ជាតិ
ហេតុអ្វីសាលារចនា តាំងរូបសំណាកលោក Beat Richner ? រូបពី សុខ ដារ៉
× ភ្នំពេញ៖ លោក ហេង សុផាឌី សាកលវិទ្យាធិការនៃសកលវិទ្យាល័យភូមិន្ទវិចិត្រសិល្បៈ បានឲ្យដឹងថា ការតាំងរូបសំណាកលោក Beat Richner ក្នុងបរិវេណសាលារចនា គឺដើម្បីរួមចំណែកផ្សព្វផ្សាយពីកេរ្ដិ៍ឈ្មោះ និងគុណធម៌របស់លោកដែលមានចំពោះកុមារកម្ពុជា។
រូបសំណាកពណ៌មាសស្ទើរពាក់កណ្ដាលខ្លួន ដែលត្រូវបានរចនាឱ្យមានតែដៃមួយចំហៀងខាងឆ្វេងកាន់ទារកក្នុងកាយវិការយកចិត្តទុកដាក់ នោះគឺជារូបលោក Beat Richer ។ រូបសំណាកនេះជាស្នាដៃរបស់និស្សិតមហាវិទ្យាល័យសិល្បៈសូនរូប ឯកទេសចម្លាក់ជំនាន់ទី២៦ នៃសកលវិទ្យាល័យភូមិន្ទវិចិត្រសិល្បៈ។
រូបពី ឈិន ពិសិដ្ឋ
លោក ហេង សុផាឌី បានប្រាប់សារព័ត៌មានថ្មីៗនៅថ្ងៃទី១៩ខែតុលានេះថា ការតាំងរូបសំណាកលោក Beat Richner នេះឡើង គឺដើម្បីទុកជាគំរូដល់ក្មេងជំនាន់ក្រោយ ឱ្យបានឃើញពីវីរភាពរបស់លោកចំពោះកុមារកម្ពុជា។
«យើងត្រូវតែទទួលស្គាល់ទាំងអស់គ្នាថាលោក Beat Richner គាត់គឺជាអ្នកមានគុណចំពោះកុមារខ្មែរយើង។ គាត់បានលះបង់ពេលវេលា និងថវិកាស្ទើរពាក់កណ្ដាលជីវិតដើម្បីកម្ពុជា។ ការតាំងរូបចម្លាក់របស់គាត់ គឺដើម្បីចូលរួមរក្សាកេរ្ដិ៍ឈ្មោះ និងលើកគុណតម្លៃរបស់វីរជនដែលលះបង់ប្រយោជន៍ផ្ទាល់ខ្លួន»។ នេះជាការបញ្ជាក់របស់ លោក ហេង សុផាឌី ។ លោកបន្តដូច្នេះទៀតថា៖«ស្នាដៃរបស់សិស្សដែលបញ្ចប់ថ្នាក់បរិញ្ញាទាំងអស់ អាចតាំងក្នុងបរិវេណសាលាបាន លុះត្រាណាតែស្នាដៃទាំងនោះមានតម្លៃសម្រាប់ក្មេងជំនាន់ក្រោយ»។
ក្នុងឆ្នាំ២០១៩នេះ និស្សិតមហាវិទ្យាល័យសិល្បៈសូនរូប ឯកទេសចម្លាក់ជំនាន់ទី២៦ នៃសាកលវិទ្យាល័យភូមិន្ទវិចិត្រសិល្បៈ(សាលារចនា) មាននិស្សិតរៀនតែ៤រូបតែប៉ុណ្ណោះ។ និស្សិតទាំង៤រូបនេះ បានជ្រើសរើសប្រធានបទ២ផ្សេងគ្នា ដែលមួយក្រុមបានឆ្លាក់រូបលោក Beat Richner និងមួយក្រុមទៀត បានឆ្លាក់រូបល្ខោនស្រមោលស្បែកធំ ហើយប្រធានបទទាំងពីរនេះសុទ្ធតែបានដាក់តាំងក្នុងបរិវេណសាលារចនានេះ។
នាពេលបច្ចុប្បន្ននេះសកលវិទ្យាល័យភូមិន្ទវិចិត្រសិល្បៈ បានតាំងរូបសំណាកវីរៈបុរសខ្មែរជាង២០រូប ក្នុងបរិវេណសាលា ដូចជារូបព្រះបាទជ័យវរ្ម័នទី៧ រូបសម្ដេចព្រះករុណាព្រះបាទ ស៊ីសុវត្ថិ រូបព្រះបាទព្រះករុណានរោត្តម សីហនុ ព្រះបរមរតនៈកោដ្ឋជាដើម។
សូមបញ្ជាក់ថា បន្ទាប់ពីបញ្ចប់ការសិក្សាជំនាញពេទ្យកុមារក្នុងឆ្នាំ១៩៧៣ លោក Beat Richner ត្រូវបានកាកបាទក្រហមនៃប្រទេសស្វីស បញ្ជូនមកបំពេញបេសកកម្មសប្បុរសធម៌ ក្នុងប្រទេសកម្ពុជានៅឆ្នាំ១៩៧៤ ដល់ឆ្នាំ១៩៧៥ ដែលជាឆ្នាំដែលខ្មែរក្រហមបានឡើងកាន់អំណាច ហើយលោកត្រូវបានបង្ខំឱ្យចាកចេញពីកម្ពុជា។ ក្នុងឆ្នាំ១៩៩១ លោក Beat Richner ត្រូវបានស្នើឱ្យមកជួយដឹកនាំមន្ទីរពេទ្យគន្ធបុប្ផា រហូតដល់លោកអាចពង្រីកមន្ទីរពេទ្យបានដល់ទៅ៥កន្លែងក្នុងរាជធានីភ្នំពេញ និងនៅខេត្តសៀមរាបមកដល់ពេលបច្ចុប្បន្ននេះ៕
Tag:
Beat Richner
ចម្លាក់
និស្សិត
ស្នាដៃ
សាលារចនា
© រក្សាសិទ្ធិដោយ thmeythmey.com