ជាតិ
សិក្ខាកាម ២១នាក់ ចូលរួមវគ្គបណ្ដុះបណ្ដាលស្ដីពីក្រមសីលធម៌សំណេរ និងរូបភាព នៅថ្ងៃស្អែក
× ភ្នំពេញ៖ និស្សិត អ្នកសារព័ត៌មានវ័យក្មេង និងអ្នកសារព័ត៌មានប្រជាពលរដ្ឋចំនួន ២១ នាក់ នឹងចូលរួមវគ្គបណ្តុះបណ្តាលស្ដីពីការទទួលខុសត្រូវផ្នែកសង្គមរបស់អ្នកសារព័ត៌មាន នៅថ្ងៃទី៧ ខែតុលានេះ។ វគ្គបណ្ដុះបណ្ដាលនេះ នឹងបង្ហាញពីការប្រឆាំងព័ត៌មានក្លែងក្លាយ, ក្រមសីលធម៌សំណេរ និងការប្រើប្រាស់រូបភាព។
ក្នុងន័យពង្រឹងវិជ្ជាជីវៈសារព័ត៌មាននៅក្នុងប្រទេសកម្ពុជា ទីភ្នាក់ងារអភិវឌ្ឍព័ត៌មានបារាំង CFI (Canal France International), ក្រោមគម្រោង«ព័ត៌មានទន្លេមេគង្គ» (Mekong News), ដោយសហការជាមួយសារព័ត៌មានអេឡិចត្រូនិក Thmeythmey.com នឹងបើកវគ្គបណ្ដុះបណ្ដាលស្តីពីការទទួលខុសត្រូវផ្នែកសង្គមរបស់អ្នកសារព័ត៌មាន។
សិស្ស និស្សិត អ្នកសារព័ត៌មានវ័យក្មេង និងអ្នកសារព័ត៌មានប្រជាពលរដ្ឋ មកពីស្ថាប័ន ដូចជា កាសែត Khmer Times, ទូរទស្សន៍ CNC, ទូរទស្សន៍ Town, សារព័ត៌មានថ្មីៗ, Veha Media, Kerla News, Poraman, The Intercon Rooster, និស្សិតនៃសាកលវិទ្យាល័យកម្ពុជា, ប្រជាពលរដ្ឋមកពីខេត្តព្រៃវែង, សិស្សវិទ្យាល័យហ៊ុនសែនជម្ពូវ័ន, មន្ត្រីអាជ្ញាធរជាតិអប្សរា, និងមន្ត្រីក្រសួងអប់រំ យុវជន និងកីឡា។
គ្រូបង្គោលក្នុងវគ្គបណ្ដុះបណ្ដាលថ្ងៃទី ៧ តុលានេះ រួមមាន លោក Pierre Gillette អតីតនិពន្ធនាយកកាសែតបារាំង Cambodge Soir, លោក គី សុខលីម សាស្ត្រាចារ្យសារព័ត៌មាន នៃសាកលវិទ្យាល័យភូមិន្ទភ្នំពេញ, កញ្ញា និត នីតិការ ទីប្រឹក្សានៃ Tilleke/Gibbins និងមកពីសមាគមសាលាត្រាជូ និងលោក គុណ ចិន្តា អ្នកជំនាញផ្នែករក្សាសុវត្ថិភាពព័ត៌មាន។
សូមបញ្ជាក់ថា វគ្គបណ្តុះបណ្តាលនេះ គឺជាផ្នែកមួយនៃគម្រោងធំរបស់ CFI (Mekong News) សម្រាប់ ៤ ប្រទេស ក្នុងនោះមាន៖ កម្ពុជា មីយ៉ាន់មា ឡាវ និងវៀតណាម នៅក្នុងតំបន់មេគង្គ៕
Tag:
CFI
វគ្គបណ្ដុះបណ្ដាល
អ្នកសារព័ត៌មានវ័យក្មេង
© រក្សាសិទ្ធិដោយ thmeythmey.com