ជាតិ
សម្ដេច ហ៊ុន សែន៖ សមិទ្ធផល ដែលបានមកដោយស្រួលពេក ពិបាកការពារ
× ភ្នំពេញ៖ មេដឹកនាំកម្ពុជា ប្រកាសជាថ្មីឱ្យមន្ត្រីរដ្ឋាភិបាលទាំងអស់ ខិតខំថែរក្សាសមិទ្ធផលខ្លួន ដែលបានកសាងក្រោយពីរំដោះប្រទេសចេញពីសង្គ្រាម មកដល់បច្ចុប្បន្ននេះ។ សម្រាប់សម្ដេច ហ៊ុន សែន សមិទ្ធផលដែលមកដោយការលំបាកនេះ មិនអាចឱ្យបាត់បង់ទៅវិញឡើយ។
ថ្លែងចំពោះមុខមន្ត្រីរដ្ឋាភិបាល អង្គទូតនានា នៅកម្ពុជា លោកនាយករដ្ឋមន្ត្រី ហ៊ុន សែន បានរំឭកពីការតស៊ូរបស់ខ្លួន រួមទាំងមន្ត្រីស្ម័គ្រស្មោះ ដែលប្រឹងទាញកម្ពុជាចេញពីសង្គ្រាម ។ ចលនាតស៊ូប្រឆាំងរបប ប៉ុល ពត, ការចរចាបញ្ចប់សង្គ្រាមរវាងខ្មែរ និងខ្មែរ និងការប្រឹងប្រែងរស់នៅ ក្រោមសម្ពាធទណ្ឌកម្មសេដ្ឋកិច្ច សុទ្ធតែជាសាវតារឿង ដែលសម្ដេច ហ៊ុន សែន រៀបរាប់ជាថ្មី ប្រាប់ទៅមន្ត្រី និងអង្គទូត។
ដោយសារធ្លាប់ឆ្លងកាត់បញ្ហាទាំងនេះ ទើបប្រមុខរដ្ឋាភិបាល ប្រាប់ឱ្យមន្ត្រីខ្លួន ប្រឹងការពារសមិទ្ធផលខ្លួន ដែលមានបច្ចុប្បន្ន ហើយបន្តអភិវឌ្ឍន៍ទៅថ្ងៃអនាគត។ ក្នុងពិធីប្រារព្ធខួបអនុស្សាវរីយ៍លើកទី៤០ នៃការបង្កើតធនាគារជាតិនៃកម្ពុជាឡើងវិញ មេដឹកនាំកម្ពុជារូបនេះ បាននិយាយដូច្នេះថា៖«សមិទ្ធផល ដែលបានមកដោយស្រួលពេក ពិបាកការពារវិញទេ ប៉ុន្តែនេះជាសមិទ្ធផល ដែលមកដោយការខិតខំរបស់យើង…។ សមិទ្ធផលដែលកើតចេញពីការលំបាក និងការខិតខំប្រឹងប្រែងខ្លួន គឺជាសមិទ្ធផល ដែលយើងត្រូវខំការពារ»។
មិនតែប៉ុណ្ណោះ សម្ដេច ហ៊ុន សែន បានសង្កត់ធ្ងន់ថា កម្ពុជាធ្លាប់ទណ្ឌកម្មសេដ្ឋកិច្ច ប៉ុន្តែកម្ពុជាមិនស្លាប់ទេ។ «ល្បែងទណ្ឌកម្ម មិនអាចសម្លាប់អ្នកណាបានទេ! កុំទៅឆ្ងល់ពេក»។ នេះជាការព្រលយសម្ដីរបស់សម្ដេច ហ៊ុន សែន នៅគ្រាដែលរៀបរាប់ពីសមិទ្ធផលខ្លួន ដែលបានដឹកនាំប្រទេសចាកចេញពីភ្លើងសង្គ្រាម៕
Tag:
ហ៊ុន សែន
សេដ្ឋកិច្ច
សង្គ្រាម
© រក្សាសិទ្ធិដោយ thmeythmey.com