ជាតិ
២៥ខេត្ត/រាជធានី
លោក លីវ សុផល ពន្យល់ពីបច្ចេកទេសបណ្តុះ និងដាំកូនកោងកាងឲ្យបានផលល្អ១០០ភាគរយ
× កំពត៖ ព្រៃកោងកាងដែលគ្របដណ្តប់ផ្ទៃដីជិត២ពាន់ហិកតា នៅខេត្តកំពត បានក្លាយជារនាំងការពារខ្យល់ព្យុះ និងជាជម្រករបស់សត្វបក្សី មច្ឆជាតិ ក្តាម បង្គា រស់នៅផងដែរ។ ជាពិសេស ព្រៃកោងកាងបានហុចផលដល់អ្នកនេសាទ ដែលរស់នៅតាមតំបន់នោះ ដើម្បីបំពេញជីវភាពរស់នៅប្រចាំថ្ងៃ។ លោក លីវ សុផល គណៈកម្មការសហគមន៍ត្រពាំងសង្កែ នៅស្រុកឈូក ខេត្តកំពត បានរៀបរាប់ប្រាប់អ្នកសារព័ត៌មាន ThmeyThmey25 ថា ពីរបច្ចេកទេសបណ្តុះនិងដាំកូនកោងកោង ឲ្យទទួលបានផលល្អ ១០០ភាគរយ ដូចខាងក្រោមនេះ៖
លោក លីវ សុផល បានរៀបរាប់ពីវិធីដាំកូនកោងកាងមានពីររបៀប។ របៀបទី១ នៅពេលដែលផ្លែវាទុំ វានឹងជ្រុះទៅក្នុងទឹក ហើយវានឹងដុះជាបន្តបន្ទាប់ៗ។ ចំណែករបៀបទី២ កាលណាដើមកោងកាងមានភាពរឹងមាំហើយ វានឹងមានផ្លែដុះចេញមក ពលរដ្ឋនិយមបេះផ្លែវាយកមកបណ្តុះតែម្តង។ លោកអះអាងថា ការបេះផ្លែវាយកមកបណ្តុះ វាផ្តល់ផលបានលឿន និងលូតលាស់បានល្អជាង ការបណ្តាយឲ្យវាជ្រុះផ្លែ ដុះដោយឯកឯង។
«បើយើងយកផ្កាវាដែលជ្រុះពីដើមមកបណ្តុះ វាមិនសូវមានគុណភាពទេ ព្រោះវាស្អុយ ហើយបណ្តូលរបស់វា អាចនឹងស្វិត ព្រោះវាត្រូវថ្ងៃយូរពេក អីចឹងបណ្តុះអត់សូវបានជោគជ័យទេ គឺបានតែ៥០ភាគរយប៉ុណ្ណោះ។ តែបើយើងបេះផ្កាវាពីដើមមក អាចបណ្តុះបានជោគជ័យ១០០ភាគរយ»។ នេះជាការបញ្ជាក់របស់លោក លីវ សុផល គណៈកម្មការសហគមន៍ត្រពាំងសង្កែ ដែលមានបទពិសោធដុះនិងដាំកូនកោងការរាប់ឆ្នាំមកហើយ។
មុននឹងបានកូនកោងកាងមួយដើម គេយកផ្លែវាមកដាំនៅនឹងដីភក់ដែលច្រកក្នុងថង់បណ្តុះកូនឈើ ដោយរង់ចាំរយៈពេល២សប្តាហ៍ ទើបចេញស្លឹក។ លោកបញ្ជាក់ថា កូនកោងកាងដែលលូតលាស់បានល្អ គឺត្រូវដាំនៅដីភក់៧០ភាគរយ ហើយលាយដីខ្សាច់៣០ភាគរយ។ សម្រាប់ទីតាំងដែលអាចបណ្តុះកូនកោងកាងបានល្អបំផុត គឺនៅកន្លែងដែលមានទឹកសមុទ្រជោរនិងនាច។ ហើយបើកាលណាគេដាំវា នៅតំបន់ដែលសម្បូរជីវជាតិ ដែលជាតំបន់ព្រៃកោងកាងរេចរឹល វាអាចនឹងលូតលាស់បានលឿនជាងដីថ្មី ដែលមិនមានព្រៃកោងកាងសោះ។
លោក លីវ សុផល បានបញ្ជាក់ថា នៅក្នុងសហគមន៍ត្រពាំងសង្កែ មានដើមកោងកាងតែ៣២ប្រភេទប៉ុណ្ណោះ ខណៈនៅតំបន់ផ្សេង និងប្រទេសផ្សេង គេមានរហូតដល់ទៅជាង៤០ប្រភេទ។ បើតាមលោក លីវ សុផល ក្នុងចំណោមដើមកោងកាងទាំង៣២ប្រភេទនេះ ដើមកោងកាងដែលមានស្លឹកតូច គឺជាប្រភេទដើមកោងកាងដែលលូតលាស់បានល្អជាងគេ។
ដើមកោងកាងដែលមានអាយុកាល៥ឆ្នាំឡើងទៅ ជាប្រភេទដើមដែលមានឫសវែងៗ បែកខ្នែងស្អេកស្កះ និងមានដើមរឹងមាំ អាចជួយទប់ខ្យល់ព្យុះ និងរលកទឹកសមុទ្រ និងជាជម្រកដល់សត្វបក្សី ក្តាម បង្គា ត្រី ងាវ រស់នៅ និងសម្រាប់ឲ្យអ្នកនេសាទអាចរកចំណូលបានផងដែរ។ នេះបើតាមការបញ្ជាក់ពីលោក លីវ សុផល។
គណៈកម្មាការសហគមន៍ត្រពាំងសង្កែ រូបនេះ បានឲ្យដឹងទៀតថា ជាទូទៅសហគមន៍ត្រពាំងសង្កែមានភ្ញៀវទេសចរដែលមកទស្សនាព្រៃកោងកាងប្រមាណ២ពាន់ទៅ៣ពាន់នាក់ ហើយក្នុងនោះមានភ្ញៀវទេសចរដែលចូលរួមដាំកូនកោងកាងចំនួន៥០០ដើមក្នុងមួយខែ៕
Tag:
កោងកាង
សមុទ្រ
ទេសចរណ៍
សហគមន៍ត្រពាំងសង្កែ
ពលរដ្
© រក្សាសិទ្ធិដោយ thmeythmey.com