អន្តរជាតិ
លោក លី សៀនឡុង៖ ការទាមទាររបស់បាតុករហុងកុងគឺដើម្បី«សម្អុយឈ្មោះ»រដ្ឋាភិបាល លោកនាយករដ្ឋមន្ត្រីសិង្ហបុរី លី សៀនឡុង ថ្លែងក្នុងសន្និសីទ Forbes Global CEO នៅថ្ងៃពុធ ១៦ តុលា ២០១៩ នាទីក្រុង សិង្ហបុរី
× ការទាមទារចម្បង៥យ៉ាងរបស់ក្រុមបាតុករហុងកុង គឺរៀបចំឡើងដើម្បីសម្អុយរដ្ឋាភិបាលនេះ។ លោកនាយករដ្ឋមន្ត្រីសិង្ហបុរី លី សៀនឡុង លើកឡើងបែបនេះ ដោយបន្ថែមថា ហើយប្រសិនបើរដ្ឋាភិបាលហុងកុងយល់ព្រមតាមការទាមទារទាំងនេះ ក៏មិនទំនងជានឹងដោះស្រាយបញ្ហាចាក់ស្រែះដែលជាប់ទាក់ទងនឹងគោលការណ៍ «ប្រទេសមួយ ប្រព័ន្ធពីរ» បាននោះដែរ។ មេដឹកនាំរូបនេះ ក៏ចុចដល់រឿងរសើបរបស់ហុងកុង ដែលនោះគឺ បញ្ហាសង្គម ជាពិសេស រឿងតម្លៃផ្ទះសំបែងតែម្តង។
អំឡុងសុន្ទរកថានៅសន្និសីទ Forbes Global CEO នៅថ្ងៃពុធ ទី១៦ ខែតុលា លោក លី បញ្ជាក់ថា លោកមិនឃើញផ្លូវងាយស្រួលណាមួយទៅមុខទេ ព្រោះថាក្រុមអ្នកតវ៉ាហុងកុងអះអាងថា ពួកគេមានការទាមទារធំៗប្រាំយ៉ាង ហើយគ្មាននរណាម្នាក់អាចសម្រុះសម្រួលបានឡើយ។ សម្រាប់លោក ការទាមទារទាំងនេះ ពុំបង្កើតឡើងក្នុងគោលដៅដោះស្រាយបញ្ហារបស់ហុងកុងឡើយ ក៏ប៉ុន្តែពួកវាគឺរៀបឡើងដើម្បីសម្អុយ និងទម្លាក់រដ្ឋាភិបាលលោកស្រីការី ឡាំប៉ុណ្ណោះ។
ម្យ៉ាងវិញទៀត នាយករដ្ឋមន្ត្រីវ័យ៦៧ឆ្នាំរូបនេះ ចាត់ទុកសកម្មភាពរំខានរបស់សមាជិកបក្សប្រឆាំងហុងកុងនៅសភាដែលបង្ខំឲ្យលោកស្រី ការី ឡាំ ខកខានថ្លែងគោលនយោបាយដោយផ្ទាល់ គឺជារឿងសោកសៅបំផុតសម្រាប់ក្រុងហុងកុង។
និយាយដល់គោលការណ៍ «ប្រទេសមួយ ប្រព័ន្ធពីរ» លោក លី បញ្ជាក់ថា ម្ខាងចិនយល់ឃើញថា ពួកគេ មិនត្រឹមតែគិតដល់ប្រទេសមួយប៉ុណ្ណោះទេ ប៉ុន្តែក៏ត្រូវចងចាំប្រព័ន្ធពីរផងដែរ។ រីឯការយល់ឃើញរបស់ហុងកុងវិញ ពួកគេមិនត្រឹមតែគិតដល់ប្រព័ន្ធពីរប៉ុណ្ណោះទេ ប៉ុន្តែក៏ត្រូវចងចាំដែរថា នេះគឺជាប្រទេសមួយ។ ត្រង់នេះ លោកនាយករដ្ឋមន្ត្រីបានទទូចឲ្យពួកគេប្រព្រឹត្តប្រកបដោយប្រាជ្ញា និងរក្សាការអត់ធ្មត់រៀងខ្លួន។
ទន្ទឹមនេះ វាក៏មានបញ្ហាខ្លះពាក់ព័ន្ធអភិបាលកិច្ចផងដែរ ហើយនោះគឺរបៀបនៃការជ្រើសរើសប្រធានប្រតិបត្តិហុងកុង និងសមាជិកនៃក្រុមប្រឹក្សានីតិបញ្ញាត្តិ។ លោក លី និយាយបែបនេះ ដោយពន្យល់ ថា វាមានសំណើច្បាប់ដែលប្រធានប្រតិបត្តិនឹងត្រូវបោះឆ្នោតជ្រើសរើស ក៏ប៉ុន្តែសំណើនេះ ពុំត្រូវអនុម័តឡើយក្រោយការតស៊ូមតិក្នុងសភាកាលពីឆ្នាំ២០១៤។ ម្ល៉េះហើយ ហុងកុង មិនមានការពង្រីកសិទ្ធិបោះឆ្នោតនយោបាយ ដែលមានរំលេចក្នុងច្បាប់មូលដ្ឋានខ្លួន។
តាមការចុះផ្សាយរបស់ទូរទស្សន៍សិង្ហបុរី Channel News Asia លោកនាយករដ្ឋមន្ត្រី លី គូសបញ្ជាក់ថា វាគ្មានដំណោះស្រាយធម្មតាឡើយ ដ្បិតហុងកុងពុំមែនជាប្រទេស ក៏ប៉ុន្តែជាតំបន់រដ្ឋបាលពិសេសមួយ (SAR)។ បើតាមគំនិតលោក វាពិបាកនឹងប្រមើលមើលថាគោលការណ៍ «ប្រទេសមួយ ប្រព័ន្ធពីរ» អាចបន្ត២៨ឆ្នាំទៀត រហូតដល់ឆ្នាំ២០៤៧ ដែលជាឆ្នាំដែលហុងកុងនឹងត្រូវត្រួតត្រាទាំងស្រុងដោយក្រុងប៉េកាំង។
ចុចដល់រឿងរសើបក្នុងក្រុងហុងកុង ដែលនោះគឺ បញ្ហាសង្គម ជាពិសេស រឿងតម្លៃផ្ទះសំបែង លោក លី មានប្រសាសន៍ថា វាមានតម្លៃកប់ពពក យុវជនគ្មានលទ្ធភាពឡើយប្រសិនបើផ្ទះល្វែងមួយខ្នងស្មើចំណូលពួកគេ២២ឆ្នាំនោះ។ នេះគឺរឿងដែលពិបាកនឹងកើតឡើងណាស់ ហើយការជួលផ្ទះស្នាក់នៅ ក៏មានថ្លៃខ្លាំងផងដែរ។ ម្ល៉េះហើយ ពួកគេមានអារម្មណ៍៖«តើខ្ញុំប្រឹងប្រែងធ្វើការដើម្បីអ្វី, អនាគតខ្ញុំនៅទីណា? តើការពិតនៃក្តីសង្ឃឹមនិងសុបិនឈោងចាប់ភាពជោគជ័យ និងសុភមង្គលខ្ញុំនៅទីណា?»។
សូមបញ្ជាក់ថា អំឡុងសុន្ទរកថាប្រមាណមួយម៉ោង ដោយមានលោក Steve Forbes ប្រធាននិងនិពន្ធនាយកនៃក្រុមហ៊ុនប្រព័ន្ធផ្សព្វផ្សាយ Forbes ជាអ្នកសម្របសម្រួល ក្រៅបញ្ហានៅហុងកុង លោក លី សៀនឡុង ក៏បាននិយាយពីបញ្ហាមួយចំនួនទៀត រួមមាន សង្គ្រាមពាណិជ្ជកម្ម និងការប្រឈមមុខដាក់គ្នាផ្នែកភូមិសាស្ត្រនយោបាយរវាងចិន និងសហរដ្ឋអាមេរិក ក៏ដូចជាការបោះឆ្នោតទូទៅនាពេលខាងមុខរបស់សិង្ហបុរីផងដែរ៕
Tag:
សិង្ហបុរី
ហុងកុង
ចិន
លីសៀនឡុង
© រក្សាសិទ្ធិដោយ thmeythmey.com