អន្តរជាតិ
សិង្ហបុរី វ៉ាអាមេរិកក្លាយជាប្រទេសមានសេដ្ឋកិច្ចប្រកួតប្រជែងជាងគេបំផុតក្នុងពិភពលោក រូបភាព AFP
×
ដោយ ឈួន ឈីវអ៊ីង
សិង្ហបុរី ដណ្ដើមចំណាត់ទីមួយពីអាមេរិក ក្លាយជាប្រទេសដែលមានសេដ្ឋកិច្ចប្រកួតប្រជែងជាងគេបំផុតក្នុងឆ្នាំ២០១៩ ។ បុរីរដ្ឋមួយនេះ ទទួលបានពិន្ទុ ៨៤,៨ លើ ១០០ ឈរលើអាមេរិក និងឈរនៅកំពូលតារាងចំណាត់ថ្នាក់សេដ្ឋកិច្ចទាំង១៤១ ទូទាំងពិភពលោក។ នេះបើតាមការធ្វើបច្ចុប្បន្នភាពតារាងសេដ្ឋកិច្ចសាកលរបស់វេទិកាសេដ្ឋកិច្ចពិភពលោក (WEF) ។
វេទិកាសេដ្ឋកិច្ចពិភពលោក យកសសរស្ដម្ភចំនួន១២ ដើម្បីវាយតម្លៃពីភាពប្រកួតប្រជែងផ្នែកសេដ្ឋកិច្ចរបស់ប្រទេស និងតំបន់ចំនួន១៤១ ។ រដ្ឋទៅពីតំបន់អាស៊ាន គឺសិង្ហបុរី ទទួលបានចំណាត់ល្អស្ទើរគ្រប់លក្ខខណ្ឌវាយតម្លៃទាំងអស់។ សិង្ហបុរីបានជាប់ចំណាត់ថ្នាក់លេខ១ សម្រាប់ហេដ្ឋារចនាសម្ព័ន្ធដែលជាសសរស្តម្ភមួយក្នុងចំណោមសសរស្តម្ភទាំង១២ ។
វេទិកាពិភពលោកបាននិយាយក្នុងរបាយការណ៍ថ្ងៃទី៩ តុលាថា សិង្ហបុរី រីកចម្រើនដោយសារមានមូលដ្ឋានខ្ពស់រួចទៅហើយ។ បើតាមរបាយការណ៍របស់ WEF ប្រទេសនេះ ក៏ទទួលបានចំណាត់ថ្នាក់លេខ ១ លើសសរស្តម្ភពីរទៀត គឺអត្រាសង្ឃឹមរស់របស់ពលរដ្ឋបានយូរជាងគេ និងផ្នែកទីផ្សារការងារ។ ក្រៅពីនោះ សិង្ហបុរី ទទួលបានពិន្ទុខ្ពស់លើវិស័យមួយចំនួនទៀតរួមមាន ប្រព័ន្ធហិរញ្ញវត្ថុ ប្រសិទ្ធិភាពទិផ្សារ និងស្ថេរភាពម៉ាក្រូសេដ្ឋកិច្ច។
ចំពោះគុណភាពស្ថាប័នសាធារណៈវិញ សិង្ហបុរីទទួលបានលេខ២ នៅក្រោយហ្វាំងឡង់ ប៉ុន្តែគេមិនមានទិន្នន័យច្បាស់ពីដំណើរការក្នុងវិស័យនេះ ព្រោះការត្រួតពិនិត្យ និងតុល្យភាពមានកំណត់។ ប្រការគួរកត់សម្គាល់នោះ ប្រទេសនេះទទួលបានចំណាំត់ថ្នាក់លេខ ១២៤ ក្នុងតារាងសេរីភាពសារព៍ត៌មាន និងកង្វះការប្តេជ្ញាចិត្តចំពោះនិរន្តរភាព។
របាយការណ៍របស់ WEF បានលើកយោបល់ឲ្យសិង្ហបុរីជំរុញសហគ្រិនភាព និងលើកកម្ពស់ជំនាញមូលដ្ឋានរបស់ខ្លួនដើម្បីក្លាយជាមជ្ឈមណ្ឌលនវនុវត្តន៍របស់ពិភពលោក។ នេះបើតាមការផ្សាយរបស់សារព័ត៌មាន The Strait Times ។
ដោយឡែក សម្រាប់សហរដ្ឋអាមេរិកវិញ កាលពីឆ្នាំមុនគឺទទួលបានលេខ១ ជាមួយលំដាប់ពិន្ទុ ៨៣.៧ តែឆ្នាំនេះត្រូវបានធ្លាក់មកនៅលេខ២។ ទោះបីជាមានលទ្ធផលខ្សោយជាទូទៅនៅឆ្នាំនេះក្តី សហរដ្ឋអាមេរិក នៅតែជាប្រទេសមួយដែលមានសេដ្ឋកិច្ចប្រកួតប្រជែងខ្លាំងបំផុតនៅលើពិភពលោក។ អាមេរិក នៅតែជាមហាអំណាចផ្នែកច្នៃប្រឌិតថ្មីដោយឈរនៅលំដាប់ទី ២ លើសសរស្តម្ភសមត្ថភាពច្នៃប្រឌិត និងឈរចំណាត់លេខ១ ទាក់ទងនឹងសក្ដានុពលអាជីវកម្ម ព្រមទាំងមានប្រព័ន្ធហិរញ្ញវត្ថុមួយដែលមានឥទ្ធិពលបំផុតនៅលើពិភពលោក។
ហុងកុង ស្ថិតនៅលេខរៀងទី៣ ខណៈហូឡង់ឈរនៅលំដាប់ទី៤ និងប្រទេសស្វ៊ីសនៅលំដាប់ទី៥។
ខាងក្រោមនេះជាប្រទេសដែលមានសេដ្ឋកិច្ចប្រកួតប្រជែងខ្លាំងជាងគេទាំង១០ក្នុងពិភពលោក៖
1. សិង្ហបុរី
2. សហរដ្ឋអាមេរិក
3. ហុងកុង
4. ហូឡង់
5. ស្វ៊ីស
6. ជប៉ុន
7. អាល្លឺម៉ង់
8. ស៊ុយអែត
9. អង់គ្លេស
១០. ដាណឺម៉ាក៕
© រក្សាសិទ្ធិដោយ thmeythmey.com