អន្តរជាតិ
អង្គការសហប្រជាជាតិ អាចនឹងដាច់លុយនៅចុងខែតុលានេះ អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស ថ្លែងនាកិច្ចប្រជុំមហាសន្និបាត។ រូបភាព AFP
×
ដោយ៖ ឈួន ឈីវអ៊ីង
អង្គការសហប្រជាជាតិកំពុងមានឱនភាពថវិកាប្រមាណ ២៣០លានដុល្លារអាមេរិក ហើយក៏ប្រហែលជាដាច់លុយនៅត្រឹមចុងខែតុលានេះដែរ។ នេះបើតាមការបញ្ជាក់របស់អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស (Antonio Guterres) នៅថ្ងៃទី៧ ខែតុលា។
អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស បានសរសេរលិខិតមួយច្បាប់ជូនទៅបុគ្គលិកទាំង៣៧០០០នាក់ក្នុងអគ្គលេខាដ្ឋានអង្គការសហប្រជាជាតិដើម្បីជូនដំណឹងពាក់ព័ន្ធបញ្ហាហិរញ្ញវត្ថុរបស់អង្គការពិភពលោកមួយនេះ។ នេះបើតាមការចុះផ្សាយរបស់សារព័ត៌មាន AFP ។
លិខិតលោក ហ្គូតេរ៉េស មានខ្លឹមសារថា៖ «ប្រទេសជាសមាជិកបានផ្តល់លុយត្រឹមតែ ៧០ភាគរយប៉ុណ្ណោះនៃចំនួនថវិកាសរុប សម្រាប់កញ្ចប់ថវិកាប្រើប្រាស់ជាប្រចាំក្នុងឆ្នាំ ២០១៩។ ហេតុនេះហើយវាធ្វើឲ្យការចំណាយលើសប្រាក់ចំណូល ដល់ទៅ២៣០លានដុល្លារអាមេរិក នៅចុងខែកញ្ញា។ ពួកយើងកំពុងប្រឈមនឹងហានិភ័យនៃការកាត់ថវិកាបម្រុងដើម្បីទូទាត់នៅចុងខែនេះ។»
ដើម្បីកាត់បន្ថយការចំណាយ លោកអគ្គលេខាធិការរូបនេះក៏បានលើកឡើងពីការផ្អាកសន្និសីទ និងកិច្ចប្រជុំនានា ព្រមទាំងរឹតត្បិតការធ្វើដំណើរជាផ្លូវការដែលនឹងអនុញ្ញាតែចំពោះសកម្មភាពចាំបាច់ប៉ុណ្ណោះ ព្រមទាំងការចាត់វិធានការដើម្បីសន្សំសំចៃថាមពលផងដែរ។ លោកបានបន្ថែមថា ទំនួលខុសត្រូវផ្នែកហិរញ្ញវត្ថុ គឺអាស្រ័យលើរដ្ឋជាសមាជិក។ លោក Guterres បានស្នើឲ្យប្រទេសរួមចំណែកដល់ពិភពលោកដើម្បីជួយដោះស្រាយបញ្ហាសាច់ប្រាក់នេះ ប៉ុន្តែត្រូវបានបដិសេធ។
ដោយមិនរាប់បញ្ចូលអ្វីដែលជាការចំណាយសម្រាប់ការថែរក្សាសន្តិភាពពិភពលោក កញ្ចប់ថវិកាប្រតិបត្តិការរបស់អង្គការសហប្រជាជាតិសម្រាប់ឆ្នាំ ២០១៨-២០១៩ គឺជាង៥ពាន់លានដុល្លារ ដោយសហរដ្ឋអាមេរិកបានចូលរួមចំណែក ២២ ភាគរយ។ យ៉ាងណាមិញ រដ្ឋបាលប្រធានាធិបតី ដូណាល់ ត្រាំ ក៏ចាប់ផ្ដើមរឹតត្បិតការផ្ដល់វិភាគទានរបស់អាមេរិកសម្រាប់លេខាធិការដ្ឋាន និងស្ថាប័នរបស់អង្គការនេះជាច្រើនផងដែរ៕
© រក្សាសិទ្ធិដោយ thmeythmey.com