ជាតិ
បទយកការណ៍ / បទសម្ភាសន៍
របាំបុរាណខ្មែរ៤ ឆ្លុះបញ្ចាំងពីទ្រឹស្ដីព្រះពុទ្ធ នឹងសម្ដែងក្នុងពិព័រណ៍ស្ដីពីព្រះពុទ្ធសាសនា នៅអាមេរិក
× ភ្នំពេញ៖របាំបុរាណខ្មែរ និងរបាំបុរាណច្នៃបែបទំនើបចំនួន៤ ដែលឆ្លុះបញ្ចាំងពីទ្រឹស្ដីព្រះពុទ្ធ នឹងបង្ហាញខ្លួនក្នុងពិព័រណ៍ស្ដីពីព្រះពុទ្ធសាសនា នៅសារមន្ទីរ ស្មេតសូនៀន នៅសហរដ្ឋអាមេរិក នៅថ្ងៃទី១៩ ខែតុលាខាងមុខ។ អ្នកស្រី សូភីលីន ជាម សាភារ៉ូ ដែលជាអ្នកដឹកនាំការសម្ដែងនេះ រំពឹងថាការសម្ដែងនឹងទទួលបានជោគជ័យ ព្រោះសិល្បករសុទ្ធសឹងមានទេពកោសល្យ និងប្រឹងប្រែងហ្វឹកហាត់អស់ពីកម្លាំងកាយចិត្ត។ បើតាមអ្នកស្រី សូភីលីន ការសម្ដែងមានតែមួយថ្ងៃប៉ុណ្ណោះ គឺនៅថ្ងៃទី១៩ ខែតុលា ឆ្នាំ២០១៩ ហើយនៅថ្ងៃទី២០ នឹងមានការធ្វើបទបង្ហាញចំនួន២ ស្ដីពីស្នាដៃផ្កាស្លាក្រោមអង្គការ ដែលស្នាដៃនេះក៏ស្ថិតក្នុងរបាំទាំង៤ ដែលត្រូវសម្ដែងដែរ។
សូមអញ្ជើញស្ដាប់បទសម្ភាស រវាងកញ្ញា ប៉ូ សាគុន នៃសារព័ត៌មានថ្មីៗ និងអ្នកស្រី សូភីលីន ជាម សាភារ៉ូ ស្ដីពីការសម្ដែងសិល្បៈបុរាណខ្មែរ ក្នុងពិព័រណ៍ស្ដីពីព្រះពុទ្ធសាសនា នៅសហរដ្ឋអាមេរិក ដូចតទៅ៖
ស្នាដៃរបាំទាំង៤រួមមានទី១ របាំបួងសួងតាយ៉ែ ជារបាំសក្ការៈមួយដែលសម្ដែងទោល ដើម្បីបណ្ដេញឧបទ្រពចង្រៃទាំងឡាយឱ្យចេញពីនគរ ហើយសុំពរជ័យសិរីសួស្ដីឱ្យកើតមានដល់នគរខ្មែរ។ ទី២ របាំ រាមឥសូរនិងនាងមុនីមេខាលា។ របាំនេះបង្ហាញអំពីការផ្ចាញ់ចិត្តលោភលន់។ ស្នាដៃទី៣ បង្ហាញអំពីឈុតមួយក្នុងស្នាដៃផ្កាស្លាក្រោមអង្គការ ដែលមានចំណងជើងថា«អន្លង់ជីវិត»។ ឈុតនេះ ប្រាប់ពីការរៀបការដោយបង្ខំនៅសម័យប៉ុលពត។ ចំណែកស្នាដៃទី៤ ឈ្មោះថា «ស្លាកស្នាមអតីត» ដកស្រង់ត្រង់ឈុតនាងសីតាលុយភ្លើង។ របាំបុរាណមួយនេះ ត្រូវបានច្នៃបង្កើតឱ្យមានលក្ខណៈទំនើបបន្តិច។ ស្នាដៃរបាំទាំង៤ សុទ្ធសឹងបានបង្កប់នូវទ្រឹស្ដីព្រះពុទ្ធសាសនា សម្រាប់ឱ្យទស្សនិកជនពិចារណា។
អ្នកស្រី សូភីលីន ជាម សាភារ៉ូ ថាបំណងធំបំផុតនៃការសម្ដែងសិល្បៈបុរាណខ្មែរ ក្នុងពិព័រណ៍ស្ដីពីព្រះពុទ្ធសាសនានេះ ដើម្បីបង្ហាញពិភពលោក ជាពិសេសប្រជាជនខ្មែរដែលរស់នៅរដ្ឋធានីវាស៊ីនតោនឌីស៊ី បានឃើញពីស្នាដៃសិល្បៈបុរាណខ្មែរ ព្រមទាំងស្នាដៃច្នៃបង្កើតថ្មី។
អ្នកដឹកនាំការសម្ដែងរូបនេះ រំពឹងថាការសម្ដែងនឹងទទួលបានជោគជ័យ ព្រោះសិល្បករបានប្រឹងប្រែងហ្វឹកហាត់អស់ពីកម្លាំងកាយចិត្ត៕
Tag:
សិល្បៈ
វប្បធម៌
របាំបុរាណ
របាំ
សូភីលីន
សាសនា
© រក្សាសិទ្ធិដោយ thmeythmey.com