កីឡាអន្តរជាតិ
អន្តរជាតិ
ខ្សែប្រយុទ្ធកូរ៉េខាងត្បូងញាក់ដាច់ចង្កេះ Van Dijk ស៊ុតទី Liverpool យ៉ាងអស្ចារ្យ
× Hwang Hee-chan ខ្សែប្រយុទ្ធសញ្ជាតិកូរ៉េខាងត្បូងបានបង្ហាញទម្រង់លេងដ៏គួរឲ្យភ្ញាក់ផ្អើលសម្រាប់ក្រុម Red Bull Salzburg តាមរយៈការប្រើបច្ចេកទេសផ្ទាល់ខ្លួនក្នុងការកិបបាល់ដាច់ចង្កេះកំពូលខ្សែការពារល្អបំផុត Virgil van Dijk ដើម្បីទាត់បញ្ចូលទី Liverpool ក្នុងជំនួប UEFA Champions league នៅរាត្រីថ្ងៃទី២ តុលា។
ម្ចាស់ការពារតំណែងជើងឯក Liverpool បានយកឈ្នះ Salzburg ដោយលទ្ធផល ៤-៣ នាការប្រកួតវគ្គសន្សំពិន្ទុពូល E។ ៤គ្រាប់របស់ម្ចាស់ផ្ទះធ្វើបានដោយខ្សែប្រយុទ្ធ Sadio Mane និងខ្សែការពារ Andy Robertson ម្នាក់១គ្រាប់ និង Mohamed Salah ២គ្រាប់ ហើយ៣គ្រាប់របស់ ក្រុមភ្ញៀវសម្រេចបានដោយកីឡាករកូរ៉េខាងត្បូង Hwang Hee-chan រួមទាំងមួយគ្រាប់ម្នាក់ពីសំណាក់កីឡាករជប៉ុន Takumi Minamino និងខ្សែប្រយុទ្ធដាណឺម៉ាក វ័យ១៩ឆ្នាំ Erling Braut Haaland។
យ៉ាងណាក៏ដោយអ្វីដែលគួរឲ្យចាប់អារម្មណ៍បំផុតនោះ Salzburg ដែលត្រូវ Liverpool នាំមុខដល់ទៅ ៣-០ មុនទៅហើយ តែនៅអាចរកគ្រាប់តាមស្មើវិញបាន។ គ្រាប់ដំបូងរបស់ Salzburg កើតឡើងតាមរយៈខ្សែប្រយុទ្ធកូរ៉េខាងត្បូងវ័យ២៣ឆ្នាំដែលបានបញ្ចេញទេពកោសល្យដ៏អស្ចារ្យដោយអាចញាក់ដាច់ Van Dijk ដែលទើបឈ្នះពានរង្វាន់ខ្សែការពារឆ្នើមរបស់អឺរ៉ុបនាពេលថ្មីនេះ។
មិនត្រឹមតែជាអ្នកសម្រេចទីដ៏ល្អទេ Hwang Hee-chan ក៏បានបញ្ជូនបាល់ឲ្យមិត្តរួមក្រុមបញ្ចប់ទីគ្រាប់ទី២ផងដែរ ដែលធ្វើបានដោយកីឡាករអាស៊ីដូចគ្នាគឺខ្សែប្រយុទ្ធសញ្ជាតិជប៉ុន Takumi Minamino។
សម្រាប់ក្រុមជម្រើសជាតិកូរ៉េខាងត្បូង Hwang Hee-chan បង្ហាញខ្លួនបាន២៨លើក និងស៊ុតបញ្ចូលទី៣គ្រាប់៕
Tag:
UEFA Champions league
Hwang Hee-chan
© រក្សាសិទ្ធិដោយ thmeythmey.com