ជាតិ
សង្គមជាតិ
លោក ឃួង ស្រេង ប្រាប់ពលរដ្ឋឲ្យស្រឡាញ់ដើមឈើ ប្រៀបដូចស្រឡាញ់កូនចៅខ្លួន លោក ឃួង ស្រេង អភិបាលរាជធានីភ្នំពេញ ចុះទៅត្រួតពិនិត្យការដាំដើមឈើនៅអមសងខាងគល់ស្ពានជ្រោយចង្វារ កាលពីថ្ងៃទី០៤ ខែតុលា ឆ្នាំ២០១៩
× ភ្នំពេញ៖ អភិបាលរាជធានីភ្នំពេញ ប្រាប់ពលរដ្ឋឲ្យស្រឡាញ់ដើមឈើ ប្រៀបដូចស្រឡាញ់កូនខ្លួន ដើម្បីចូលរួមថែរក្សាសោភ័ណភាពទីក្រុង ។
«សូមប្រជាពលរដ្ឋ ស្រឡាញ់ដើមឈើ ដូចស្រឡាញ់កូនចៅ !ស្រឡាញ់កូនចៅ ដូចស្រឡាញ់ដើមឈើ។ នេះជាការលើកឡើងរបស់អភិបាលរាជធានីភ្នំពេញ លោក ឃួន ស្រេង ដែលបានចុះប្រតិបត្តិការដាំដើមធ្នង់ គគីរ នាងនួន ប្រមាណ៣០០ដើមបន្ថែមនៅគល់ស្ពានជ្រាយចង្វារ ដើម្បីកែប្រែស្ពានជ្រាយចង្វារក្លាយជាឧទ្យានបៃតង និងជាម្លប់សម្រាប់អ្នកធ្វើដំណើរ។
លោក ឃួង ស្រេង ដែលបង្ហាញការយកចិត្តទុកដាក់លើសោភ័ណភាពទីក្រុង ធ្លាប់ប្រាប់អ្នកសារព័ត៌មាននៅក្នុងដំណើរទស្សនកិច្ចឧទ្យានស្ថានទូតបារាំងកន្លងមកថា លោកចង់ឃើញទីក្រុងភ្នំពេញមានដើមឈើធំៗជាច្រើន ដែលប្រកបដោយពណ៌បៃតង សម្រាប់ទុកជាម្លប់ដល់កូនចៅជំនាន់ក្រោយ។ ជាពិសេសលោក ចង់ឃើញមានអាគារខ្ពស់ៗ ដែលប្រកបដោយរុក្ខជាតិពណ៌បៃតង សម្រាប់ទ្រទ្រង់ជីវិតផងដែរ។
លោក ឃួង ស្រេង អភិបាលរាជធានីភ្នំពេញបានបញ្ជាក់ថា បច្ចុប្បន្នរាជធានីភ្នំពេញ បានត្រៀមដើមឈើប្រណិតសម្រាប់ទុកដាំនៅតាមដងផ្លូវ ក្នុងរាជធានីភ្នំពេញរួចជាស្រេចហើយ។
រដ្ឋបាលរាជធានីភ្នំពេញ បានដាំដើមឈើប្រមាណពី២៥០ដើម ទៅ៣០០ដើមនៅអមសងខាងគល់ស្ពានជ្រោយចង្វារ។ ចំណែក រដ្ឋបាលខណ្ឌទួលគោក បានដាំដើមឈើ ប្រភេទដើមធ្នង់ជិត២០០ដើមហើយ នៅតាមដងផ្លូវ និងសួនច្បារ ក្នុងខណ្ឌទួលគោក។ នេះបើតាមការបញ្ជាក់ពីលោក ឯក ឃុន ដឿន អភិបាលខណ្ឌទួលគោក ដែលបានប្រាប់អ្នកសារព័ត៌មានថ្មីៗតាមទូរសព្ទ។
លោក ឯក ឃុន ដឿន អភិបាលខណ្ឌទួលគោក បានអះអាងថា រដ្ឋបាលខណ្ឌនឹងសហការជាមួយសង្កាត់ ដើម្បីទៅត្រួតពិនិត្យដើមឈើ ដែលងាប់នៅតាមផ្ទះរបស់ពលរដ្ឋ និងសន្យាដាំឡើងវិញជំនួសដើមឈើដែលត្រូវងាប់នោះផងដែរ ដើម្បីឲ្យមានផ្ទៃពណ៌បៃតង បរិយាកាសល្អ និងទទួលបានឧស្ម័នអុកស៊ីសែន។
អភិបាលខណ្ឌទួលគោក បានសង្កត់ធ្ងន់ថា ជនណាដែលលួចកាប់បំផ្លាញដើមឈើសាធារណៈ ជននោះនឹងប្រឈមមុខច្បាប់ និងពិន័យជាទឹកប្រាក់។ លោកអះអាងបន្ថែមថា ចំពោះករណីដើមឈើដែលដួលរលំសង្កត់លើរថយន្ត សម្ភារផ្សេងៗ ឬមនុស្ស រដ្ឋបាលរាជធានីភ្នំពេញមិនមានការធានារ៉ាប់រងឡើយ។ លោកលើកឡើងដូច្នេះ ដោយសំអាងថា មិនមានច្បាប់ណាអនុញ្ញាតឲ្យចតរថយន្តនៅក្រោមដើមឈើសាធារណៈឡើយ គឺដើមឈើទុកសម្រាប់ជាម្លប់ដល់អ្នកធ្វើដំណើរ និងសម្រាប់រក្សាសោភ័ណភាពទីក្រុងតែប៉ុណ្ណោះ៕
Tag:
ឃួង ស្រេង
ដើមឈើ
រាជធានីភ្នំពេញ
បរិស្ថាន
© រក្សាសិទ្ធិដោយ thmeythmey.com