មន្ត្រីអាមេរិកថា ប្រតិបត្តិការយោធាតួកគីក្នុងទឹកដីស៊ីរី មិនទាន់ផុតបន្ទាត់ក្រហមលោក ត្រាំ ឡើយ

អន្តរជាតិ

មន្ត្រីអាមេរិកថា ប្រតិបត្តិការយោធាតួកគីក្នុងទឹកដីស៊ីរី មិនទាន់ផុតបន្ទាត់ក្រហមលោក ត្រាំ ឡើយ

11, Oct 2019 , 9:59 pm

រូបភាព

ប្រភពរូប៖ AFP

ដោយ:

ការបើកយុទ្ធនាការយោធាចូលទឹកដីស៊ីរីពីសំណាក់ប្រទេសតួកគី ពុំទាន់ហួសបន្ទាត់ក្រហម ដែលប្រកាសដោយលោកប្រធានាធិបតីអាមេរិក ដូណាល់ ត្រាំ នៅឡើយទេ។ មន្ត្រីអាមេរិកម្នាក់ បញ្ជាក់បែបនេះ ដោយបន្ថែមថា ក្រុងវ៉ាស៊ីនតោនចង់ធ្វើជាអ្នកចចារដើម្បីបង្កើតបទឈប់បាញ់ទៀតផង។

សួរថាតើសកម្មភាពបែបណានឹងបំពានការព្រមានរបស់លោកត្រាំ មន្ត្រីអាមេរិក បានឆ្លើយតបថា៖ «ទង្វើទាំងនោះ គឺ រួមមាន ការបោសសម្អាតជាតិសាសន៍ [...] ការវាយប្រហារដែនអាកាស, ផ្ទាល់ដី និងការបាញ់ប្រហារផ្សេងទៀតដោយតម្រង់លើប្រជាជនស្លូតត្រង់»។

«នេះ គឺជាអ្វីដែលយើងកំពុងរកមើលនៅពេលនេះ។ យើងពុំទាន់ឃើញភស្តុតាងជាក់លាក់ណាមួយនៅឡើយទេ ក៏ប៉ុន្តែយើងតាមដានជាប់ជានិច្ច»។ មន្ត្រីអាមេរិក ដែលសុំមិនបញ្ចេញឈ្មោះ ប្រាប់ទីភ្នាក់ងារព័ត៌មាន AFP បែបនេះ។

មន្ត្រីរូបនេះ បន្តថា ប្រតិបត្តិការយោធាដែលចាប់ផ្តើមកាលពីថ្ងៃពុធ ទី៩ តុលា មិនទាន់មានទ្រង់ទ្រាយធំនៅឡើយទេ ។ ត្រង់នេះ លោក សង្កត់ធ្ងន់ថា កងកម្លាំងឃើដ ពុំទាន់ប្រលូកចូលក្នុងសមរភូមិនេះជ្រៅនៅឡើយទេ ហើយកម្លាំងក្រុមនេះពុំមានចំនួនច្រើនឡើយនៅតាមបណ្តាយព្រំដែន។

លោក ត្រាំ រងការរិះគន់យ៉ាងខ្លាំងថាបានបោះបង់ចោលសកម្មប្រយុទ្ធឃើដ ដែលជាសម្ព័ន្ធមិត្តជួយដឹកនាំការវាយប្រឆាំងក្រុមរដ្ឋឥស្លាម។ យ៉ាងណាមិញ មេដឹកនាំអាមេរិករូបនេះ ហៅយុទ្ធនាការរបស់តួកគីជាគំនិតអាក្រក់ ហើយថា លោកមិនដែលផ្ដល់អនុញ្ញាតឲ្យរឿងបែបនេះកើតឡើងឡើយ។ ដោយគំរាមកម្ទេចសេដ្ឋកិច្ចតួកគី លោក ត្រាំ ក៏សង្ឃឹមថា យោធាតួកគី នឹងការពារជនស៊ីវិល និងជនភាគតិចនានា ហើយធ្វើយ៉ាងណាបញ្ចៀសមិនឲ្យមានវិបត្តិមនុស្សធម៌ឲ្យសោះ។

តាមរយៈបណ្តាញ Twitter នៅថ្ងៃព្រហស្បតិ៍ ទី១០ តុលា លោកប្រធានាធិបតី ដូណាល់ ត្រាំ បាននិយាយថា លោកសង្ឃឹមធ្វើជាអ្នកសម្រុះសម្រួលបង្កើតកិច្ចព្រមព្រៀងមួយរវាងតួកគី និងសកម្មប្រយុទ្ធឃើដ ។ បើមិនដូច្នោះទេ លោកអាចបញ្ជូនទ័ពរាប់ពាន់នាក់ទៅកាន់តួកគី ឬដាក់ទណ្ឌកម្មសេដ្ឋកិច្ចធ្ងន់ធ្ងរលើក្រុងអង់ការ៉ា។

ទាក់ទិននឹងការលើកឡើងរបស់ប្រធានាធិបតីនេះ មន្ត្រីអាមេរិក បាននិយាយថា លោក ត្រាំ បានបញ្ជាឲ្យក្រុមអ្នកការទូតស្វះស្វែងរកដំណោះស្រាយដើម្បីបញ្ចប់អំពើហិង្សានេះ។ លោកនិយាយបែបនេះ៖«យើងទទួលបញ្ជាពីប្រធានាធិបតីឲ្យព្យាយាមរកវិធីសាស្ត្រដើម្បីបង្កើតបទឈប់បាញ់»។ ម្យ៉ាងវិញទៀត លោក កត់សម្គាល់ថា កន្លងទៅ តួកគីធ្លាប់បានបង្កើតបទឈប់បាញ់ជាមួយគណបក្សពលករឃើដ(PPK) ដែលបង្កភាពវឹកវររាប់ទសវត្សរ៍ក្នុងប្រទេសតួកគី។

មេដឹកនាំតួកគី ក៏ដូចជារដ្ឋបាលលោកត្រាំ ភ្ជាប់ករណីបក្ស PKK ទៅនឹងអង្គភាពការពាររបស់ប្រជាជនឃើដ (YPG) ដែលគ្របដណ្តប់កម្លាំងប្រជាធិបតេយ្យស៊ីរី (SDF) ក្នុងប្រទេសស៊ីរី ។ មន្ត្រីរូបនេះ បញ្ជាប់បែបនេះ៖«នេះជាផ្លូវដែលប្រធានាធិបតីនឹងពេញចិត្តធ្វើបំផុត។ វាគឺជាដំណោះស្រាយការចរចាមួយ»។