ជាតិ
រថយន្ត
សង្គមជាតិ
ប៉ូលិសភ្នំពេញ នឹងចាប់ផាកហើយទុកបណ្តោះអាសន្នចំពោះយានយន្ត ដែលគ្មានឬមានស្លាកលេខមិនត្រឹមត្រូវ រថយន្តបើកបរដោយគ្មានស្លាកលេខ ដែលចរាចរនៅរាជធានីភ្នំពេញ រូបភាពពីស្នងការនគរបាលរាជធានីភ្នំពេញ
× ភ្នំពេញ៖ នគរបាលក្នុងរាជធានីភ្នំពេញ នឹងចាប់ផាកពិន័យចំពោះអ្នកបើកបរម៉ូតូ និងរថយន្តគ្រប់ប្រភេទ ដែលគ្មានស្លាកលេខ និងអ្នកប្រើស្លាកលេខមិនត្រឹមត្រូវ ចាប់ពីថ្ងៃទី២១ ខែតុលា ឆ្នាំ២០១៩ តទៅ។ នេះបើយោងតាមសេចក្តីជូនដំណឹងរបស់ស្នងការដ្ឋាននគរបាលរាជធានីភ្នំពេញ កាលពីថ្ងៃទី១០ ខែតុលា ដែលបញ្ជាឲ្យអធិការខណ្ឌទាំង១៤ នៅរាជធានីភ្នំពេញ ចាត់វិធានការនេះឲ្យបានតឹងរ៉ឹង។
ក្នុងរយៈពេលចុងក្រោយនេះ ស្នងការដា្ឋននគរបាលរាជធានីភ្នំពេញ បានកត់សម្គាល់ថា មានអ្នកបើកបររថយន្ត និងទោចក្រយានយន្តមួយចំនួនមិនពាក់ស្លាកលេខ ហើយមួយចំនួនទៀតប្រើប្រាស់ស្លាកលេខមិនត្រឹមត្រូវ ដើម្បីឆ្លៀតឱកាសប្រព្រឹត្តិ អំពើលួច ប្លន់ និងបទល្មើសខុសច្បាប់ផ្សេងទៀត។
តាមរយៈករណីកើតឡើងជាច្រើននេះ អាជ្ញាធរស្នើឲ្យពលរដ្ឋរួសរាន់ទៅបំពេញបែបបទធ្វើសា្លកលេខ និងធ្វើប័ណ្ណសម្គាល់រថយន្ត និងទោចក្រ-ត្រីចក្រយានយន្តឲ្យបានត្រឹមត្រូវ និងទាន់ពេលវេលា ដើម្បីរក្សាសណ្តាប់ធ្នាប់ សុខសុវត្ថិភាពចរាចរណ៍ និងចូលរួមបង្ក្រាបបទលើ្មសផ្សេងៗ។ ជាពិសេសផ្តល់ភាពងាយស្រួលដល់សមត្ថកិច្ចក្នុងការស្រាវជ្រាវតាមរកជនល្មើសដែលប្រព្រឹត្តិខុស។
បើតាមស្នងការដ្ឋាននគរបាលរាជធានីភ្នំពេញ នគរបាល នឹងផាកពិន័យចំពោះម្ចាស់ម៉ូតូ រថយន្តគ្រប់ធុន ដែលបើកបរដោយគ្មានស្លាកលេខ និងប្រើប្រាស់ស្លាកលេខមិនត្រឹមត្រូវ និងឃាត់ទុកជាបណ្តោះអាសន្នសិន ដោយរង់ចាំទាល់តែធ្វើស្លាកលេខរួច ទើបអាចយកត្រឡប់ទៅវិញបាន៕
Tag:
អាជ្ញាធរ
ស្លាកលេខ
ម៉ូតូ
ចរាចរណ៍
© រក្សាសិទ្ធិដោយ thmeythmey.com