ពីនេះ ពីនោះ
ព័ត៍មានសុខភាព
គ្រាន់តែស្ត្រេសសោះក៏អាចពុកឆ្អឹងបានដែរ?
× ស្រេ្តស ឬហៅថាភាពតានតឹងក្នុងអារម្មណ៍ ដែលច្រើនតែគេចាត់ទុកថាជាមូលហេតុនាំឲ្យកើតជំងឺរ៉ាំរ៉ៃដូចជា លើសសម្ពាធឈាម ជំងឺបេះដូងសរសៃឈាម បញ្ហាក្រពះពោះវៀន បាក់ទឹកចិត្ត និងបញ្ហាសុខភាពផ្សេងៗទៀតនោះឥឡូវនេះចាប់ផ្តើមប៉ះពាល់ដល់សុខភាពឆ្អឹងអ្នកហើយ។ វាមានឥទ្ធិពលអវិជ្ជមានមួយទៅលើឆ្អឹង និងគ្រប់គ្រាន់នឹងធ្វើឲ្យគ្រូពេទ្យភ្ញាក់ផ្អើលដែរ ដោយសារតែមនុស្សវ័យកណ្តាលអាចមានជំងឺពុកឆ្អឹងដោយសារតែស្ត្រេសនេះ។ ការគេងមិនគ្រប់គ្រាន់ មិនសូវធ្វើសកម្មភាពរាងកាយ និងចំណាយពេលធ្វើការយូរនឹងបង្កើនភាពស្ត្រេសដល់រាងកាយដែរ។
ខណៈដែលកម្រិតស្ត្រេសមួយចំនួនធម្មតានោះ តែនៅពេលស្ត្រេសក្លាយទៅជារឿងរ៉ាំរ៉ៃ និងខ្លាំងហើយនោះ វាអាចនឹងបង្កបញ្ហាច្រើនដល់រាងកាយទៀត។ ដំបូងឡើយ នៅពេលស្ត្រេសកើនឡើងខ្លាំង រាងកាយនឹងបញ្ចេញអ័រម៉ូន Cortisol ដែលនាំឲ្យរំខានដល់ការសាងសង់ឆ្អឹងបន្ថែម។ តាមពិត រាងកាយបញ្ចេញជាតិកាលស្យូមពីឆ្អឹងដើម្បីរក្សាតុល្យភាព pH របស់អ័រម៉ូន Cortisol នេះឯង។ ទីពីរ នៅពេលស្ត្រេសខ្លាំង មនុស្សម្នាក់ងាយនឹងមានទម្លាប់ញ៉ាំច្រើន គេងមិនលក់ និងលែងចង់ហាត់ប្រាណទៀត។ ដូច្នេះកត្តាទាំងនេះហើយទើបធ្វើឲ្យឆ្អឹងកាន់តែពុក។
អ្នកជំនាញខាងឆ្អឹងបានណែនាំថា កាលណាអ្នកស្ត្រេសច្រើនបែបនេះគួរតែញ៉ាំអាហារសម្បូរជាតិកាល់ស្យូម ឬថ្នាំបំប៉នកាល់ស្យូមជាទៀងទាត់ក្រោយពីពិគ្រោះជាមួយគ្រូពេទ្យរួច។ ចូរយកចិត្តទុកដាក់ទៅលើតម្រូវការជីវជាតិរបស់រាងកាយផង។ ការធ្វើសកម្មភាពរាងកាយ ឬហាត់ប្រាណគឺជារឿងដែលត្រូវតែធ្វើ។ អ្នកក៏អាចអនុវត្តលំហាត់ប្រាណយូហ្គា និងតាំងសមាធិដើម្បីបំបាត់ស្ត្រេសបានដែរ។ ក្រោយពីឈានដល់អាយុ ៣៥ឆ្នាំហើយ ចូរពិនិត្យទៅលើកំហាប់ឆ្អឹងផង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com