ជាតិ
សិស្សខ្មែរ៥នាក់ ទៅប្រកួតរ៉ូបូត ជាមួយបេក្ខជន១៩០ប្រទេស នៅទីក្រុងឌូបៃ រូបពីក្រសួងអប់រំ
× ភ្នំពេញ៖ សិស្ស៥នាក់នៃសាលា E2STM អមដោយគ្រូ២នាក់ ដែលតំណាងឲ្យកម្ពុជា នឹងចូលរួមប្រកួតរ៉ូបូតក្នុងកម្មវិធី Robotic Olympiad លំដាប់ពិភពលោកជាលើកដំបូងនៅទីក្រុងឌូបៃ ប្រទេសអារ៉ាប់។ នេះបើតាមសេចក្តីប្រកាសព័ត៌មាននៅលើទំព័រហ្វេសប៊ុករបស់ក្រសួងអប់រំ នាថ្ងៃទី២១ ខែតុលា។
បើតាមក្រសួងអបរំ កម្មវិធីប្រកួតនេះ មានបេក្ខជនចូលរួមពី១៩០ប្រទេស ដែលប្រព្រឹត្តទៅចាប់ពីថ្ងៃទី២២ ដល់ថ្ងៃទី២៨ ខែតុលា ឆ្នាំ២០១៩។ ការប្រកួតនេះ ផ្ដោតទៅលើការប្រើប្រាស់រ៉ូបូត ដើម្បីសម្អាតកាកសំណល់នានានៅក្នុងមហាសមុទ្រ។
បេក្ខជនទាំង៥នាក់នោះ បានបង្ហាញសមត្ថភាព និងលក្ខណៈទុកជាមុន នៅមុខលោកស្រី គឹម សេដ្ឋានី រដ្ឋលេខាធិការក្រសួងអប់រំ ដែលបានជួបសំណេះសំណាល និងលើកទឹកចិត្តចំពោះយុវជនទាំង៥នាក់នោះ មុននឹងពួកគេ ចេញទៅប្រកួត នៅថ្ងៃស្អែក។
គួរបញ្ជាក់ថា បច្ចុប្បន្ន ក្រសួងអប់រំ យុវជន និង កីឡា កំពុងលើកកម្ពស់ការយល់ដឹងអំពីវិស័យបច្ចេកវិទ្យា និងលើកទឹកចិត្តយុវជន ឲ្យចូលរួមក្នុងកម្មវិធីប្រកួតលំដាប់ពិភពលោក ដែលជាផ្នែកមួយ ក្នុងការលើកមុខមាត់និងកិត្តិយសកម្ពុជានៅលើឆាកអន្តរជាតិ។
សាលា E2STEM ដែលជាអង្គការសិង្ហបុរី បានធ្វើជាដៃគូជាមួយក្រសួងអប់រំ។ E2STEM ដែលមានទីតាំងនៅវិទ្យាល័យព្រះយុគន្ធរ រាជធានីភ្នំពេញ គឺជាសាលាបច្ចេកវិទ្យាថ្មី ដែលគាំទ្រក្រសួងអប់រំ ក្នុងការកែទម្រង់អប់រំ ក្នុងវិស័យវិទ្យាសាស្ត្រ បច្ចេកវិទ្យា វិស្វកម្ម និង គណិតវិទ្យា៕
© រក្សាសិទ្ធិដោយ thmeythmey.com