ជាតិ
សេដ្ឋកិច្ច
អចលនទ្រព្យ
ខេត្តសៀមរាប នឹងមានក្រុង២ ដោយមួយជាទីក្រុងវប្បធម៍ និងមួយជាទីក្រុងទំនើប
× ក្នុងរយៈពេលប៉ុន្មានឆ្នាំចុងក្រោយ តម្លៃដីធ្លីនៅសៀមរាបបានកើនឡើង។ ចំណែកការសាងសង់ ក៏មានកំណើនខ្ពស់គួរឲ្យកត់សម្គាល់ ហើយថ្មីៗនេះ រដ្ឋាភិបាលបានប្រកាសពីផែនការ រៀបចំទីក្រុងសៀមរាប ដើម្បីទាក់ទាញចំនួនភ្ញៀវទេសចរបន្ថែមទៀត។
តាមរយៈបទសម្ភាសន៍ជាមួយអង្គភាព Fresh News លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងពីផែនការសាងសង់ទីក្រុងថ្មីមួយទៀត«ជាទីក្រុងទំនើប» នៅក្នុងខេត្តសៀមរាប។ តាមការបញ្ជាក់របស់លោក គម្រោងទីក្រុងថ្មីនេះ នឹងត្រូវបានសាងសង់នៅភាគខាងកើតក្រុងសៀមរាបបច្ចុប្បន្ន ដែលមានចម្ងាយប្រមាណ ៦០ គីឡូម៉ែត្រ។
បើតាមលោករដ្ឋមន្ត្រី ទីក្រុងថ្មីនេះ ត្រូវបានដាក់បញ្ចូលទៅក្នុងផែនការមេទេសចរណ៍របស់ខេត្ត ដែលឥឡូវនេះ កំពុងព្រាង ហើយអាចនឹងបញ្ចប់នៅដើមឆ្នាំក្រោយ។ ទីក្រុងថ្មីនេះ នឹងអនុញ្ញាតឲ្យសាងសង់អគារខ្ពស់ៗ ដែលមានផលប្រយោជន៍សម្រាប់វិស័យអចលនទ្រព្យ និងការវិនិយោគចម្រុះ។ មិនតែប៉ុណ្ណោះ សៀមរាប ក៏មានអាកាសយានដ្ឋានអន្តរជាតិដ៏ធំមួយ ដែលនឹងភ្ជាប់ទីក្រុងសៀមរាប ជាមួយនឹងតំបន់ និងពិភពលោកផងដែរ។
គេមើលឃើញថា ផែនការបង្កើតក្រុងទីក្រុងថ្មីនេះ នឹងជួយបន្ថែមភាពទំនើប និងប្លែកពីទីក្រុងសៀមរាបបច្ចុប្បន្ន។ ខុសប្លែកត្រង់ថា សៀមរាបគឺជាតំបន់វប្បធម៌ ដែលមានប្រាង្គប្រាសាទបុរាណជាបេតិកភណ្ឌពិភពលោកយ៉ាងច្រើន ដែលជាហេតុធ្វើឲ្យការសាងសង់អគារខ្ពស់ៗមិនត្រូវបានអនុញ្ញាត។ ដូច្នេះវិស័យអចលនទ្រព្យ និងពាណិជ្ជកម្ម ក៏នៅមានកម្រិតផងដែរ។
ប៉ុន្តែសម្រាប់គម្រោងទីក្រុងថ្មីវិញ ការសាងសង់ខ្នាតធំបែបពាណិជ្ជកម្ម និងលំនៅដ្ឋាន នឹងរីកលូតលាស់យ៉ាងឆាប់រហ័ស។ អ្នកជំនាញមើលឃើញថា គម្រោងអភិវឌ្ឍន៍ក្រុងថ្មី នឹងជួយជំរុញតម្លៃអចលនទ្រព្យក្នុងខេត្តនេះ ឲ្យកើនឡើងខ្ពស់ថែមទៀត។
ផែនការយុទ្ធសាស្ត្រ ដើម្បីទាក់ទាញទេសចរ
រដ្ឋាភិបាល ក៏បានរៀបចំផែនការជាយុទ្ធសាស្ត្រ ក្នុងការស្រូបយកចំនួនភ្ញៀវទេសចរ ឲ្យចូលមកកាន់តែច្រើន និងស្នាក់នៅរយៈពេលយូរ។ ជាយុទ្ធសាស្ត្រ ផែនការចំនួន៤ ធំៗ ត្រូវបានដាក់ចេញដូចជា៖ ការធ្វើពិពិធកម្មផលិតផលទេសចរណ៍ថ្មី និងការពន្យារពេលស្នាក់របស់ភ្ញៀវទេសចរ ការបង្កើតការប្រកួតប្រជែង ការបង្កើតការតភ្ជាប់ និងការបង្កើតអត្តសញ្ញាណថ្មី។ តាមរយៈយុទ្ធសាស្ត្រខាងលើ ខេត្តសៀមរាប នឹងក្លាយទៅជាតំបន់ទេសចរណ៍ពីរបែប ដែលម្ខាងជាតំបន់ប្រវត្តិសាស្ត្រ និងម្ខាងជាតំបន់ទំនើប។ ជាមួយនឹងការរៀបចំនេះ អ្នកទេសចរ អាចទទួលអារម្មណ៍ពីរផ្សេងគ្នា នៅពេលស្នាក់នៅក្នុងខេត្តសៀមរាប។
លើសពីនេះទៅទៀត តំបន់ ៤ផ្សេងទៀត ក្រៅពីតំបន់អង្គរ នឹងត្រូវបានគេយកមកអភិវឌ្ឍ៖ តំបន់បឹងទន្លេសាប តំបន់ឧទ្យានជាតិគូលែន ទីក្រុងសៀមរាប និងតំបន់ប្រាសាទអង្គរ។
សម្រាប់តំបន់បឹងទន្លេសាប គេបង្កើតឲ្យមានភាពចម្រុះ នៃសកម្មភាពទេសចរណ៍ ដូចជា ការជិះក្របីជាដើម និងការបង្កើតឲ្យទំនាក់ទំនង ជាមួយអ្នករស់នៅលើទឹកនៅតំបន់នោះ។
ចំណែកតំបន់ឧទ្យានជាតិគូលែន នឹងត្រូវអភិវឌ្ឍជាលក្ខណៈអេកូទេសចរណ៍ ទេសចរណ៍ផ្សងព្រេង និងទេសចរណ៍សាសនា ដូចជាការដើរឡើងភ្នំ។ តំបន់ទីក្រុងសៀមរាប ត្រូវបានគេធ្វើជាវិថីម្ហូបអាហារ ដើម្បីទាក់ទាញទេសចរជាតិ និងអន្តរជាតិ។ សម្រាប់តំបន់ប្រាសាទអង្គរវិញ នឹងត្រូវបំពាក់ភ្លើងបំភ្លឺ ដើម្បីដាក់ឲ្យទេសចរ អាចទស្សនាប្រាសាទអង្គរនាពេលរាត្រី៕
(ប្រភព៖https://www.realestate.com.kh/km/news/siem-reap-to-build-a-new-city/)
Tag:
ទេសចរណ៍
សៀមរាប
ទីក្រុងបុរាណ
ថោង ខុន
© រក្សាសិទ្ធិដោយ thmeythmey.com