កីឡាជាតិ
ជាតិ
កម្ពុជាដាក់បេក្ខភាព សៀង ចន្ធាដើម្បីប្រជែងពាន «កីឡាករយុវជនឆ្នើមប្រចាំឆ្នាំនៅអាស៊ី» កីឡាករ សៀង ចន្ធា ពេលបង្ហាញខ្លួនជាមួយក្រុមជម្រើសជាតិកម្ពុជាក្នុងជំនួបវគ្គជម្រុះ World Cup កាលពីពេលកន្លងទៅ
× ខ្សែប្រយុទ្ធវ័យក្មេង សៀង ចន្ធា ត្រូវបានសហព័ន្ធកីឡាបាល់ទាត់កម្ពុជា ដាក់ជាបេក្ខភាពប្រកួតប្រជែងក្នុងពានរង្វាន់កីឡាករយុវជនឆ្នើមប្រចាំឆ្នាំ (AFC Youth Player of the year) ក្នុងតំបន់អាស៊ីនាព្រឹត្តិការណ៍ AFC Annual Award 2019។ ការសម្រេចបានគ្រាប់បាល់ និងបង្ហាញទម្រង់លេងយ៉ាងល្អក្នុងវគ្គជម្រុះ World Cup និង AFF U18 Championship ជាមូលហេតុដែលសហព័ន្ធសម្រេចជ្រើសរើសយកកីឡាកររូបនេះ។
ការបង្ហាញទម្រង់លេងដ៏ទាក់ទាញ និងសម្រេចបានគ្រាប់បាល់ក្នុងពានរង្វាន់ AFF U18 Championship និងវគ្គជម្រុះ World Cup គួបផ្សំជាមួយមានបច្ចេកទេស និងទេពកោសល្យល្អ ជួយឲ្យខ្សែប្រយុទ្ធវ័យក្មេង សៀង ចន្ធា ក្លាយជាបេក្ខភាពក្នុងការប្រកួតប្រជែងកីឡាករយុវជនឆ្នើមប្រចាំតំបន់អាស៊ីនៅឆ្នាំនេះ។ នេះជាការបង្ហាញហេតុផលរបស់លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា។
Turki Al Ammar ជាប់ជាកីឡាករយុវជនឆ្នើមប្រចាំ២០១៨ ក្រោយជួយឲ្យអារ៉ាប៊ីសាអូឌីតឈ្នះ AFC U-19 Championship
សម្រាប់ការប្រកួតវគ្គជម្រុះពូល B ក្នុងព្រឹត្តិការណ៍ AFF U18 Championship នៅប្រទេសវៀតណាម កីឡាករ សៀង ចន្ធា រកបាន៤គ្រាប់ម្នាក់ឯងឲ្យក្រុមជម្រើសជាតិអាយុក្រោម១៨ឆ្នាំកម្ពុជា។ ចន្ធា រកបានពីរគ្រាប់ក្នុងជ័យជម្នះ ៤-៣ ជាប្រវត្តិសាស្ត្រលើ U18 ថៃ និងរួមចំណែក១គ្រាប់ក្នុងជ័យជម្នះ ២-១ លើវៀតណាម និង១គ្រាប់ទៀតក្នុងបរាជ័យ ៥-១ ក្រោមថ្វីជើងអូស្ត្រាលី។
អ្វីដែលកាន់តែអស្ចារ្យ សៀង ចន្ធា ដែលស្ថិតក្នុងវ័យ១៦ឆ្នាំត្រូវបានអ្នកចាត់ការទូទៅលោក Keisuke Honda និងលោក Felix Dalmas ជាគ្រូបង្វឹកផ្តល់ឱកាសឲ្យជាប់ក្នុងក្រុមជម្រើសជាតិសម្រាប់វគ្គជម្រុះ World Cup។ នាជំនួបជាមួយប៉ាគីស្ថានក្នុងវគ្គជម្រុះ World Cup ជុំទី១ ចន្ធា បានរួមចំណែកមួយគ្រាប់ក្នុងជ័យជម្នះ ២-០ របស់កម្ពុជា ដើម្បីក្លាយជាកីឡាករមានវ័យក្មេងជាងគេ ដែលអាចរកគ្រាប់បាល់ក្នុងវគ្គជម្រុះនេះ ខណៈមួយគ្រាប់ទៀតរកបានដោយកីឡាករ គួច សុកុម្ភៈ។
សម្រាប់លោក កែវ សារ៉េត ទោះបី សៀង ចន្ធា ក្លាយជាបេក្ខភាពតំណាងកម្ពុជាក្នុងការប្រកួតប្រជែងនេះក៏ដោយ តែលោកហាក់មានជំនឿតិចតួចបំផុតក្នុងការឈ្នះដំណែងមួយនេះ ដ្បិតកីឡាករមកពីប្រទេសផ្សេងៗសុទ្ធតែមានមានសមត្ថភាពល្អៗ។
«ជាបេក្ខភាពក៏ពិតមែន តែយើងក៏មិនប្រាកដថា យើងបញ្ជូនទៅហើយអាចឈ្នះគេនោះទេ ព្រោះរូបគេត្រូវប្រកួតប្រជែងជាមួយកីឡាករមកពីបណ្តាប្រទេសផ្សេងៗក្នុងតំបន់អាស៊ីជាច្រើនរូបទៀត។ ខ្ញុំមិនមោទកភាព១០០ភាគរយថាយើងអាចឈ្នះនោះទេ ពីព្រោះកីឡាករគេ ក៏ល្អៗដែរ»។ នេះជាការលើកឡើងរបស់លោក កែវ សារ៉េត។
បង្កើតឡើងនៅឆ្នាំ១៩៩៥ អតីតកីឡាករថៃ Bamrung Boonprom ជាកីឡាករតែម្នាក់គត់នៅតំបន់អាស៊ីអាគ្នេយ៍ដែលឈ្នះពានរង្វាន់នេះនៅឆ្នាំ១៩៩៦ ខណៈតំណាងកីឡាករពីជប៉ុនឈ្នះរហូតដល់ទៅ១១លើក កូរ៉េខាងត្បូង៦លើក និងកូរ៉េខាងជើង៤លើក។ ខ្សែបម្រើអារ៉ាប៊ីសាអូឌីត Turki Al-Ammar បានឈ្នះពាន AFC Youth Player of the year នេះ កាលពីឆ្នាំមុន៕
Tag:
បាល់ទាត់
សៀង ចន្ធា
AFC Annual Award
© រក្សាសិទ្ធិដោយ thmeythmey.com