អន្តរជាតិ
លោក ត្រាំ និងប្រធានសភា ផេឡូស៊ី ប៉ះសម្តីគ្នាក្នុងសំណុំរឿងស៊ីរីនៅសេតវិមាន
× សមាជិកសភាជាន់ខ្ពស់បក្សប្រជាធិបតេយ្យ នៅថ្ងៃទី១៦ ខែតុលា បានដើរចេញពីកិច្ចប្រជុំនៅសេតវិមានភ្លាមៗ ពាក់ព័ន្ធនឹងគោលនយោបាយស៊ីរី បន្ទាប់ពីលោក ដូណាល់ ត្រាំ បាននិយាយវាយប្រហារទៅលើលោកស្រីរដ្ឋប្រធាន ណាន់ស៊ី ផេឡូស៊ី (Nancy Pelocy) ថា «អ្នកនយោបាយកម្រិតអន់»។
ជម្លោះរវាងលោក ដូណាល់ ត្រាំ និង ណាន់ស៊ី ផេឡូស៊ី កើតមានតាំងពីបើកនីតិវិធីស៊ើបអង្កេតរឿងដកតំណែងប្រធានាធិបតីមកម្លេះ ហើយភាពតានតឹងចុងក្រោយនេះ គឺជាសញ្ញា ដែលអាចមើលឃើញថា ទំនាក់ទំនងរវាងបុគ្គលទាំងពីរកាន់តែដុនដាបជាងមុនថែមទៀត។
តាមការចុះផ្សាយរបស់ទីភ្នាក់ងារព័ត៌មាន AFP លោក Chuck Schumer មកពីគណបក្សប្រជាធិបតេយ្យ ដែលមានវត្តមានក្នុងកិច្ចប្រជុំ បាននិយាយថា លោក ត្រាំ បានប្រើពាក្យតិះដៀលយ៉ាងអាក្រក់ទៅលើសមាជិករដ្ឋសភាប្រជាធិបតេយ្យ ខណៈពេលលោកស្រី ផេឡូស៊ី អះអាងថា លោក ត្រាំទទួលបានបទពិសោធន៍យ៉ាងអាក្រក់។ បន្ថែមពីលើនេះ សមាជិកព្រឹទ្ធសភារូបនេះ បានគូសបញ្ជាក់ថា ត្រាំ បានមើលងាយលោកស្រីប្រធានរដ្ឋសភាថា «អ្នកនយោបាយធឺទីបី»។
មិនត្រឹមតែមិនប្រើពាក្យមិនសមរម្យចំពោះលោកស្រី ផេឡូស៊ី ទេ ប្រធានាធិបតីអាមេរិក ក៏ថែមទាំងមិនគោរពចំពោះសមាជិករដ្ឋសភាពីររូបទៀត មកពីគណបក្សប្រជាធិបតេយ្យ។ ជាក់ស្តែង សមាជិកសភាជើងចាស់ លោក Steny Hoyer និយាយថា លោកបានចូលរួមកិច្ចប្រជុំបែបនេះជាច្រើនមកហើយ ប៉ុន្តែមិនទាន់មានប្រធានាធិបតីរូបណាហ៊ានបញ្ចេញកាយវិការមិនគួរសមបែបនេះឡើយ។
ពិតណាស់ ការមាក់ងាយរបស់ត្រាំដូចខាងលើនេះ គឺធ្វើឡើងបន្ទាប់ពី លោកស្រីប្រធានរដ្ឋសភា លើកឡើងថា ការដកទ័ពអាមេរិក ចេញពីភាគខាងជើងស៊ីរី គឺប្រៀបដូចជាផ្តល់ភ្លើងបៃតងឲ្យតួកគីឈ្លានពានស៊ីរី និងវាយប្រហារទៅលើសកម្មជនប្រយុទ្ធឃើដដូច្នោះដែរ។ វាគឺជាបទពិសោធដ៏អាក្រក់មួយរបស់ប្រធានាធិបតីអាមេរិក។
សមាជិកបក្សប្រជាធិបតេយ្យ និងបក្សសាធារណរដ្ឋ ចោទគ្នាទៅវិញទៅមកពីបញ្ហាការប្រើពាក្យមិនសមរម្យ និងមិនយល់ពីបញ្ហា។ ជាក់ស្តែង អ្នកនាំពាក្យរបស់លោក ត្រាំ បានច្រានចោលអ្វីដែលគណបក្សប្រជាធិបតេយ្យបានលើកឡើង ហើយបានអះអាងថា ត្រាំ គ្រាន់តែប្រើវិធីសាស្ត្រ ដើម្បីដោះស្រាយបញ្ហាជម្លោះតែប៉ុណ្ណោះ។ ប៉ុន្តែលោកស្រីប្រធានរដ្ឋសភាបែបជាដើរចេញ ទាំងមិនយល់ពីបញ្ហាអ្វីទាំងអស់ តែវាគ្មានអ្វីចម្លែកទេ។
សូមបញ្ជាក់ថា ជំនួបរវាងលោក ដូណាល់ ត្រាំ និងលោកស្រីប្រធានរដ្ឋសភា លើកនេះ គឺជំនួបទល់មុខជាលើកដំបូងហើយនៅក្នុងសេតវិមាន បន្ទាប់ពីមានសេចក្តីប្រកាសពាក់ព័ន្ធទៅនឹងបញ្ហានីតិវិធីដកប្រធានាធិបតីអាមេរិក៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com