ជាតិ
បទយកការណ៍ / បទសម្ភាសន៍
២៥ខេត្ត/រាជធានី
វិចិត្រករ ជា សេរីរដ្ឋ យកដីភក់គូរជាគំនូរលើកន្ទេលរំចេកដោយប្រើម្រាមដៃ រំលេចពីជីវភាពអ្នកស្រុកស្រែ
× ភ្នំពេញ៖ លោក ជា សេរីរដ្ឋ ជាវិចិត្រករគំនូរសហសម័យមួយរូប ដែលបានយកកន្ទេលស្លឹករំចេកមកច្នៃជំនួសក្រដាស់និងផ្ទាំងកំណាត់ ដើម្បីគូរគំនូរ។ ជាវិចិត្រករគំនូរដែលមានបទពិសោធន៍ជាង១១ឆ្នាំ លោក សេរីរដ្ឋ បានយកដីភក់ កម្ទេចឈើពីធ្មេញរណា ដោយប្រើម្រាមដៃគូរជាគំនូរនៅលើកន្ទេលស្លឹករំចេក រំលេចពីជីវភាពរស់នៅតាមជនបទ។ វិចិត្រករដែលមានស្រុកកំណើតនៅខេត្តបាត់ដំបង រូបនេះ ពន្យល់ពីសាច់រឿងនៃគំនូរទាំងនោះថា គឺបង្ហាញពីទិដ្ឋភាពនៃការរស់នៅរបស់អ្នកស្រុកស្រែចម្ការ និងការសាមគ្គីភាពដោយចេះជួយយកឧស្សាហ៍គ្នាក្នុងនាមជាអ្នកភូមិស្រុកជាមួយគ្នា ដែលទិដ្ឋភាពបែបនេះស្ទើរតែលែងមាន។
សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មាន ThmeyThmey ជាមួយលោក ជា សេរីរដ្ឋ សិល្បករគំនូរសហសម័យ ដូចតទៅ៖
ស្នាដៃគំនូរបែបសហម័យចំនួន៨ផ្ទាំង របស់វិចិត្រករវ័យ២៩ឆ្នាំ ជា សេរីរដ្ឋ ដែលរៀបរាប់ពីជីវិតរស់នៅបែបជនបទ ត្រូវបានដាក់បង្ហាញនៅក្នុងពិព័រណ៍សិល្បៈដែលមានចំណងជើងថា«ស្រែប្រតិដ្ឋ» នៅវិចិត្រសាល ស-ស កាលពីថ្ងៃទី១១ ខែតុលា ឆ្នាំ២០១៩នេះ។ លោក ជា សេរីរដ្ឋ ពន្យល់ពីស្នាដៃដែលលោក យកដីភក់ និងកម្ទេចឈើពីធ្មេញរណា ដោយប្រើម្រាមដៃគូរជាគំនូរនៅលើកន្ទេលស្លឹករំចេក រំលេចពីជីវភាពរស់នៅតាមជនបទនេះដូច្នេះថា៖«មនុស្សគ្រប់គ្នាតែងតែមានសិល្បៈក្នុងខ្លួន មិនថាតិចឬច្រើននៅក្នុងការបង្ហាញរៀងៗខ្លួន ហើយគំនូរសហសម័យនេះ វាអាចជួយបានច្រើន នៅក្នុងគំនូរមួយវាមានគំនិតច្រើននៅក្នុងហ្នឹង។ អីចឹងនៅក្នុងសាច់រឿងនៃគំនូរមួយហ្នឹង វារៀបរាប់ក្បោះក្បាយច្រើន»។
មានស្រុកកំណើតនៅខេត្តបាត់ដំបងលោក ជា សេរីរដ្ឋ បានចាត់ទុកការគូរគំនូរសហសម័យនេះ ប្រៀបដូចជាការចែករំលែកសិល្បៈច្នៃប្រឌិតទៅកាន់មនុស្សគ្រប់រូប។ ក្នុងបទសម្ភាសជាមួយសារព័ត៌មានថ្មីៗ លោក ជា សេរីរដ្ឋបានឲ្យដឹងថា គំនូរស្រែប្រតិដ្ឋដែលលោកយកដីភក់គូរដោយប្រើម្រាមដៃផ្ទាល់នោះ យ៉ាងដូច្នេះ៖«ខ្ញុំអត់ត្រូវការចាំបាច់ ពឹងរបស់អ្វីមួយយកមកបន្តការងាររបស់ខ្ញុំទេ អីចឹងខ្ញុំប៉ះដោយ (ដៃ)ផ្ទាល់ ខ្ញុំអត់ប្រើជក់ទេ អីចឹងយើងអាចបញ្ជូនឬប៉ះគ្នា ឬអាចស្និទស្នាលជាមួយនឹងគំនូរហ្នឹង វាចូលជ្រៅនឹងគំនូរហ្នឹងច្រើនជាង ការណ៍ដែលពឹងផ្អែកលើអ្វីមួយ»។
ជាគ្រូផ្នែកក្រាហ្វិច និងជាសិល្បករគំនូរមួយរូប ទោះបីជាការគូរគំនូរនេះមិនមែនជាមុខរបរចំបងរបស់លោកក៏ដោយ តែលោកយល់ថា ការគូរគំនូរសហសម័យនេះ គឺជាការរកឃើញគំនិតថ្មីៗ និងពេលដែលលោកគូរគំនូរសហសម័យនេះ ធ្វើឲ្យរូបលោកមានអារម្មណ៍រីករាយជាមួយគំនូររបស់លោក៕
© រក្សាសិទ្ធិដោយ thmeythmey.com