ជាតិ
២៥ខេត្ត/រាជធានី
×![]()
ដោយ៖ ផាត ដាណេ
ភ្នំពេញ៖ ដំណាំត្រសក់ទ្រើង បើទោះជា កសិករ ធ្វើទ្រើងឲ្យវាឡើងខ្ពស់ផុតពីដីក៏ដោយ ក៏អាចមានជំងឺឆ្លង ដែលធ្វើឲ្យដំណាំលូតលាស់មិនល្អ និងប្រមូលផលបានតិច។ ហើយការដាំត្រសក់នៅលើដៃដដែលៗ នាំឲ្យកើតមានជំងឺ និងសត្វល្អិតកាន់តែច្រើន ដែលនាំឲ្យពិបាកកម្ចាត់វា។
ភ្នំពេញ៖ ដំណាំត្រសក់ទ្រើង បើទោះជា កសិករ ធ្វើទ្រើងឲ្យវាឡើងខ្ពស់ផុតពីដីក៏ដោយ ក៏អាចមានជំងឺឆ្លង ដែលធ្វើឲ្យដំណាំលូតលាស់មិនល្អ និងប្រមូលផលបានតិច។ ហើយការដាំត្រសក់នៅលើដៃដដែលៗ នាំឲ្យកើតមានជំងឺ និងសត្វល្អិតកាន់តែច្រើន ដែលនាំឲ្យពិបាកកម្ចាត់វា។
កត្តាដែលនោះឲ្យ«ដំណាំត្រសក់ទ្រើង»កើតជំងឺ ដូចជា បើដាំនៅលើដីដដែលៗនាំឲ្យកើតជំងឺ និងសត្វល្អិតកកាន់តែច្រើន ដែលនាំឲ្យពិបាកកម្ចាត់វា។ នៅតាមត្រួយត្រសក់ ជាពិសេសនៅរដូវក្តៅ ប្រសិនបើ សម្បូរដោយពពួកទ្រីបជញ្ជក់ត្រួយត្រសក់ហើយ វាចម្លងជំងឺវ៉ីរសដល់ត្រសក់នោះមិនអាចព្យាបាលបានឡើយ។ ម្យ៉ាងទៀត ប្រសិនបើ ស្លឹកត្រសក់ចាប់ផ្តើមមានចំនុចអុចៗពណ៌លឿង ហើយប្រែជាពណ៌ត្នោត នោះមានន័យថា វាកើតជំងឺ«លឿងស្លឹក» ពោលគឺ វាកើតពីស្លឹកនៅក្បែរដី ហើយរាលទៅស្លឹកផ្នែកខាងលើ។
ដូច្នេះ កសិករ ត្រូវបាញ់ថ្នាំផ្សិត ៥ថ្ងៃម្ដងនៅរដូវវស្សា និង៧ថ្ងៃម្ដងនៅរដូវប្រាំង តាំងពីកូនត្រសក់ដុះបានស្លឹក២ ដើម្បីការពារជាមុន។ ប្រសិនបើ ត្រសក់មានជំងឺផ្សិត កសិករត្រូវកាត់ស្លឹកទាំងនោះចេញសិនមុនបាញ់ថ្នាំផ្សិត។ ចំពោះ ស្លឹកដែលកាត់រួចត្រូវយកទៅកប់ចោល ឬធ្វើជាជីកំប៉ុស្ត។ កសិករ មិនត្រូវទុកស្លឹកទាំងនោះក្នុងចម្ការទេ វាអាចឆ្លងទៅដើមផ្សេងៗទៀត។ សម្រាប់ការបាញ់ថ្នាំផ្សិតវិញ កសិករ គួរបាញ់នៅម៉ោង៤ទៅ៥ល្ងាច ដោយសារជំងឺផ្សិតកើតនៅខាងក្រោមស្លឹក ដូច្នេះ កសិករ យើងត្រូវបាញ់នៅផ្នែកខាងក្រោមស្លឹកទៅខាងលើ។
ជាមួយគ្នានេះ កសិករមិនគួរបាញ់ថ្នាំពេលមេឃជិតភ្លៀង មានខ្យល់ និងពេលថ្ងៃត្រង់។ កសិករ មិនត្រូវប្រើថ្នាំឈ្មោះកម្ចាត់សត្វល្អិត និងជំងឺដដែលៗ ដែលធ្វើឲ្យសត្វល្អិត និងជំងឺមានភាពធន់ទ្រាំជាមួយនឹងថ្នាំ។ ម្យ៉ាងទៀត កសិករក៏មិនគួរប្រើថ្នាំពុលលាយចូលគ្នានៅពេលបាញ់ ដែលវាអាចធ្វើឲ្យថ្នាំគ្មានប្រសិទ្ធភាព ហើយសត្វល្អិត ដង្កូវរហ័សសាំនឹងថ្នាំ ពិបាកកម្ចាត់វានៅពេលក្រោយ។
ចំពោះការថែទាំដំណាំត្រសក់ទ្រើងនេះ កសិករត្រូវស្រោចទឹកឲ្យបានគ្រប់គ្រាន់នៅពេលព្រឹក តែក៏ជៀសវាងស្រោចទឹកច្រើនពេក ដែលធ្វើឲ្យដីសើមជ្រុលនៅពេលល្ងាច អាចបង្កឲ្យមានបញ្ហាដល់ដំណាំបាន។ម្យ៉ាងវិញទៀត កសិករត្រូវដោតទ្រើងភ្លាមបន្ទាប់ពីដាំកូនដំណាំហើយ តែអាចយឺតបំផុតចំនួន៧ថ្ងៃ បើទុកឲ្យធំទើបដោតទ្រើងនោះ ធ្វើឲ្យដំណាំដាច់ឬសលូតលាស់យឺត ហើយងាយថយទិន្នផល។ ជាមួយគ្នានេះដែរ កសិករក៏ត្រូវកាត់ស្លឹកដែលនៅផ្នែកខាងក្រោមក្បែរដីចំនួន១ឬ២សន្លឹកចេញនៅរដូវវស្សា។
រីឯការប្រមូលផលត្រសក់ដ៏ល្អបំផុត គឺត្រូវបេះផ្លែនៅពេលព្រឹក ដោយមិនត្រូវទុកផ្លែដែលបេះហើយឲ្យត្រូវនឹងកម្តៅថ្ងៃឡើយ៕
(សារព័ត៌មានថ្មីៗ ដកស្រង់ពីឯកសារពិគ្រោះដែលមាននៅក្នុងសៀវភៅណែនាំអំពីបច្ចេកទេសដំណាំបន្លែ, ២០១១ និងសៀវភៅណែនាំបច្ចេកទេសកសិករ ផលិតកម្មដំណាំបន្លែ, ២០១៣ បោះពុម្ពផ្សាយដោយនាយកដ្ឋានផ្សព្វផ្សាយកសិកម្ម នៃក្រសួងកសិកម្ម រុក្ខាប្រមាញ់ និងនេសាទ)
© រក្សាសិទ្ធិដោយ thmeythmey.com
