អន្តរជាតិ
លោក ត្រាំ ប្រដូចការប្រយុទ្ធគ្នារវាងតួកគីនិងឃើដទៅនឹង «កូនក្មេង២នាក់» ប្រធានាធិបតីអាមេរិក ដូណាល់ ត្រាំ (AFP)
× ប្រធានាធិបតីអាមេរិក ដូណាល់ ត្រាំ បញ្ជាក់ថា លោកបណ្តោយឲ្យកងទ័ពតួកគីនិងកងកម្លាំងឃើដ វាយប្រយុទ្ធគ្នាក្នុងសមរភូមិនៅតំបន់ភាគខាងជើងស៊ីរី ព្រោះតែភាគីទាំងពីរនេះគឺដូចជាកូនក្មេង ដែលត្រូវការប្រយុទ្ធគ្នាទៅវិញទៅមក។
ប្រាប់ក្រុមអ្នកគាំទ្រក្នុងរដ្ឋ Texas នៅថ្ងៃព្រហស្បតិ៍ ១៧ តុលា លោក ត្រាំ និយាយថា៖«វាមិនមែនជារឿងធម្មតាឡើយអ្វីដែលខ្ញុំបានធ្វើ។ ខ្ញុំនិយាយថា ពួកគេនឹងត្រូវតែប្រយុទ្ធគ្នាក្នុងរយៈពេលខ្លី។ គឺដូចជាកូនក្មេង២នាក់ អ្នកត្រូវបណ្តោយឲ្យពួកគេវាយគ្នា ហើយបន្ទាប់មកអ្នកចាប់បំបែកពួកគេចេញពីគ្នា»។ លោក បន្តថា តួកគីនិងឃើដ បានប្រយុទ្ធគ្នាពីរបីថ្ងៃ ហើយវាគឺសាហាវណាស់។
ក្រោយការចរចាជាមួយអនុប្រធានាធិបតីអាមេរិក មៃ ផេន តួកគីយល់ព្រមផ្អាកប្រតិបត្តិការយោធារយៈពេល១២០ម៉ោង (៥ថ្ងៃ) ដើម្បីទុកពេលឲ្យក្រុមសកម្មប្រយុទ្ធឃើដ ដកចេញពីទឹកដីស៊ីរីភាគខាងជើងទំហំ៣២គីឡូម៉ែត្រ ដែលក្រុងអង់ការ៉ាត្រៀមយកធ្វើជាតំបន់សុវត្ថិភាព។ ជុំវិញដំណឹងនេះ លោក ដូណាល់ ត្រាំ លើកឡើងបែបនេះ៖«យើងបានទៅកាន់ទីនោះ [តួកគី] ហើយយើងបានប្រាប់ថា យើងចង់បានការផ្អាកមួយ។ ពួកឃើដ គឺមានល្អណាស់។ ពួកគេនឹងដកថយចេញពីទីនោះ»។
លោក Brett McGurk អតីតប្រេសិតពិសេសរបស់ប្រធានាធិបតីសម្រាប់សម្ព័ន្ធភាពប្រឆាំងរដ្ឋឥស្លាម ចាត់ទុកការលើកឡើងរបស់លោក ត្រាំ អំពីរឿង «កូនក្មេងប្រយុទ្ធគ្នា» នេះថា «អាសគ្រាម និងល្ងង់ខ្លៅ»។ តាមរយៈបណ្តាញសង្គម Twitter លោក សរសេរថា៖«ជនស្លូតត្រង់២០ម៉ឺននាក់បានរត់ភៀសខ្លួនចេញពីផ្ទះសំបែង។ រាប់រាយនាក់ស្លាប់។ របាយការណ៍បញ្ជាក់ច្បាស់ថាជាឧក្រិដ្ឋកម្មសង្គ្រាម។ អ្នកទោស ISIS រត់គេចខ្លួន។ សហរដ្ឋអាមេរិកកំពុងតម្រង់ និងទម្លាក់គ្រាប់បែងលើទីតាំងខ្លួនឯង ឬប្រគល់តួនាទីនេះឲ្យរុស្ស៊ី។ តើនេះដូចជាកូនក្មេង២នាក់ប្រយុទ្ធគ្នាឬ?»។
សូមបញ្ជាក់ដែរថា អង្គការឃ្លាំមើលស៊ីរីទទួលបន្ទុកសិទ្ធិមនុស្ស ដែលមានមូលដ្ឋាននៅចក្រភពអង់គ្លេស ប្រជាជនស្លូតត្រង់ជាង៣០ម៉ឺននាក់ បានភៀសខ្លួនចេញពីផ្ទះសំបែង គិតចាប់ពីតួកគីបានចាប់ផ្តើមវាយប្រហារទៅក្នុងទឹកដីស៊ីរីភាគខាងជើងមក។ អង្គការនេះ បានហៅប្រតិបត្តិការយោធានេះជាការបង្កចលាចលធំបំផុតមួយ ចាប់តាំងពីសង្គ្រាមស៊ីវិលបានផ្ទុះឡើងក្នុងឆ្នាំ២០១១មក។ ម្យ៉ាងវិញទៀត ខ្លួន ក៏បានបញ្ជាក់ឲ្យដឹងទៀតថា មនុស្ស៥០០នាក់ បានបាត់បង់ជីវិត ដែលក្នុងនោះក៏មានជនស៊ីវិលផងដែរ ហើយភាគច្រើន គឺសុទ្ធសឹងជាពួកឃើដ៕
Tag:
សហរដ្ឋអាមេរិក
តួកគី
ដូណាល់ ត្រាំ
© រក្សាសិទ្ធិដោយ thmeythmey.com