តាកុំដំឡើងថ្លៃជ្រុលហួស កាលពី២០១៧ ខ្ញុំបានស្នើម្ដងហើយកុំដំឡើងថ្លៃផ្ទះសម្រាប់ឆ្នាំ២០១៨ ឥឡូវជាថ្មីម្ដងទៀត បើសិនជាឡើងកុំលើស២ដុល្លារមួយបន្ទប់ ព្រោះប្រាក់ខែគ្នាឡើងបានតែ៨ដុល្លារ អ្នកខ្លះដំឡើងផ្ទះជួល ១០ដុល្លារ ២០ដុល្លារ វាមិនងាប់គ្នាទៅហើយ»។
សម្ដេច ហ៊ុន សែន បានបញ្ជាដល់អាជ្ញាធររាជធានីខេត្ត ដើម្បីសហការជាមួយម្ចាស់ផ្ទះ ធ្វើយ៉ាងណាឲ្យមានការអនុវត្តដូចការអំពាវនាវខាងលើនេះ។ ក្រៅពីថ្លៃឈ្នួលបន្ទប់ សម្ដេចបានណែនាំឲ្យស្ថាប័នពាក់ព័ន្ធពិនិត្យមើលថ្លៃអគ្គិសនី និងថ្លៃទឹកស្អាត ចំពោះកម្មករឲ្យបានជាប់លាប់ផងដែរ។
ជាមួយគ្នានេះ ប្រមុខរដ្ឋាភិបាលបានលើកឡើងពីការដំឡើងប្រាក់ខែគោលកម្មករសម្រាប់ឆ្នាំ២០២០ ដែលដំឡើងបានតែ ៨ដុល្លារ ពោលគឺកើនពី ១៨២ដុល្លារនៅឆ្នាំ២០១៩ មក១៩០ដុល្លារសម្រាប់ឆ្នាំ២០២០ខាងមុខ។ ឆ្នាំមុនៗអត្រាដំឡើងប្រាក់ខែនេះគឺខ្ពស់ជាងឆ្នាំ២០២០។ សម្ដេចអះអាងថា ការដំឡើងប្រាក់បៀវត្សគោលសម្រាប់ឆ្នាំ២០២០ មិនអាចលើសនេះបានទេ ចៀសវាងថៅកែរោងចក្រ ប្ដូរទៅប្រទេសដទៃ ព្រោះប្រាក់ខែគោលនៅបណ្ដាប្រទេសមួយចំនួន នៅទាបជាងនេះ៕
Tag:
ហ៊ុន សែន
ផ្ទះជួល
បន្ទប់ជួល
© រក្សាសិទ្ធិដោយ thmeythmey.com