អន្តរជាតិ
លោក ទ្រូដូ រក្សាកៅអីនាយករដ្ឋមន្ត្រីអាណត្តិទី២ តែជារដ្ឋាភិបាលសំឡេងភាគតិច ប្រភពរូប៖ Reuters
× គណបក្សសេរីនិយមរបស់លោក ចាស្ទីន ទ្រូដូ (Justin Trudeau) នឹងបន្តជាបក្សកាន់អំណាចដដែល ប៉ុន្តែសម្រាប់អាណត្តិទី២នេះ លោក ទ្រូដូ នឹងក្លាយជានាយករដ្ឋមន្ត្រីនៃរដ្ឋាភិបាលសំឡេងភាគតិច។
ក្រោយការបោះឆ្នោតបានបញ្ចប់ ទូរទស្សន៍កាណាដា CTV បង្ហាញលទ្ធផលឆ្នោត នៅយប់ថ្ងៃចន្ទ ទី២១ តុលា ដោយបក្សសេរីនិយមរបស់លោកទ្រូដូ ឈ្នះបានកៅអី១៥៨ ដែលតិចជាងឆ្នាំ២០១៥ ស្មើ១៨៤កៅអី។ ដឹកនាំក្នុងនាមជារដ្ឋាភិបាលមានសំឡេងភាគតិចបែបនេះ លោក ទ្រូដូ នឹងត្រូវការធ្វើការជាមួយបណ្តាគណបក្សផ្សេងៗទៀត ទើបអាចគ្រប់គ្រងប្រទេសបាន។
រដ្ឋសភាកាណាដាមាន៣៣៨កៅអី ហើយបក្សដែលឈ្នះសំឡេងភាគច្រើននៃកៅអីសភា គឺស្មើ១៧០ ឡើងទៅ។ ជាមួយចំនួននេះ បក្សឈ្នះឆ្នោត បង្កើតរដ្ឋាភិបាលដោយស្វ័យប្រវត្តិ និងអាចអនុម័យសំណើច្បាប់ដោយងាយស្រួល។ ប្រសិនបើ គ្មានបក្សឈ្នះសំឡេងភាគច្រើនទេនោះ គណបក្សពីរឬច្រើន ត្រូវបង្កើតសម្ព័ន្ធភាព។ វាមិនទាន់ច្បាស់នៅឡើយទេថា បក្សមួយណាដែលបក្សលោកទ្រូដូនឹងចូលកម្លាំងជាមួយដើម្បីដឹកនាំប្រទេស ខណៈនេះ ការចរចាត្រៀមរៀបចំឡើងក្នុងពេលឆាប់ៗនេះ។
ប្រាប់ក្រុមអ្នកគាំទ្រទីក្រុង Montreal នៅព្រឹកថ្ងៃ២២ តុលា លោក ទ្រូដូ លើកឡើងបែបនេះ៖«យប់នេះ ប្រជាជនកាណាដាបានបដិសេធការបែងចែកនិងភាពអវិជ្ជមាន […] ហើយពួកគេចេញទៅបោះឆ្នោតគាំទ្ររបៀបវារៈដែលមានវឌ្ឍនភាព និងសកម្មភាពខ្លាំងខ្លាលើការប្រែប្រួលអាកាសធាតុ»។
សូមបញ្ជាក់ថា សម្រាប់ការបោះឆ្នោតឆ្នាំ២០១៩នេះ កាណាដា មានអ្នកចុះឈ្មោះបោះឆ្នោត៤,៧លាននាក់ ដែលក្នុងនោះ ៦២ភាគរយបានចេញទៅបោះឆ្នោត។ តួលេខនេះ បានធ្លាក់ចុះ បើធៀបនឹងក្នុងឆ្នាំ២០១៥ ស្មើនឹង ៦៨,៥ភាគរយ៕
Tag:
កាណាដា
ចាស្ទីន ទ្រូដូ
© រក្សាសិទ្ធិដោយ thmeythmey.com