អាមេរិក រឹតត្បិតទិដ្ឋាការមន្ត្រីចិនពាក់ព័ន្ធនឹងការបង្ក្រាបជនជាតិភាគតិចនៅស៊ីនជាំង

អន្តរជាតិ

អាមេរិក រឹតត្បិតទិដ្ឋាការមន្ត្រីចិនពាក់ព័ន្ធនឹងការបង្ក្រាបជនជាតិភាគតិចនៅស៊ីនជាំង

10, Oct 2019 , 10:22 am

រូបភាព

លោកប្រមុខការទូត ម៉ៃ ប៉ុមប៉េអូ

ដោយ: ធៀន ភារិន្ទ

សហរដ្ឋអាមេរិកនៅថ្ងៃ៨ ខែតុលា បានអះអាងថា ខ្លួននឹងរឹតត្បិតទិដ្ឋាការលើមន្ត្រីចិនរហូតដល់រដ្ឋាភិបាលទីក្រុងប៉េកាំងបញ្ឈប់រាល់ការបង្ក្រាបលើជនជាតិវីហ្គ័រ និងជនជាតិភាគតិចផ្សេងទៀតនៅភាគខាងលិចតំបន់ស៊ីនជាំង។ ការប្រកាសបែបនេះ គឺធ្វើឡើងក្រោយ ១ថ្ងៃប៉ុណ្ណោះនៃអាមេរិកប្រកាសដាក់អង្គការចិនចំនួន ២៨ ចូលទៅក្នុងបញ្ជីខ្មៅពាណិជ្ជកម្ម។

រដ្ឋបាលដូណាល់ ត្រាំ បានចាត់វិធានការផ្ទួនៗលើចិនពាក់ព័ន្ធបញ្ហាជនជាតិភាគតិចនៅតំបន់ស៊ីនជាំង ត្រូវបានគេមើលឃើញថា គឺជាវិបត្តិដ៏រ៉ាំរ៉ៃមួយ។ ភាពតានតឹងនេះ គឺកើតឡើងចំពេលអាមេរិក និងចិន កំពុងមានជម្លោះពាណិជ្ជកម្មជាមួយគ្នាផង។

តាមរយៈការសរសេរនៅលើបណ្តាញTwitter ប្រមុខការទូតអាមេរិកលោក ម៉ៃ ប៉ុមប៉េអូ បានលើកឡើងថា ចិនបានឃុំឃាំងដោយបង្ខំលើជនជាតិភាគតិចមូស្លីមជាង១លាននាក់ជាប្រព័ន្ធ ដើម្បីលុបបំបាត់សាសនា និងវប្បធម៌ក្នុងតំបន់ស៊ីនជាំង។ លោកប៉ុមប៉េអូ ជំរុញឲ្យរដ្ឋាភិបាលចិនបញ្ឈប់រាល់ការរំលោភបំពាន សកម្មភាពឃ្លាំមើល និងការបង្ក្រាបយ៉ាងធ្ងន់ធ្ងរលើជនជាតិភាគតិចជាបន្ទាន់ ជាពិសេសគឺត្រូវដោះលែងប្រជាជនឃុំឃាំងទាំងនោះ និងផ្អាកការគំរាមកំហែងជនជាតិមូស្លីមចិននៅក្រៅប្រទេស។

អមជាមួយនឹងសេចក្តីប្រកាសមួយនេះ ប្រមុខការទូតអាមេរិករូបនេះបន្ថែមទៀតថា ក្រសួងការបរទេសអាមេរិក នឹងរឹតត្បិតការផ្តល់ទិដ្ឋាការដល់មន្ត្រីរដ្ឋាភិបាល និងមន្ត្រីបក្សកុម្មុយនិស្តចិនណាដែលពាក់ព័ន្ធនឹងការរំលោភបំពាន និងការឃុំឃាំងជនជាតិវីហ្គ័រ កាហ្សាក់ និងជនភាគតិចផ្សេងទៀតនៅក្នុងខេត្តស៊ីនជាំង។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។

ទាក់ទិននឹងបញ្ហានេះ ក្រសួងការបរទេសអាមេរិក មិនទាន់បានបញ្ជាក់អត្តសញ្ញាណជន ដែលត្រូវរឹតត្បិតច្បាស់លាស់ទេ។ ប៉ុន្តែកន្លងមក អ្នកច្បាប់អាមេរិក បានស្នើឲ្យរឹតត្បិតទៅលើ លោក Chen Quanguo លេខាបក្សកុម្មុយនិស្តចិនក្នុងខេត្តស៊ីនជាំងដែលល្បីឈ្មោះក្នុងការគ្រប់គ្រងក្រុមជនជាតិភាគតិច។

ជាការឆ្លើយតបដូចទៅនឹងសព្វដង ចិន បានច្រានចោលការចោទប្រកាន់របស់អាមេរិក ហើយលើកឡើងថា វាគ្រាន់តែជាលេសរបស់ទីក្រុងវ៉ាស៊ីនតោនប៉ុណ្ណោះ ដើម្បីជ្រែតជ្រែកចូលកិច្ចការផ្ទៃក្នុងរបស់ប្រទេសចិន។ បន្ថែមពីលើនេះ ការចាត់វិធានការបស់រដ្ឋាភិបាលចិនទៅលើជនភាគតិចវីហ្គ័រ គឺមានគោលបំណងប្រឆាំងនឹងភេរវកម្មនិយម និងភាពជ្រុលនិយម ហើយចំណាត់ការខាងលើ គឺស្របតាមច្បាប់ជាតិ និងអន្តរជាតិ ជាពិសេសត្រូវបានគាំទ្រដោយក្រុមជនជាតិភាគតិច ២៥លាននាក់ផ្សេងទៀត នៅក្នុងខេត្តស៊ីនជាំង។ នេះបើតាមការសរសេរនៅលើបណ្តាញ Twitter របស់ស្ថានទូតចិនប្រចាំនៅទីក្រុងវ៉ាស៊ីនតោន។

ចំណែកក្រសួងការបរទេសចិនក៏មិននៅស្ងៀមដែរ ចំពោះការចោទប្រកាន់នេះ។ អ្នកនាំពាក្យក្រសួងការបរទេសលោក Geng Shuang បានច្រានចោលការចោទប្រកាន់គ្មានមូលដ្ឋានមួយនេះ ហើយបញ្ជាក់ថា ការរឹតត្បិតទិដ្ឋាការរបស់អាមេរិក គឺជាការរំលោភបំពានយ៉ាងធ្ងន់ធ្ងរ លើមូលដ្ឋានច្បាប់ទំនាក់ទំនងអន្តរជាតិ។ ដូចស្ថានទូតចិននៅទីក្រុងវ៉ាស៊ីនតោនដែរ អ្នកនាំពាក្យរូបនេះនិយាយថា ស៊ីនជាំង គឺជារឿងផ្ទៃក្នុងរបស់ចិនសុទ្ធសាធ ហើយវិធានការនៅទីនោះ គឺដើម្បីទប់ស្កាត់ភេរវកម្មនិយមតែប៉ុណ្ណោះ ។

សូមបញ្ជាក់ថា ការប្រកាសរឹតត្បិតផ្តល់ទិដ្ឋាការឲ្យមន្ត្រីចិនបែបនេះ គឺក្រោយតែមួយថ្ងៃប៉ុណ្ណោះ បន្ទាប់ពីអាមេរិកបានដាក់អង្គការចិនចំនួន ២៨ចូលទៅក្នុងបញ្ជីខ្មៅ ដោយក្នុងនោះរួមមានក្រុមហ៊ុនបច្ចេកវិទ្យាល្បីឈ្មោះលំដាប់ពិភពលោក Hikvision ផងដែរ។ គួររំលឹកថា កាលពីលើកមុន លោកប្រមុខការទូតអាមេរិកបានរិះគន់ម្តងហើយទៅលើរដ្ឋាភិបាលចិនពាក់ព័ន្ធនឹងជនជាតិភាគតិចវីហ្គ័រនេះ ហើយថែមទាំងប្រៀបករណីមួយនេះ ទៅនឹងការឃុំឃាំងមនុស្សក្នុងរបបណាស៊ីអាល្លឺម៉ងផងដែរ៕