អន្តរជាតិ
សភាម៉ាឡេស៊ី បោះឆ្នោតលុបចោលច្បាប់ស្តីពីព័ត៌មានមិនពិត
× សមាជិកសភាម៉ាឡេស៊ីនៅថ្ងៃទី៩ ខែតុលា បានបោះលុបចោលច្បាប់ដ៏ចម្រូងចម្រាសមួយ ពាក់ព័ន្ធនឹងព័ត៌មានមិនពិត។ ចំពោះច្បាប់នេះ ត្រូវបានគេរិះគន់ថា មានបំណងបង្ក្រាបលើមតិរិះគន់ទាំងឡាយ។ ចំណែកទណ្ឌកម្មនៃការផ្សព្វផ្សាយព័ត៌មានមិនពិត គឺដាក់ទោសឲ្យនៅក្នុងគុករយៈពេល ៦ឆ្នាំ។ នេះជាលើកទីពីរដែលសភាជាន់ទាបម៉ាឡេស៊ីបោះឆ្នោតលុបចោលច្បាប់នេះ បន្ទាប់ពីត្រូវបានសភាជាន់ខ្ពស់ជំទាស់កាលពីការបោះឆ្នោតលើកទីមួយ។
ច្បាប់ព័ត៌មានក្លែងក្លាយ មានគោលបំណងដាក់ទណ្ឌកម្មលើជនទាំងឡាយណា បានផ្សព្វផ្សាយព័ត៌មានណាមួយ ហើយដែលអាជ្ញាធរចាតុទុកថា ជាព័ត៌មានមិនពិត។ តាមច្បាប់នេះ បុគ្គលដែលប្រព្រឹត្តខុស នឹងត្រូវផាកពិន័យរហូតដល់ ១២ម៉ឺនដុល្លារ ចំពោះការបង្កើតព័ត៌មានមិនពិតតាមរយៈការបោះពុម្ភផ្សាយ ដល់ការផ្សព្វផ្សាយរយៈបណ្តាញសង្គមផ្សេងៗ។
ច្បាប់ស្តីពីព័ត៌មានមិនពិតនេះ ត្រូវបានសភាជាន់ទាបបោះឆ្នោតឲ្យលុបចោលម្តងហើយកាលពីឆ្នាំមុន ប៉ុន្តែត្រូវទទួលបរាជ័យទៅវិញ ព្រោះសភាជាន់ខ្ពស់ដែលគ្រប់គ្រងដោយបក្សប្រឆាំង បដិសេធចោលការលុបចោលនេះ។ ជាការព្យាយាមលើកទីពីរ នៅថ្ងៃទី៩ ខែតុលាសភាជាន់ទាបម៉ាឡេស៊ី ក៏បោះឆ្នោតលុបចោលច្បាប់នេះម្តងទៀត ហើយទទួលបានសំឡេង គាំទ្រ៩២ទល់នឹង៥១។ មានន័យថា ច្បាប់នេះ អាចលុបចោលបានហើយ ដ្បិតសភាជាន់ខ្ពស់មិនអាចជំទាស់លើកទីពីរបានឡើយ។
ច្បាប់ដ៏ចម្រូងចម្រាសនេះ ត្រូវបានបង្កើតឡើងនៅក្នុងអាណត្តិរបស់លោក ណាជីប រ៉ាហ្សាក់ ក្នុងគោលបំណងទប់ស្កាត់មតិរិះគន់មកលើរដ្ឋាភិបាល និងនាយករដ្ឋមន្ត្រីផ្ទាល់ ជាពិសេសពាក់ព័ន្ធនឹងរឿងអាស្រូវមូលនិធិ រដ្ឋ 1MDB ។ តាមការលើកឡើងរបស់លោក Mohamed Hanipa Maidin អនុរដ្ឋមន្ត្រីនៅក្នុងការិយាល័យនាយករដ្ឋមន្ត្រីក្នុងកិច្ចប្រជុះសភា ច្បាប់នេះ គឺមានធាតុផ្សំជាច្រើន ដែលបង្កឲ្យមានការរំលោភបំពានយ៉ាងខ្លាំងនៅក្នុងប្រទេសម៉ាឡេស៊ី។
ស្រដៀងគ្នាទៅនឹងលោក Mohamed ដែរ សមាជិកសភាជាន់ទាបលោក Charles Santiago បានបញ្ជាក់ប្រាប់សារព័ត៌មាន AFP ថា ច្បាប់នេះ បង្កើតឡើងគឺគ្រាន់តែចង់បិទបាំងនូវការរំលោភបំពាន និងអំពើពុករលួយរបស់រដ្ឋាភិបាលលោក ណាជីប តែប៉ុណ្ណោះ។
សូមបញ្ជាក់ថា ច្បាប់មួយនេះ ត្រូវបានរដ្ឋាភិបាលម៉ាឡេស៊ីថ្មីចាត់ទុកថា មិនសំខាន់ទៀតទេ ព្រោះទាក់ទងនឹងការគ្រប់គ្រងព័ត៌មានមិនពិត រដ្ឋាភិបាលទីក្រុងគូឡាឡាំពួ អាចដោះស្រាយជាមួយច្បាប់ផ្សេងៗបាន ដូចជា ច្បាប់ព្រហ្មទណ្ឌ ច្បាប់ស្តីពីការបោះពុម្ភ និងផ្សព្វផ្សាយសារព័ត៌មានជាដើម។ គួររំលឹកថា ដោយសារតែច្បាប់ព័ត៌មានមិនពិតនេះ អតីតនាយករដ្ឋមន្ត្រី Najib បានស៊ើបអង្កេតលោក មហាធៀ មហាម៉ាត់ ដែលជាគូប្រឆាំងកាលពីមុនការបោះឆ្នោតក្នុងឆ្នាំ២០១៨ ពីបទចែកចាយព័ត៌មានមិនពិត៕
© រក្សាសិទ្ធិដោយ thmeythmey.com