ម្តាយភ្លេចបិទ App ក្នុងទូរសព្ទ កូនអាយុ២ឆ្នាំចុចបញ្ជាទិញឥវ៉ាន់អស់៤៣០ដុល្លារ

ព័ត៌មានជាតិ

ព័ត៌មានអន្តរជាតិ

រថយន្ត

វីដេអូ

បទយកការណ៍/សម្ភាស

យុវជនសកម្ម សេវាល្អ

អន្តរជាតិ

ម្តាយភ្លេចបិទ App ក្នុងទូរសព្ទ កូនអាយុ២ឆ្នាំចុចបញ្ជាទិញឥវ៉ាន់អស់៤៣០ដុល្លារ

13, Oct 2019 , 10:19 pm

រូបភាព

ដោយ: ធីតា

អ្នកស្រី Isabella McNeil ដែលរស់នៅ San Diego សហរដ្ឋអាមេរិក បានឈរស្រឡាំងកាំង បន្ទាប់ពីមានអ្នកទូរសព្ទប្រាប់ថា កៅអីសាឡុងកំពុងត្រូវបានដឹកទៅផ្ទះរបស់គាត់។ ក្រោយមកទើបគាត់ភ្ញាក់ខ្លួនថា កូនស្រីអាយុ២ឆ្នាំរបស់គាត់ បានបញ្ជាទិញឥវ៉ាន់នេះ ដោយចៃដន្យតាមរយៈ Amazon ក្នុងតម្លៃ៣៥០ផោន (ប្រមាណ៤៣០ដុល្លារអាមេរិក)។

យោងតាមការផ្សាយរបស់ NBC San Diego អ្នកស្រី Isabella បានរៀបរាប់ថា គាត់ធ្លាប់បើក App ក្រុមហ៊ុន Amazon ដើម្បីស្វែងរកមុខទំនិញដែលត្រូវទិញដាក់ផ្ទះ ប៉ុន្តែនៅពេលនោះ កូនស្រីអាយុ២ឆ្នាំឈ្មោះ Rayna បានស្រែកសុំទូរសព្ទ ដោយថា «ម៉ាក់ៗ ទូរសព្ទ! ម៉ាក់ៗ ទូរសព្ទ»។

គាត់បានឲ្យទូរសព្ទទៅកូន ដោយមិនបានបិទ App ជាពិសេសចំណាក់កាលចុងក្រោយ ដោយក្មេងស្រីតូចរូបនោះ គ្រាន់តែចុច 1-click កៅអីសាឡុងដែលមានពូកបី ត្រូវបានបញ្ជាទិញរួចរាល់។

ក្រោយដឹងថា កូនស្រីបានទិញទំនិញដែលមិនត្រូវការចាំបាច់ អ្នកស្រី Isabella បានព្យាយាមលុបការបញ្ជាទិញ ប៉ុន្តែវាយឺតពេលទៅហើយ។ បន្ទាប់មក គាត់បានប្រកាសលក់វិញ ក្នុងតម្លៃទាប។ ជាសំណាងល្អ តំណាងក្រុមហ៊ុន Amazon បានដឹងរឿងរ៉ាវនេះ ក៏បានសម្រេចសងលុយទាំងអស់ទៅអ្នកស្រី Isabella វិញ ចំណែកទំនិញ ស្ត្រីរូបនេះ អាចយកទៅប្រើប្រាស់ ឬបរិច្ចាគសប្បុរសធម៌ទៅតាមចិត្តរបស់ខ្លួន។

Amazon បានណែនាំទៅអ្នកស្រី Isabella ដាក់ Disable (មិនដំណើរការ) នៅលើដំណាក់កាល 1-click។ ស្ត្រីអាមេរិករូបនេះ បានលើកឡើងថា ករណីរបស់ខ្លួនគឺជារឿងដ៏គួរឲ្យចង់សើច ប៉ុន្តែវាជាមេរៀនមួយសម្រាប់ឪពុកម្តាយទូទៅ ប្រុងប្រយ័ត្ន និងបិទ App ឲ្យបានត្រឹមត្រូវ មុនពេលឲ្យទូរសព្ទទៅកូនលេង៕