អន្តរជាតិ
មេដឹកនាំក្រុមបាតុករហុងកុងម្នាក់ រងការវាយប្រហារតាមផ្លូវ ឈាមនៅកន្លែងកើតហេតុដែលលោក Jimmy Sham រងការវាយប្រហារ។ រូបភាព AFP
×
ដោយ៖ ងួន សុភាវត្តី
នៅថ្ងៃទី១៦ខែតុលា មេដឹកនាំក្រុមបាតុករនៅហុងកុងលោក Jimmy Sham ត្រូវបានក្រុមគ្រូពេទ្យបញ្ជូនទៅមន្ទីរពេទ្យជាបន្ទាន់ ក្រោយពេលរូបលោកត្រូវបានជនមិនស្គាល់អត្តសញ្ញាណមួយក្រុមវាយនឹងញញួរនៅតាមផ្លូវ។
ក្រុមបាតុករដែលហៅថា Civil Human Rights Front ( CHRF) បាននិយាយថា មេដឹកនាំរបស់ពួកគេឈ្មោះ Jimmy Sham ត្រូវបានវាយដោយមនុស្ស៤ទៅ៥នាក់ដែលក្នុងដៃពួកគេមានញញួរ នៅសង្កាត់ Mong Kok។ សកម្មភាពហិង្សានេះត្រូវបានក្រុមបាតុករនេះហៅថា ជាសកម្មភាពភេរវកម្មនយោបាយ។
ក្រុម CHRFបាននិយាយក្នុងសេចក្តីថ្លែងការណ៍មួយថា លោក Sham ត្រូវបានគេវាយបែកក្បាលនិ ងបានបញ្ជូនទៅមន្ទីរពរទ្យ Kwong Wah ។ ក្រុមដដែលនេះ បន្ថែមថា លោកបានដឹងខ្លួនឡើងវិញនៅពេលទទួលបានការព្យាបាលរួច។ នេះបើតាមទីភ្នាក់ងារព័ត៌មាន AFP ។
រូបភាពដែលបានបង្ហោះអនឡាញបានបង្ហាញពីលោក Sham ដេកក្នុងថ្លុកឈាម។ CHRF លើកឡើងថា៖ «វាគឺជារឿងដែលពិបាកដែលមិនអោយយើងគិតថាឧប្បត្តិហេតុនេះជា អំពើភេរវកម្មនយោបាយ ដែលមានគោលបំណងចង់បំភ័យ រារាំងការតវ៉ានិងការបំបិទសិទ្ធិប្រជាពលរដ្ឋក្នុងការតវ៉ា»។
ក្នុងហេតុការណ៍នេះដែរ ក្រុមអ្នកបាតុករដែលនៅជិតៗនោះមានបំណងចង់ចូលទៅជួយលោក Sham ដែរ តែក្រុមជនល្មើសបានយកកាំបិតមកគំរាមពួកគេ។លោក Sham គឺជាអ្នកនាំពាក្យ និងជាមេដឹកនាំសំខាន់មួយរូបក្នុងក្រុម CHRF ។ ក្រុម CHRF នេះត្រូវបានគេស្គាល់ថាជាក្រុមបាតុករដែលធ្វើបាតុកម្មអហិង្សា និងបានរៀបចំការតវ៉ាតាមផ្លូវដោយសន្តិភាពកន្លងមក។
គួរបញ្ជាក់ផងដែរថា បាតុកម្មនៅហុងកុងនៅតែក្ដៅគគុកដដែល។ បញ្ហានៅទីនោះហាក់គ្មានភាពថមថយ ខណៈក្រុមបាតុករកាន់តែតវ៉ាខ្លាំងឡើង។ នៅប៉ុន្មានខែនេះសកម្មជនបាតុករមួយចំនួនបានរងការវាយប្រហារដោយក្រុមគាំទ្រចិ ននិងរដ្ឋាភិបាល។ ខណៈដែលអំពើហិង្សាបានកើនឡើង ក្រុមបាតុករបានចាប់ផ្តើមតទល់វិញ និងបានវាយប្រហារលើក្រុមដែលមានទស្សនៈផ្ទុយពីខ្លួន និងក្រុមដែលគាំទ្ររដ្ឋាភិបាលផងដែរ៕
© រក្សាសិទ្ធិដោយ thmeythmey.com