FIFA
កីឡាជាតិ
ជាតិ
កម្ពុជាមិនធ្លាប់មានប្រវត្តិជួបអ៊ីរ៉ាក់ តែលោកគ្រូ Honda ធ្លាប់ជួប៥លើកមិនដែលចាញ់ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា, រូបភាពពី FFC
× ក្រុមកីឡាករជម្រើសជាតិកម្ពុជា មិនធ្លាប់មានប្រវត្តិជួបអ៊ីរ៉ាក់កន្លងមកនោះទេ។ ប៉ុន្តែសម្រាប់អ្នកចាត់ការទូទៅ Keisuke Honda វិញ ធ្លាប់បង្ហាញខ្លួនឲ្យក្រុមជម្រើសជាតិជប៉ុន ៥លើករួចមកហើយ ពេលប៉ះអ៊ីរ៉ាក់ ដោយលោករកបាន២គ្រាប់។ ជប៉ុន មិនដែលចាញ់អ៊ីរ៉ាក់ឡើយ។
អ្នកចាត់ការទូទៅ Keisuke Honda នឹងដឹកនាំក្រុមជម្រើសជាតិកម្ពុជា តទល់ជាមួយអ៊ីរ៉ាក់ជាលើកដំបូង នាជំនួបវគ្គជម្រុះ FIFA World Cup ជុំទី២នៅម៉ោង៦:៣០នាទីល្ងាចថ្ងៃទី១៥ តុលានេះ នាពហុកីឡដ្ឋានជាតិអូឡាំពិក។ វាលើកទី១ក្នុងតួនាទីជាអ្នកដឹកនាំក្រុមជម្រើសជាតិកម្ពុជា ហើយក៏ជាលើកទី៦សម្រាប់ Keisuke Honda ក្នុងប្រវត្តិជួបក្រុមអ៊ីរ៉ាក់ដែរ ពោលគឺលោក Honda ធ្លាប់ជួបអ៊ីរ៉ាក់៥លើករួចមកហើយ ពេលបង្ហាញខ្លួនជាមួយក្រុមជម្រើសជាតិជប៉ុន។
អតីតសមាជិកក្លិបក្របខណ្ឌកំពូលអូស្ត្រាលី Melbourne Victory រូបនេះ មានកំណត់ត្រាស៊ុតបញ្ជូលទីអ៊ីរ៉ាក់ពីរគ្រាប់ សម្រាប់ការជួបគ្នា៥លើក ដែលក្រុមសាម៉ូរ៉ៃជប៉ុនគ្មានប្រវត្តិចាញ់នេះ។ ជប៉ុនជួបអ៊ីរ៉ាក់លើកដំបូងក្នុងការប្រកួត World Cup ឆ្នាំ២០១៤ ដោយកាលណោះជប៉ុនបានយកឈ្នះក្នុងលទ្ធផល ១-០។
បន្ទាប់មកក្រុមទាំងពីរបានជួបគ្នាម្តងទៀត ក្នុងវគ្គជម្រុះជុំចុងក្រោយនៃព្រឹត្តិការណ៍ Asian Cup 2015 ដោយពួកគេស្ថិតនៅក្នុងពូល D។ ជប៉ុនបានបន្តយកឈ្នះអ៊ីរ៉ាក់ក្នុងលទ្ធផល ១-០ ដែលរកបានដោយកីឡាករ Keisuke Honda នៅនាទីទី២៣ដោយការស៊ុតប៉េណាល់ទី។ Honda ត្រូវបានប្តូរចេញជំនួសដោយកីឡាករ Yoshinori Muto ក្រោយបង្ហាញខ្លួនបាន៨៩នាទី។
នាការប្រកួតមិត្តភាពអន្តរជាតិកាលពីអំឡុងខែមិថុនា ឆ្នាំ២០១៥ ខ្សែបម្រើ Keisuke Honda បានរួមចំណែកមួយគ្រាប់ក្នុងជ័យជម្នះ ៤-០ របស់ក្រុមសាម៉ូរ៉ៃជប៉ុនលើអ៊ីរ៉ាក់។ ដោយឡែកការប្រកួតវគ្គជម្រុះ World Cup 2018 ដែលពួកគេស្ថិតនៅក្នុងពូល B ជប៉ុនបានយកឈ្នះអ៊ីរ៉ាក់ក្នុងលទ្ធផល ២-១ នៅជើងទី១ មុនពួកគេបញ្ចប់លទ្ធផលស្មើ ១-១ នៅជើងទី២។ ដោយកាលណោះជប៉ុនទទួលបានកៅអីឡើងទៅលេងព្រឹត្តិការណ៍ World Cup ក្នុងនាមក្រុមលេខ១ប្រចាំពូល B៕
Tag:
បាល់ទាត់
World Cup
Keisuke Honda
© រក្សាសិទ្ធិដោយ thmeythmey.com