លោក នេត្រ ភក្ត្រា៖ ក្នុងមួយថ្ងៃកម្ពុជាមានសំរាមថង់ប្លាស្ទិកប្រមាណ ២,០០០តោន

ជាតិ

លោក នេត្រ ភក្ត្រា៖ ក្នុងមួយថ្ងៃកម្ពុជាមានសំរាមថង់ប្លាស្ទិកប្រមាណ ២,០០០តោន

07, Oct 2019 , 9:39 pm

រូបភាព

លោក នេត្រ ភក្ត្រា អ្នកនាំពាក្យក្រសួងបរិស្ថាន កំពុងផ្តល់បទសម្ភាសដល់អ្នកកាសែត នៅថ្ងៃបិទបញ្ចប់យុទ្ធនាការសប្ដាហ៍បៃតង កាលពីថ្ងៃទី៦ តុលា ឆ្នាំ២០១៩។

ដោយ: ឡាយ សុភាវតី

សំរាមប្រមាណ ១ ម៉ឺនតោន ត្រូវបានបង្កើតឡើងក្នុងមួយថ្ងៃៗនៅកម្ពុជា ក្នុងនោះសំរាមជាង ២០ ភាគរយជាថង់ប្លាស្ទិក ឬស្មើនឹងប្រមាណ ២,០០០តោន។ លោក នេត្រ ភក្ត្រា អ្នកនាំពាក្យក្រសួងបរិស្ថាន លើកឡើងដូច្នេះ នៅក្នុងកម្មវិធីបញ្ចប់យុទ្ធនាការសប្ដាហ៍បៃតងរបស់សហភាពអឺរ៉ុបប្រចាំប្រទេសកម្ពុជា កាលពីថ្ងៃទី៦តុលា ឆ្នាំ២០១៩។

អ្នកនាំពាក្យរូបនេះ បើនិយាយតែនៅរាជធានីភ្នំពេញ មានសំរាមប្លាស្ទិកជាងថង់១០លានថង់ ត្រូវបានបង្កើតឡើងជារៀងរាល់ថ្ងៃ។ កត្តាចម្បងបំផុត ដែលនាំឲ្យការប្រើប្រាស់ថង់ប្លាស្ទិកកើនឡើង គឺការផ្លាស់ប្ដូរឥរិយាបថរបស់ប្រជាពលរដ្ឋ កំណើនសេដ្ឋកិច្ច និងកំណើនប្រជាពលរដ្ឋ។

«សំរាមថង់ប្លាស្ទិក គឺជាបញ្ហាដែលកម្ពុជាកំពុងបារម្ភ»។ នេះជាការបញ្ជាក់របស់ អ្នកនាំពាក្យក្រសួងបរិស្ថាន ដែលបន្តដោយការលើកទឹកចិត្តឲ្យប្រជាពលរដ្ឋផ្លាស់ប្ដូរឥរិយាបថក្នុងការប្រើប្រាស់ថង់ប្លាស្ទិក ដោយការប្រើកន្ត្រក ឬប្រើថង់ប្លាស្ទិករួមពេលទៅផ្សារ និងលាងសម្អាតថង់ប្លាស្ទិចទាំងនោះ ទុកប្រើប្រាស់ឡើងវិញជាដើម។ ជាមួយគ្នានេះ កម្ពុជា ក៏ត្រូវការមានការកែច្នៃប្លាស្ទិកបន្ថែមទៀតដែរ ខណៈបច្ចុប្បន្ន មានរោងចក្រកែច្នៃប្លាស្ទិកតែ៣កន្លែងប៉ុណ្ណោះ នៅកម្ពុជា គឺនៅខេត្តព្រះសីហនុមួយកន្លែង, បាត់ដំបងមួយកន្លែង និងស្វាយរៀងមួយកន្លែង។

កន្លងមក ទីភ្នាក់ងារអភិវឌ្ឍនៃអង្គការសហប្រជាជាតិ UNDP ធ្លាប់បានចេញផ្សាយថា ថង់ប្លាស្ទិកមួយត្រូវការពេលផលិត តែ៥វិនាទីប៉ុណ្ណោះ តែថង់ប្លាស្ទិកទាំងនោះ បំពុលបរិស្ថាន និងមហាសមុទ្ររយៈពេល៥០០ឆ្នាំ៕