ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
កម្ពុជា នឹងមានដំណាំសរីរាង្គគ្រប់គ្រាន់ សម្រាប់បំពេញតម្រូវការពលរដ្ឋ នៅឆ្នាំ២០៣០?
17, Oct 2019 ,
7:39 pm
រូបភាព
×
ដោយ:
អ៊ូ សុខមាន (OU Sokmean)
ភ្នំពេញ៖ នៅឆ្នាំ២០៣០ កម្ពុជានឹងមានផលិតផលកសិកម្មសរីរាង្គគ្រប់គ្រាន់ សម្រាប់បំពេញតម្រូវរបស់ប្រជាពលរដ្ឋគ្រប់រូបជាមួយនឹងស្តង់ដារជាតិនិងអន្តរជាតិ។ នេះជាការលើកឡើងរបស់លោក ហូ ពុទ្ធា អគ្គនាយករងនៃអគ្គនាយកដ្ឋានកសិកម្ម(GDA)។
ដើម្បីសម្រេចគោលដៅកសិកម្មសេរីរាង្គ អគ្គនាយកដ្ឋានកសិកម្ម បានធ្វើសេចក្តីព្រាងប្រកាសកសិកម្មសរីរាង្គជាតិ និងរូបសញ្ញាជាតិ សម្រាប់អនុវត្តការងារផលិតកម្ម ការកែច្នៃបឋម និងដំណាំសរីរាង្គផ្សេងៗ សម្រាប់គាំទ្រនៃការអនុវត្តឱ្យស្របតាមបទដ្ឋានបច្ចេកទេស ក៏ដូចជាការធ្វើឱ្យមានសុខុមនីយកម្ម ជាមួយបណ្តាប្រទសសមាជិតអាស៊ាន និងពិភពលោកផងដែរ។
លោក ហូ ពុទ្ធា អគ្គនាយករងនៃអគ្គនាយកដ្ឋានកសិកម្ម(GDA)
ថ្លែងក្នុងកិច្ចពិភាក្សាស្តីពីការរៀបចំគោលការណ៍ណែនាំបច្ចេកទេសកសិកម្មសរីរាង្គជាតិ កាលពីថ្ងៃទី១៦តុលា ឆ្នាំ២០១៩ នៅសណ្ឋាគារកាំបូឌីយ៉ាណា លោក ហូ ពុទ្ធា បានសង្កត់ធ្ងន់ថា ការលើកកម្ពស់និងការអនុវត្តកសិកម្មសរីរាង្គជាតិនេះ គឺចាំបាច់ត្រូវរៀបចំឱ្យមានក្រុមផលិត ,ក្រុមផ្តល់ធាតុចូលកសិកម្ម ,ក្រុមប្រមូលទិញ ,ក្រុមចែកចាយ ,ក្រុមទីផ្សារ និងអតិថិជនទទួលទាន ដែលត្រូវដាក់ក្នុងប្រព័ន្ធខ្សែចង្វាក់ផលិតកម្មកសិកម្មសរីរាង្គ ។ ជាពិសេសផ្តោតលើក្រុមឬសហគមន៍ កសិដ្ឋានកសិកម្ម ដែលមានលក្ខណៈអាជីព រួមទាំងការបណ្តុះបណ្តាលក្រុមកសិករ ផលិតកសិកម្មសរីរាង្គឱ្យកាន់តែប្រសើរផងដែរ។ លើសពីនេះ ក្រសួងក៏រៀបចំប្រព័ន្ធត្រួតពិនិត្យគុណភាព និងប្រព័ន្ធផ្តល់វិញ្ញាបនបត្រត្រឹមត្រូវ ដើម្បីលើកទឹកចិត្ត និងផ្តល់ភាពជឿជាក់ទៅលើផលិតផលសរីរាង្គនៅលើទីផ្សារ។
អគ្គនាយកដ្ឋានកសិកម្ម នឹងអនុម័តច្បាប់និងលិខិតបទដ្ឋាន ក្រោមការអភិវឌ្ឍកសិកម្ម ដែលមានច្បាប់ពូជ ជី និងថ្នាំកសិកម្ម សម្រាប់ដាក់ឱ្យអនុវត្តផែនការកសិកម្មសេរីរាង្គឱ្យបានពេញលេញនៅឆ្នាំ២០២១ ។ បើតាមអគ្គនាយកដ្ឋានកសិកម្ម កម្ពុជា នឹងមានអតិថិជន៥០ភាគរយ យល់ច្បាស់ពីអត្ថប្រយោជន៍នៃផលិតផលសរីរាង្គចំពោះសុខភាព សុខុមាលភាពសង្គម និងបរិស្ថានប្រកបដោយនិរន្តរភាព នៅក្នុងឆ្នាំ២០២១ ។
លោក គៀន សុភា ប្រធាននាយកដ្ឋានសាវប្បកម្ម និងដំណាំរួមផ្សំ នៃអគ្គនាយកដ្ឋានកសិកម្ម៕
លោក គៀន សុភា ប្រធាននាយកដ្ឋានសាវប្បកម្ម និងដំណាំរួមផ្សំនៃអគ្គនាយកដ្ឋានកសិកម្ម បាននិយាយថា ការអនុវត្តគោលការណ៍បច្ចេកទេសកសិកម្មសរីរាង្គជាតិ ដែលត្រៀមនឹងប្រកាសដាក់ឱ្យអនុវត្ត នាពេលឆាប់ៗនេះ វានឹងផ្តល់ស្តង់ដារមូលដ្ឋាននៃស្លាកសញ្ញាសរីរាង្គកម្ពុជា ដែលក្របកដោយភាពជឿជាក់សម្រាប់អ្នកបញ្ជាទិញ(អតិថិជន)ទាំងថ្នាក់ជាតិ និងអន្តរជាតិ។ លើសពីនេះ អ្នកប្រើប្រាស់នឹងទទួលបានការការពារផលិតផលកសិកម្មល្អ ហើយគេចផុតពីការក្លែងបន្លំនិងបោកប្រាស់របស់ទីផ្សារ ។
ប្រធាននាយកដ្ឋានផលិតដំណាំកសិកម្មរូបនេះ បានបញ្ជាក់ថា ការអនុវត្តគោលការណ៍បច្ចេកទេសកសិកម្មសរីរាង្គជាតិ គឺជាការអភិវឌ្ឍកសិកម្មសរីរាង្គនៅកម្ពុជាឱ្យមានចីរភាពនៃប្រព័ន្ធក្សេត្រសាស្ត្របរិស្ថាន ចីរភាពសង្គម និងចីរភាពសេដ្ឋកិច្ចជាតិ។ បច្ចុប្បន្ន កម្ពុជាមានផ្ទៃដីដាំដំណាំសរីរាង្គស្តង់ដារPGS ប្រមាណ២០ហិកតា ដែលមានប្រជាកសិករ ជាអ្នកអនុវត្តផ្ទាល់ចំនួន១៤៨គ្រួសារ។
លោក ម៉ម អំណត់ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
ក្រសួងកសិកម្ម រុក្ខាប្រមាញ់ និងនេសាទ នឹងបង្កើតនាយកដ្ឋានពូជដំណាំកសិកម្មសរិរីរាង្គថ្មីមួយទៀត ដើម្បីឆ្លើយតបនឹងគោលដៅកសិកម្មសេរីរាង្គនេះ។ លោក ម៉ម អំណត់ រដ្ឋលេខាធិការក្រសួងកសិកម្ម បាននិយាយដូច្នេះថា៖ «ពាក់ព័ន្ធទៅនឹងកសិកម្មសរីរាង្គនេះ ខ្ញុំជឿជាក់ថា វាប្រាកដជាត្រូវការពូជសរីរាង្គចាំបាច់ផងដែរ...ហើយការបង្កើតនាយកដ្ឋានពូជកសិកម្មនេះ គឺដើម្បីធានានិងការអភិវឌ្ឍឧស្សាហកម្មពូជដំណាំនានាក្នុងវិស័យកសិកម្មយើង។ ហើយនាយកដ្ឋានថ្មីមួយនេះ នឹងអនុម័តឆាប់ៗនេះ»។
ផ្ទុយពីការយល់ឃើញរបស់រដ្ឋាភិបាល លោក ហួន កុសល ប្រធានសម្របសម្រួលកម្មវិធីកសិកម្មប្រចាំខេត្តបាត់ដំបងនៃអង្គការCaritas បាននិយាយថា កម្ពុជាគឺមិនអាចផ្គត់ផ្គង់ដំណាំសរីរាង្គគ្រប់គ្រាន់ សម្រាប់ឆ្លើយនឹងតម្រូវរបស់ពលរដ្ឋឡើយ នៅឆ្នាំ២០៣០ ។បើតាមលោក ហួន កុសល គោលនយោបាយដំណាំកសិកម្មសរីរាង្គរបស់រដ្ឋាភិបាលនេះ គ្រាន់តែជំរុញឱ្យមានចលនានៃការផលិត ហើយប្រជាពលរដ្ឋនឹងស្គាល់ច្បាស់ពីអត្ថប្រយោជន៍នៃកសិកម្មសរីរាង្គ ប៉ុណ្ណោះ។
ប្រធានសម្របសម្រួលកម្មវិធីកសិកម្មប្រចាំខេត្តបាត់ដំបងនៃអង្គការCaritasរូបនេះ បកស្រាយប្រាប់សារព័ត៌មានThmeyThmey ដូច្នេះថា៖« ដំណាំសរីរាង្គកម្ពុជានៅពេលនោះ[ឆ្នាំ២០៣០] នឹងមានតម្លៃដែលប្រជាពលរដ្ឋស្គាល់ទាំងអស់គ្នា...ស្គាល់នូវអ្វីជាសរីរាង្គដែលមានអត្ថប្រយោជន៍ល្អសម្រាប់អ្នកប្រើប្រាស់ ហើយអ្នកផលិតដំណាំកសិកម្ម នឹងងាកមកផលិតកសិកម្មសរីរាង្គកាន់តែច្រើន ដើម្បីឆ្លើយតបនឹងតម្រូវការទីផ្សារ។ ប៉ុន្តែឱ្យមានការផ្គត់ផ្គង់ដំណាំសរីរាង្គគ្រប់គ្រាន់តាមតម្រូវការពលរដ្ឋ គឺមិនអាចធ្វើបានឡើយ។ សូម្បីតែសព្វថ្ងៃនេះ ដែលយើងធ្វើកសិកម្មបែបគីមី នៅតែមិនអាចឆ្លើយតបនឹងអ្នកប្រើប្រាស់ផង....ដោយទាមទារចាំបាច់នៃនាំចូលបន្ថែមពីប្រទេសជិតខាង ដើម្បីបំពេញនូវតម្រូវការអ្នកប្រើប្រាស់ក្នុងស្រុកប្រចាំថ្ងៃ»។
លោក ផាត សុវណ្ណ មន្ត្រីជំនាញកសិកម្មនៃអង្គការGRET
ប៉ុន្តែបើរដ្ឋាភិបាលពិតជាមានគោលការណ៍និងស្តង់ងាយស្រួលសម្រាប់កសិករដាំដុះនោះ វានឹងអាចជួយដល់កសិករមានលទ្ធភាពបង្កើត និងបង្កើនការផលិតដំណាំសរីរាង្គកាន់តែច្រើន សម្រាប់ឆ្លើយតបនឹងតម្រូវការអ្នកប្រើប្រាស់ ជាមួយនឹងតម្លៃបន្ថែមល្អប្រសើរក្នុងកម្រិតណាមួយនៅក្នុងទីផ្សារ ជាក់ជាមិនខាន។ នេះជាការលើកឡើងរបស់លោក ផាត សុវណ្ណ មន្ត្រីជំនាញកសិកម្មនៃអង្គការGRET។
មន្ត្រីជំនាញកសិកម្មរូបនេះ បាននិយាយដូច្នេះថា៖«ក្នុងរយៈពេលនោះ(ឆ្នាំ២០៣០)តម្រូវការដំណាំសរីរាង្គពីសំណាក់ប្រជាពលរដ្ឋនៅក្នុងស្រុក គឺមិនទាន់មានច្រើនលើសលុប ដូចដំណាំឬបន្លែធម្មតានោះឡើយ។ ខ្ញុំគិតថាដំណាំសរីរាង្គដែលក្រសួងថានឹងអាចបំពេញបានគ្រប់តាមតម្រូវការអ្នកប្រើប្រាស់ ឆ្នាំ២០៣០នោះ គឺសំដៅទៅលើអ្នកមានជីវភាពធូរធារដែលបានគិតគូរពីសុខភាពរស់នៅប្រចាំថ្ងៃច្រើន។ សម្រាប់ពលរដ្ឋទូទៅនៅតែបន្តប្រើប្រាស់ដំណាំកសិកម្មធម្មតាដដែល»។
បច្ចុប្បន្នដំំណាំបន្លែដែលជាផ្នែកមួយនៃផលិតផលកសិកម្ម កម្ពុជាអាចផលិតបន្លែបានជាមធ្យមពី៥០០ទៅ៦០០តោនក្នុងមួយថ្ងៃ។ ក្នុងចំណោមបន្លែទាំងនេះ គឺបន្លែសុវត្ថិភាពត្រឹម៦០តោនប៉ុណ្ណោះ រីឯបរិមាណនៃការផលិតបន្លែសរីរាង្គវិញ គឺមិនទាន់តួលេខណាមួយអាចកំណត់បាននៅឡើយ។ នេះបើយោងតាមរបាយការណ៍ ដែលសារព័ត៌មានThmeyThmey ទទួលបានពីលោក គៀន សុភា ប្រធាន នាយកដ្ឋានសាវប្បកម្ម និងដំណាំរួមផ្សំនៃអគ្គនាយកដ្ឋានកសិកម្ម កាលពីថ្ងៃទី៣តុលា ឆ្នាំ២០១៩។
បើតាមនាយកដ្ឋានសាវប្បកម្ម និងដំណាំរួមផ្សំរូបនេះ តម្រូវការបន្លែចម្រុះរបស់ប្រជាពលរដ្ឋក្នុងស្រុកមានប្រមាណ១,០៦៦តោន ដូច្នេះចាំបាច់នាំបន្លែចូលពីបរទេស ពិសេសពីវៀតណាម ពី២០០ទៅ៤០០តោន បន្ថែមទៀត ដើម្បីបំពេញតម្រូវការអ្នកប្រើប្រាស់ក្នុងស្រុក៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
សរីរាង្គ
ដំណាំ
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
3 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
4 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
1 សប្តាហ៍
សត្វជាង ៧០០ប្រភេទ ត្រូវបានរកឃើញក្នុងតំបន់ព្រៃកោងកាងខេត្តកោះកុង
2 ថ្ងៃ
«បុរាណ»និង«បូរាណ» មានអត្ថន័យដូចគ្នា
1 សប្តាហ៍
អត្ថបទពេញនិយមបន្ថែម