ជាតិ
បាក់ឌុប
សម្ដេច ហ៊ុន សែន ៖ សិស្សជាប់និទ្ទេស A ច្រើនឆ្នាំនេះ មិនមែនមកពីបន្ធូរបន្ថយឡើយ
× ភ្នំពេញ៖ សិស្សប្រឡងជាប់និទ្ទេស A ច្រើនឆ្នាំ មិនមែនមកពីក្រសួងអប់រំ យុវជន និងកីឡា ចេញវិញ្ញាសារប្រឡង ដើម្បីបន្ធូរបន្ថយឱ្យសិស្សអាចមានលទ្ធភាពជាប់នោះទេ។ នេះជាការបញ្ជាក់របស់សម្ដេច ហ៊ុន សែន ក្នុងពិធីជួបសំណេះសំណាលជាមួយសិស្សនិទ្ទេស A ចំនួន៤៤៣នាក់ នៅព្រឹកថ្ងៃទី ៧ តុលា។
នាយករដ្ឋមន្ត្រី ហ៊ុន សែន បានសង្កត់ធ្ងន់ថា លទ្ធផលសិស្សប្រឡងជាប់នេះ គឺកើតចេញពីការខិតខំប្រឹងប្រែងរបស់ពួកគេ ចាប់តាំងពីក្រសួងអប់រំ ផ្ដើមយុទ្ធនាការកំណែទម្រង់គុណភាពអប់រំ កាលពីឆ្នាំ២០១៤មក។ បើតាមសម្ដេច ហ៊ុន សែន ក្រសួងអប់រំក៏គ្មានគោលការណ៍បន្ធូរវិញ្ញាសារប្រឡង ដើម្បីឱ្យមានបរិមាណសិស្សប្រឡងជាប់កើនឡើងឡើយ។
សូមស្ដាប់ប្រសាសន៍សម្ដេច ហ៊ុន សែន៖
កន្លងមករដ្ឋមន្ត្រីក្រសួងអប់រំ លោក ហង់ ជួន ណារ៉ុន ធ្លាប់បានប្រាប់សារព័ត៌មានថ្មីៗថា ការចេញវិញ្ញាសាប្រឡង គឺមានលក្ខណ៦កម្រិត ដោយផ្អែកទៅលើពុទ្ធិបេក្ខជន។ បើតាមរដ្ឋមន្ត្រីអប់រំ រាល់ការចេញវិញ្ញាសាប្រឡងម្ដងៗ គឺក្រសួងអប់រំ រៀបចំសំណួរដោយផ្អែកទៅលើការចងចាំ, សំណួរបែបវិភាគ និងការវិវត្តនៅក្នុងសង្គម និងសកលលោកជាដើម។ ក្នុងន័យនេះ លោក ហង់ ជួន ណារ៉ុន បានពន្យល់ថា សំណួរបែបចង់ចាំ គឺផ្ដោតទៅលើសកម្មភាព និងពេលវេលា ដែលបានចារទុកក្នុងប្រវត្តិសាស្ត្ រនៃមេរៀន។ រីឯសំណួរបែបពិចារណាវិញ គឺឱ្យបេក្ខជនចេះរកមូលហេតុ ដែលនាំឱ្យមានព្រឹត្តិការណ៍អ្វីមួយកើតឡើង នៅក្នុងសង្គមជាដើម។
ចំពោះសំណួរដែលក្រសួងចេញប្រឡង៥ឆ្នាំមកនេះ ក៏មិនប្រាកដថាមានបេក្ខជន អាចឆ្លើយត្រូវទាំងអស់ ដូចការរិះគន់នោះទេ។ នេះជាការបញ្ជាក់របស់រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន ដែលឆ្លើយតបទៅនឹងមតិរិះគន់របស់សាធារណជនថា ការប្រឡងមានការរឹតបន្តឹង ដើម្បីបំភាន់ភ្នែកមហាជន ខណៈវិញ្ញាសាចេញប្រឡងធូររលុង ដែលអាចឱ្យបេក្ខជនងាយស្រួលយកពិន្ទុបាន។
សិស្សជាប់និទ្ទេស A ឆ្នាំ២០១៩ ទទួលបានកាក់ពីរ, ប្រាក់ស្លឹងមួយ, សៀវភៅមួយប្រអប់ មានច្បាប់ក្រុមង៉ុយនិងអ៊ូចុង, ថវិកាពីរលានរៀល iPad មួយគ្រឿង, ជូនសិស្សនិទ្ទេស A ទាំង៤៤៣នាក់។ នាយក នាយិកា១៨៨នាក់ ទទួលបាន កាក់មាសពីរ, ប្រាក់ស្លឹង, សៀវភៅក្រុមង៉ុយ និងអ៊ូចុង, ព្រមទាំងថវិកាមួយចំនួន ពីសម្ដេចនាយករដ្ឋមន្ត្រី ហ៊ុន សែន៕
Tag:
ហ៊ុន សែន
និទ្ទេស A
បាក់ឌុប ២០១៩
© រក្សាសិទ្ធិដោយ thmeythmey.com