អន្តរជាតិ
លោក អ៊ែដូហ្កាន់ នឹងទៅជួបលោក ត្រាំ ខែក្រោយដើម្បីជជែកគ្នាពីតំបន់សុវត្ថិភាពនៅស៊ីរី ប្រធានាធិបតីតួកគី តៃយីប អ៊ែរដូហ្កាន់ និងប្រធានាធិបតីអាមេរិក ដូណាល់ ត្រាំ នាជំនួបកន្លងមក
× ការិយាល័យប្រធានាធិបតីតួកគី នៅថ្ងៃទី៦ ខែតុលា បានប្រកាសថា ប្រធានាធិបតី រ៉េស៊ីប តៃយីប អ៊ែរដូហ្កាន់ (Recep Tayyip Erdogan) និងប្រធានាធិបតីអាមេរិក ដូណាល់ ត្រាំបានជួបសន្ទនាតាមទូរសព្ទ និងបានយល់ព្រមជួបគ្នានៅខែក្រោយ ដើម្បីជជែកពិភាក្សាពី «តំបន់សុវត្ថិភាព» នៅភាគខាងជើងស៊ីរី។
តាមរយៈសេចក្តីថ្លែងការណ៍របស់ការិយាល័យប្រធានាធិបតីតួកគី លោក តៃយីប អ៊ែដូហ្កាន់ បានប្រាប់លោក ដូណាល់ ត្រាំ ពីការខកចិត្តរបស់តួកគីចំពោះភាពបរាជ័យក្នុងការអនុវត្តកិច្ចព្រមព្រៀងក្នុងខែសីហា ដើម្បីបង្កើតតំបន់សុវត្ថិភាពមួយនៅលើព្រំដែនប្រទេសតួកគី និងស៊ីរី។ លោក អ៊ែរដូហ្កាន់ និយាយថចំៗថា ការិយាល័យធិបតេយ្យវិស័យសន្តិសុខ និងយោធាអាមេរិក ជាមូលហេតុនៃបរាជ័យនេះ។
សូមបញ្ជាក់ថា បន្ទាប់ពីជំនួបចរចាដ៏លំបាករវាងអាមេរិក និងតួកគីបានបិទបញ្ចប់នៅក្នុងខែសីហា ឆ្នាំ២០១៩ កិច្ចព្រមព្រៀងមួយ ត្រូវបានឯកភាពដែលបានអនុញ្ញាតឲ្យកងទ័ពអាមេរិក និងតួកគីត្រួតពិនិត្យរួមគ្នាទាំងនៅលើដី និងអាកាសនៅភាគខាងជើងស៊ីរី។ ប៉ុន្តែក្រោយមក តួកគី បានចោទអាមេរិកថា បានឈប់អនុវត្តការបង្កើតតំបន់សុវត្ថិភាព។ ប៉ុន្តែតាមរយៈកិច្ចសន្ទនាតាមទូរសព្ទរវាង លោក ត្រាំ និងលោក អ៊ែរដូហ្កាន់ បានជជែកជាថ្មីអំពីបញ្ហា «តំបន់សុវត្ថិភាព» នៅភាគខាងជើងស៊ីរី។
លោក អ៊ែរដូហ្កាន់ នឹងយកបញ្ហានេះទៅជជែកជាមួយលោក ត្រាំ ឲ្យបានលម្អិតក្នុងដំណើរទស្សនកិច្ចនៅសេតវិមាន ដែលធ្វើឡើងតាមការអញ្ជើញរបស់លោក ត្រាំ ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ជាការពិត ការបង្កើតតំបន់សុវត្ថិភាពនេះ គឺធ្វើឡើង ក្នុងគោលបំណងបង្កើតលក្ខខណ្ឌចាំបាច់មួយ ដើម្បីធ្វើមាតុភូមិនិវត្តជនភៀសខ្លួនស៊ីរីត្រលប់ទៅប្រទេសវិញ។ ពាក់ព័ន្ធទៅនឹងបញ្ហានេះ តួកគីបានទទួលជនភៀសខ្លួនស៊ីរី ៣,៦លាននាក់រួចមកហើយ ដែលការណ៍នេះបានបង្កឲ្យមានកើនឡើងនៃការប្រតិកម្មពីសំណាក់សាធារណជននៅក្នុងប្រទេសកាន់តែខ្លាំងឡើង។
ដើម្បីដាក់គំនាបទៅលើអាមេរិក រដ្ឋាភិបាលទីក្រុងអង់ការ៉ា បានព្រមានវាយប្រហារចូលទឹកដីស៊ីរី ក្នុងរយៈពេលឆាប់ៗ។ ជាក់ស្តែង សារព័ត៌មានរដ្ឋតួកគីបានផ្សាយថា តួកគីបានបញ្ជូនទ័ពបន្ថែមទៀត ទៅតំបន់ព្រំដែនស៊ីរី។
សូមបញ្ជាក់ថា ប្រតិបត្តិការឯកតោភាគីរបស់តួកគី បង្កឲ្យមានការបារម្ភយ៉ាងខ្លាំងពីសំណាក់ក្រុមប្រទេសលោកខាងលិច។ ចំណែកលោកប្រធានាធិបតី អ៊ែរដូហ្កាន់ វិញបានលើកឡើងថា តួកគីនឹង ប្រុងប្រយ័ត្នជាងមុន ដើម្បីប្រកដថា គ្មានក្រុមជ្រុលនិយមណាមួយ ហ៊ានធ្វើការបះបោរនៅក្នុងតំបន់ឡើយ។
កាលពីឆ្នាំ ២០១៦ ទីក្រុងអង់ការ៉ា បានវាយប្រហារម្តងហើយទៅលើក្រុមអ៊ីស្លាមជ្រុលនិយម។ ចំណែកក្នុងឆ្នាំ២០១៨ តួកគីបានវាយប្រហារលើក្រុម People’s Protection Units (YPG) ដែលជាក្រុមឃើដស៊ីរី ហើយត្រូវបានក្រុងអង់ការ៉ាចោទថា ជាប់ពាក់ព័ន្ធនឹងក្រុមឃើដតួកគី៕
Tag:
តួកគី
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com