អន្តរជាតិ
ស៊ីលីបន្តដាក់រដ្ឋក្នុងភាពអាសន្ន ក្រោយមនុស្ស៣នាក់ស្លាប់ក្នុងបាតុកម្មហិង្សា ប្រភពរូប៖ AFP
× អាជ្ញាធរស៊ីលីបានសម្រេចពន្យារពេលបម្រាមគោចររយៈពេល២យប់ជាប់ៗគ្នា នៅថ្ងៃអាទិត្យ ២០ តុលា។ ការបន្តដាក់រដ្ឋក្នុងភាពអាសន្នបែបនេះ ធ្វើឡើងក្រោយមនុស្ស៣នាក់ស្លាប់ក្នុងព្រឹត្តិការណ៍ដុតផ្សារទំនើបមួយកន្លែង ក្នុងរលកនៃភាពចលាចលដចេញពីការដំឡើងថ្លៃសេវាដឹកជញ្ជូនសាធារណៈនិងបញ្ហាវិសមភាពសង្គម។
ប៉ូលិសនិងយោធាស៊ីលីបានបាញ់ឧស្ម័នបង្ហូរទឹកភ្នែកនិងកាណុងបាញ់ទឹកប្រឆាំងបាតុករ ក្នុងរដ្ឋធានី សាន់ត្យាហ្គោ ខណៈការប៉ះទង្គិចគ្នាអូសបន្លាយដល់ថ្ងៃទី៣។ ប្រធានាធិបតីស៊ីលី លោក Sebastian Pinera ដែលប្រកាសដាក់រដ្ឋក្នុងភាពអាសន្នក្នុងតំបន់៥កាលពីថ្ងៃសុក្រ ព្រមទាំងដាក់ពង្រាយកងទ័ពរាប់រយតាមដងផ្លូវនោះ បានចេញមុខការពារចំណាត់ការនេះ។
«លទ្ធិប្រជាធិបតេយ្យ ពុំត្រឹមតែមានសិទ្ធិប៉ុណ្ណោះ ក៏ប៉ុន្តែវាមានកាតព្វកិច្ចការពារខ្លួនឯងដោយប្រើរាល់មធ្យោបាយទាំងអស់ដែលប្រជាធិបតេយ្យខ្លួនឯងផ្តល់ឲ្យ និងនីតិរដ្ឋប្រយុទ្ធនឹងអ្នកដែលចង់បំផ្លាញវា»។ លោកប្រធានាធិបតី Pinera បញ្ជាក់បែបនេះ នៅក្រោយជំនួបបន្ទាន់មួយជាមួយក្រុមមន្ត្រីជាន់ខ្ពស់ស៊ីលី កាលពីថ្ងៃអាទិត្យ ពោលគឺមានប្រធានសភា ព្រឹទ្ធិសភា និងប្រធានតុលាការកំពូល។
តាមការចុះផ្សាយរបស់ទីភ្នាក់ងារព័ត៌មាន AFP រដ្ឋមន្ត្រីមហាផ្ទៃ និងសន្តិសុខស៊ីលី Andres Chadwick និយាយថា ស្ត្រីពីរនាក់ឆេះស្លាប់ក្នុងភ្លើងបន្ទាប់ពីហាងមួយដែលគ្រប់គ្រងដោយហាងលក់រាយអាមេរិក Walmart ត្រូវបានគេដុតនៅព្រឹកព្រលឹមថ្ងៃអាទិត្យ។ ចំណែកជនរងគ្រោះទី៣ ភេទស្រី ដែលអាជ្ញាធរអះអាងថាបានស្លាប់ក្នុងមន្ទីរពេទ្យ រងការឆេះខ្លោចដោយភ្លើងប្រមាណ៧៥ភាគរយនៃតួខ្លួនទាំងមូល។
យោងតាមរបាយការណ៍របស់អាជ្ញាធរស៊ីលី ឧបទ្ទវហេតុធ្ងន់ធ្ងរ១០៣ករណីបានកើតឡើងនៅទូទាំងប្រទេស ដោយមនុស្ស១៤៦២នាក់ត្រូវចាប់ឃុំខ្លួន ដែលក្នុងនោះ ៦១៤នាក់ គឺជាបាតុករដែលធ្វើសកម្មភាពក្នុងរដ្ឋធានី សាន់ត្យាហ្គោ។ ក្រុមបាតុករបានដុតភ្លើងកម្ទេចឡានក្រុង វាយបំផ្លាញស្ថានីយន៍រថភ្លើងក្រោមដី និងហាងទំនិញ ព្រមទាំងប៉ះទង្គិចជាមួយប៉ូលិសក្នុងទីក្រុងសាន់ត្យាហ្គោ និងទីក្រុងផ្សេងទៀត។
សេវាដឹកជញ្ជូនសាធារណៈស្ទើរទាំងអស់ក្នុងរដ្ឋធានីនៃប្រទេសស៊ីលីដែលមានប្រជាជនរស់នៅ៧លាននាក់ ត្រូវផ្អាកដំណើរការ កាលពីថ្ងៃអាទិត្យ ខណៈហាងទំនិញបិទទ្វា ហើយជើងហោះហើរជាច្រើនរបស់អាកាសយានដ្ឋានអន្តរជាតិសាន់ត្យាហ្គោ ត្រូវសម្រេចលុបចោល។ ប្រាប់សារព័ត៌មានក្នុងស្រុក ប្រធានក្រុមហ៊ុនស្ថានីយ៍រថភ្លើងក្រោមដីរដ្ឋ Metro S.A លោក Louis de Grange បញ្ជាក់ថា ការបំផ្លិចបំផ្លាញយ៉ាងសាហាវព្រៃផ្សៃលើសេវារថភ្លើងក្រោមដីរបស់ក្រុងសាន់ត្យាហ្គោ បានបង្កការខូចខាតក្នុងទំហំទឹកប្រាក់ជាង៣០០លានដុល្លារ។
ដើមចមនៃបាតុកម្មនេះ គឺដើម្បីប្រឆាំងការដំឡើងតម្លៃរថភ្លើងក្រោមដី ដែលកើនពី១,១៣ ទៅ ១.១៥ ក្នុងការធ្វើដំណើររយពេលមួយម៉ោង។ សម្រាប់រឿងនេះ រដ្ឋាភិបាល អះអាងថា ការដំឡើងនេះ កើតឡើងដោយសារតែតម្លៃប្រេងឡើងថ្លៃ និងរូបិយបណ្ណក្នុងស្រុកចុះខ្សោយ។ ទោះបែបនេះក្តី ក្រុមអ្នកតវ៉ា បង្ហាញកំហឹងជុំវិញរឿងវិសមភាគសង្គម និងប្រព័ន្ធសេដ្ឋកិច្ចសេរីរបស់រដ្ឋាភិបាល។
ក្រោយមក នាថ្ងៃសៅរ៏ ១៩ តុលា លោកប្រធានាធិបតី Pinera ព្រមស្តាប់ការតវ៉ានេះ ដោយបានប្រកាសផ្អាកការដំឡើងតម្លៃសំបុត្រ។ មេដឹកនាំរូបនេះ ទទួលស្គាល់ថា ក្រុមអ្នកតវ៉ានៅតាមដងផ្លូវមានមូលហេតុល្អដើម្បីធ្វើបាតុកម្ម ក៏ប៉ុន្តែលោក ក៏បានស្នើសុំឲ្យពួកគេសម្តែងការតវ៉ាដោយសន្តិវិធី។ ទោះជាយល់ព្រមផ្អាកដំឡើងតម្លៃរថភ្លើងក្រោមដី ក្រុមបាតុករនៅតែបន្តធ្វើកុបកម្ម និងលួចរបស់របរ ក្នុងទីក្រុង សាន់ត្យាហ្គោ ។ ម្ល៉េះហើយ រដ្ឋាភិបាលលោក Pinera បានសម្រេចប្រកាសរដ្ឋក្នុងភាពអាសន្ន។
គួរបញ្ជាក់ថា ស៊ីលី មានចំណូលប្រចាំឆ្នាំសម្រាប់មនុស្សម្នាក់ដល់ទៅ២ម៉ឺនដុល្លារ ដែលជាតួលេខខ្ពស់ជាងគេក្នុងតំបន់អាមេរិកឡាទីន ជាមួយកំណើនសេដ្ឋកិច្ចរំពឹងទុកសម្រាប់ឆ្នាំនេះ ២,៥ ភាគរយនិងអត្រាអតិផរណាត្រឹម ២ភាគរយ។ ប៉ុន្តែពលរដ្ឋស៊ីលី ហាក់មិនសប្បាយចិត្តជាមួយនឹងគំរូសេដ្ឋកិច្ច ដោយរដ្ឋាភិបាលបានធ្វើឯកជនភាវូបនីយកម្មស្ទើរតែទាំងអស់លើការថែរក្សាសុខភាពនិងការអប់រំ ។ ហើយពេលជាមួយគ្នានេះ ការធ្លាក់ចុះប្រាក់សោធន និងការកើនឡើងនៃតម្លៃសេវាកម្មទូទៅ បានធ្វើឲ្យបញ្ហាវិសមភាពសង្គមដែលមានស្រាប់ក្នុងប្រទេសនេះ កាន់តែអាក្រក់ថែមទៀត៕
Tag:
ស៊ីលី
បាតុកម្ម
Sebastian Pinera
© រក្សាសិទ្ធិដោយ thmeythmey.com