កីឡាជាតិ
ជាតិ
CAMSOC គ្រោងបង្កើតគណៈកម្មការកីឡាអាស៊ានប៉ារ៉ាហ្គេម
× សម្តេច ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍(CAMSOC)លើកទី៣២ បានឯកភាពបង្កើតឲ្យមានគណៈកម្មការមួយបន្ថែមទៀត ដើម្បីទទួលបន្ទុករៀបចំការប្រកួតកីឡាអាស៊ានប៉ារ៉ាហ្គេមនៅឆ្នាំ២០២៣។ CAMSOC ក៏គ្រោងបង្កើតត្រាផ្ទាល់ខ្លួន ដើម្បីធានាភាពច្បាស់លាស់ និងជួយសម្រួលដំណើរការការងាររដ្ឋបាល។ សម្តេច ទៀ បាញ់ បានវាយតម្លៃខ្ពស់ចំពោះវឌ្ឍនភាពការងារប្រចាំត្រីមាសទី៣របស់ CAMSOC ថា បានប្រព្រឹត្តទៅយ៉ាងរលូន និងទទួលបានលទ្ធផលល្អ។
CAMSOC នឹងបង្កើតគណៈកម្មការចំណុះមួយបន្ថែមទៀត ដើម្បីទទួលបន្ទុកអភិវឌ្ឍសមត្ថភាពមន្ត្រី អាជ្ញាកណ្តាល ចៅក្រម និងកីឡាករកីឡាការិនីជនពិការ ក៏ដូចជារៀបចំការប្រកួតកីឡាអាស៊ានប៉ារ៉ាហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ នេះបើតាមការបញ្ជាក់របស់សម្តេច ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ នាកិច្ចប្រជុំបូកសរុបការងារប្រចាំត្រីមាសទី៣ និងដាក់ផែនអនុវត្តបន្តរបស់គណៈកម្មការ CAMSOC នៅព្រឹកថ្ងៃទី៨ តុលា នាវិមានមិត្តភាព។
សម្តេច ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២(CAMSOC), រូបភាពពី SEA Games 2023
ការសម្រេចរបស់សម្តេច ទៀ បាញ់ ធ្វើឡើងក្រោយលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជាបានលើកសំណើរ និងពន្យល់ពីអត្ថប្រយោជន៍របស់គណៈកម្មការនេះ ក្នុងការជួយសម្រួលដល់ដំណើរការរៀបចំកីឡាអាស៊ានប៉ារ៉ាហ្គេម ដែលប្រទេសមួយចំនួនក្នុងតំបន់អាស៊ានបានធ្វើកន្លងមក។ បើតាមអគ្គលេខាធិការរូបនេះ ស្ទើរគ្រប់បណ្តាប្រទេសក្នុងតំបន់អាស៊ាន សុទ្ធតែបានបង្កើតឲ្យមានគណៈកម្មការនេះឡើង។
លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា
បើតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា CAMSOC នឹងបន្ថែមសមាសភាពថ្នាក់ដឹកនាំ និងសមាជិកមួយចំនួនទៀត ដើម្បីរៀបចំគណៈកម្មការនេះឲ្យលេចចេញជារូបរាង និងរចនាសម្ព័ន្ធក្នុងការទ្រទ្រង់ដំណើររបស់ខ្លួន។ គណៈកម្មការនេះ មានសិទ្ធិនិងទំហំការងារស្មើគណៈកម្មការដទៃទៀតរបស់ CAMSOC ដែរ។
គណៈកម្មការ CAMSOC បានដំណើរការអស់រយៈពេលជាច្រើនខែមកហើយ ប៉ុន្តែអង្គភាពទទួលបន្ទុករៀបចំការប្រកួតកីឡាស៊ីហ្គេមមួយនេះ ពុំទាន់មានត្រាសម្គាល់របស់ខ្លួននៅឡើយទេ ខណៈដំណើរការកិច្ចការរដ្ឋបាលកន្លងមក ពួកគេប្រើប្រាស់ត្រារបស់គណៈកម្មាធិការជាតិអូឡាំពិកកម្ពុជា។ CAMSOC នឹងដាក់សំណើរទៅកាន់រាជរដ្ឋាភិបាល ដើម្បីសុំកែប្រែអនុក្រឹតក្នុងការបង្កើតត្រាប្រចាំរបស់ខ្លួន។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២
«ជាយន្តការអង្គការ ឬស្ថាប័នមួយត្រូវមានត្រាសម្គាល់។ ត្រាប្រចាំរបស់ CAMSOC គ្រាន់តែជាយន្តការហិរញ្ញវត្ថុ ដែលធ្វើយ៉ាងណាឲ្យស្របគ្នា ព្រោះកាលពីមុនយើងមិនទាន់បង្កើត យើងប្រើប្រាស់ត្រាអូឡាំពិក។ ដូច្នេះកាលណាគណៈកម្មការនេះមានយន្តការដើរហើយ គឺត្រូវតែមានត្រារបស់ខ្លួន ដើម្បីឲ្យស្របតាមអនុលោមភាពហិរញ្ញវត្ថុផង និងនិយាមនៃរដ្ឋបាលផង»។ នេះជាការលើកឡើងរបស់លោក វ៉ាត់ ចំរើន ដែលបានបន្ថែមថា ការបង្កើតត្រានេះ គឺដើម្បីរក្សាភាពត្រឹមត្រូវក្នុងការប្រើប្រាស់ហិរញ្ញវត្ថុ និងជួយសម្រួលកិច្ចការងារេដ្ឋបាលឲ្យកាន់តែប្រសើរ។
ក្រោយវាយតម្លៃខ្ពស់ចំពោះវឌ្ឍនភាពការងារក្នុងត្រីមាសទី៣របស់ CAMSOC ថា បានដំណើរការយ៉ាងរលូន និងទទួលបានលទ្ធផលល្អប្រសើរ រដ្ឋមន្ត្រីក្រសួងការពារជាតិសម្តេច ទៀ បាញ់ បន្តជំរុញនិងដាស់តឿនដល់គណៈកម្មការហិរញ្ញវត្ថុ ឲ្យបង្កើនប្រសិទ្ធិភាពការងារឲ្យកាន់តែខ្លាំងថែមទៀត ដើម្បីធានានិងជៀសវាងការប្រើប្រាស់ថវិការរដ្ឋជាន់គ្នា។ សម្តេចបន្តថា ក្នុងន័យនេះពុំមែនមានន័យថា ការធ្វើការងារកន្លងមករបស់គណៈកម្មការនេះមានកំហុតឆ្គងនោះទេ។ តែយ៉ាងណា CAMSOC នៅមានកិច្ចការជាច្រើន ដែលត្រូវកែសម្រួល និងធ្វើបន្ថែមទៀត ដើម្បីធានាយន្តការការងាររបស់ខ្លួនប្រកបដោយប្រសិទ្ធិភាព។
លោក ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍នៃគណៈកម្មការ CAMSOC បានបញ្ជាក់ថា ក្នុងត្រីមាសទី៣ CAMSOC បានធ្វើកិច្ចការងារជាច្រើនក្នុងការរួមចំណែកអភិវឌ្ឍន៍វិស័យកីឡានៅកម្ពុជា។ គណៈកម្មការនេះបានបញ្ជូនមន្ត្រី គ្រូបង្វឹក អាជ្ញាកណ្តាលចៅក្រមលើប្រភេទកីឡាមួយចំនួនទៅបណ្តុះបណ្តាលជំនាញនៅក្រៅប្រទេស និងរៀបចំវគ្គបណ្តុះបណ្តាលក្នុងប្រទេសដោយហៅអ្នកជំនាញមកពីក្រៅប្រទេស។
លោក ថោង ខុន អនុប្រធានអចិន្ត្រៃយ៍នៃគណៈកម្មការ CAMSOC
លើសពីនេះ បានបញ្ជូនកីឡាករកីឡាការិនីលើប្រភេទកីឡាមួយចំនួនរួមមានតេក្វាន់ដូ WTF, តេក្វាន់ដូ ITF, ហែលទឹក, ប្រដាល់សកល, ហុកគី, សូហ្វតិន្នីស, ទូកក្តោង, ទ្រីយ៉ាត្លុង, បាល់ទាត់, ល្បុក្កតោ និងកាយសម្ព័ន្ធជាដើម ទៅប្រកួត និងហ្វឹកហាត់ពង្រឹងសមត្ថភាពនៅតាមបណ្តាប្រទេសមួយចំនួនក្នុងតំបន់អាស៊ាន និងអាស៊ី។ ការប្រកួតទៀតសោត កម្ពុជាទទួលបានលទ្ធផលល្អគួរជាទីគាប់ចិត្តតាមរយៈការដណ្តើមបានមេដាយមាស ប្រាក់ និងសំរឹទ្ធជាដើម។
«ការចូលរួមប្រកួតនិងបណ្តុះបណ្តាលជំនាញ CAMSOC ទទួលបានលទ្ធផលត្រឡប់មកវិញនូវបទពិសោធប្រកួតនៅលើឆាកអន្តរជាតិយ៉ាងល្អប្រសើរទាំងកំណើនបច្ចេកទេស ការយល់ដឹង បទបញ្ជានៃការប្រកួត ភាពនឹងន និងចិត្តសាស្ត្រក្នុងពេលប្រកួត។ ប្រភេទកីឡាមួយចំនួនបង្កើនការចាប់អារម្មណ៍ពីប្រទេសជាសមាជិក និងទទួលបានការកោតសរសើរពីសហព័ន្ធកីឡាអន្តរជាតិ»។ នេះជាការបង្ហាញលទ្ធផល និងវាយម្លៃចំពោះការហ្វឹកហាត់និងចូលរួមប្រកួតរបស់កីឡាករពីសំណាក់លោក ថោង ខុន ដែលបានបន្ថែមថា អាជ្ញាកណ្តាល ចៅក្រម គ្រូបង្វឹក មានការយល់ដឹងថ្មីៗពីការវិវត្តវិទ្យាសាស្ត្រកីឡា បទបញ្ជាការប្រកួត និងប្រព័ន្ធដឹកនាំ គ្រប់គ្រងជំនាញកីឡាជាដើម។
បើតាមរដ្ឋមន្ត្រីក្រសួងទេសចរណ៍រូបនេះ ហេដ្ឋារចនាសម្ព័ន្ធដែលទ្រទ្រង់ដល់ដំណើររៀបចំការប្រកួតកីឡាស៊ីហ្គេមលើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះក្នុងពហុកីឡដ្ឋានជាតិសាងសង់ស្ទើររួចរាល់ទាំងស្រុងហើយ ខណៈទីលានបាល់ទាត់ ដែលជាជំនួយឥតសំណងរបស់ចិន សាងសង់រួចរាល់បានប្រមាណ៦០ភាគរយហើយ ដោយគ្រោងបញ្ចប់នៅចុងឆ្នាំ២០២០។ ភូមិកីឡាដែលអាចផ្ទុកមនុស្សបានពី៧ពាន់ទៅ១ម៉ឺននាក់ នឹងចាប់សាងសង់ក្នុងពេលឆាប់ខាងមុននេះ ដោយក្រុមហ៊ុនមកពីបារាំងជាអ្នកសាងសង់៕
Tag:
សម្តេច ទៀ បាញ់
យី វាសនា
វ៉ាត់ ចំរើន
CAMSOC
© រក្សាសិទ្ធិដោយ thmeythmey.com