ជាតិ
សេដ្ឋកិច្ច
កម្ពុជាអនុវត្តគម្រោងកសិកម្ម តម្លៃ១១០លានដុល្លារ ក្នុងខេត្តចំនួន១២ សិក្ខាសាលាស្តីពីការចាប់ផ្តើមអនុវត្តគម្រោងពិធិពកម្មវិស័យកសិកម្មកម្ពុជា ឆ្នាំ២០១៩-២០២៥ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។ រូបថត ពីក្រសួងកសិកម្ម។
× ភ្នំពេញ៖ គម្រោងពិពិធកម្មវិស័យកសិកម្មកម្ពុជា(CASDP)ក្នុងខេត្តចំនួន១២ ដែលមានតម្លៃ១១០.៦៥លានដុល្លារ ចាប់ផ្តើមអនុវត្តក្នុងឆ្នាំ២០១៩ដល់ឆ្នាំ២០២៥។ ទំហំទឹកប្រាក់ទាំងនេះ មាន១០លានដុល្លារជាថវិកាបដិភាគរបស់រដ្ឋាភិបាលកម្ពុជា និងជាង១០០.៦៥លានដុល្លារទៀត ជាជំនួយរបស់ធនាគារពិភពលោក(World Bank)។ នេះបើយោងតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១០តុលា។
រដ្ឋមន្ត្រីកសិកម្មលោក វេង សាខុន បានបញ្ជាក់ថា គម្រោងពិពិធកម្មវិស័យកម្ពុជា(Cambodia Agriculture Sector Diversification Project, CASDP)នេះ នឹងបំពេញតួនាទីយ៉ាងសំខាន់ ក្នុងការជួយសម្របសម្រួលការវិនិយោគធុរកិច្ចកសិកម្ម, ជំរុញ និងលើកទឹកចិត្តការវិនិយោគកសិដ្ឋាននិងសម្ភារកសិកម្ម រួមទាំងកាលានុវត្តភាពធុរកិច្ចកសិកម្ម។ បើតាមលោក វេង សាខុន គម្រោងនេះ ក៏ជួយពង្រឹងនិងផ្សារភ្ជាប់តម្លៃទីផ្សារ ជាពិសេសកំណត់ហេដ្ឋារចនាសម្ព័ន្ធគាំទ្រសំខាន់ៗ ដែលជាមូលដ្ឋានគ្រឹះក្នុងការដោះស្រាយបញ្ហា ដើម្បីគាំទ្រធុរកិច្ចក្នុងវិស័យកសិកម្មនៅកម្ពុជា។
ដើម្បីអនុវត្តគម្រោងអភិវឌ្ឍវិស័យកសិកម្មនេះឱ្យមានប្រសិទ្ធភាព លោក វេង សាខុន រដ្ឋមន្ត្រីក្រសួងកសិកម្ម បានណែនាំឲ្យអង្គភាពអនុវត្តនៃគម្រោងខាងលើ ត្រូវធ្វើបច្ចុប្បន្នភាពគោលដៅ គោលបំណង និងសកម្មភាពថ្មីៗ ក៏ដូចជាការរៀនសូត្របន្ថែមទៀត ដើម្បីឲ្យស្របទៅនឹងការវិវឌ្ឍន៍នៃបច្ចេកវិទ្យាថ្មីៗ ក្នុងស្ថានភាពសេដ្ឋកិច្ចនៃសាកលភាវូបនីយកម្ម។ រដ្ឋមន្ត្រីកសិកម្មរូបនេះ បានបញ្ជាក់ដូច្នេះថា៖« គម្រោងពិធិពកម្មវិស័យកម្ពុជា ពិតជាចូលរួមចំណែកក្នុងការសម្រេចនូវកំណើនសេដ្ឋកិច្ចជាតិ ចក្ខុវិស័យ ទិសដៅ និងឆ្លើយតបទៅនឹងតម្រូវការពិតប្រាកដរបស់ប្រជាជន និងយុទ្ធសាស្ត្ររបស់រាជរដ្ឋាភិបាលក្នុងបរិបទបច្ចុប្បន្ននេះ»។
រាជធានី-ខេត្តទាំង១២ ដែលត្រូវអនុវត្តគម្រោងនេះ រួមមាន កំពង់ឆ្នាំង បាត់ដំបង ព្រះវិហារ សៀមរាប ស្ទឹងត្រែង រតនគីរី មណ្ឌលគីរី ក្រចេះ ត្បូងឃ្មុំ កំពង់ចាម កណ្តាល កំពង់ស្ពឺ និងរាជធានីភ្នំពេញ៕
Tag:
កសិកម្ម
ពិធិពកម្ម
World Bank
© រក្សាសិទ្ធិដោយ thmeythmey.com